زَبور 124 - هُدائے پاکێن کتاب، بلۆچی زبانا

هُداوندئے نام مئے مدَت اِنت

دێم په اورشَلیما برزاد رئوگئے سئوتے. داوودئے زَبور.

¹ ”اگن هُداوند گۆن ما گۆن مبوتێن،“ اِسراییل بگوَشات:

² ”اگن هُداوند گۆن ما گۆن مبوتێن آ وهدا که مردمان مئے سرا اُرُش و همله کرت،

³ آیان مارا زندگا اێر برتگ‌اَت وهدے هِژمِش مئے سرا چِست اَت.

⁴ آ وهدا آپان مارا اێر برتگ‌اَت، هار و توپّانا مارا مان رُپتگ‌اَت،

⁵ مَستێن آپان مارا رۆپان کرتگ‌اَت.“

⁶ هُداوندا ستا بات که نه‌اِشتی ما اِشانی دنتانانی شکار ببێن.

⁷ مئے زندی انچۆ رَکّێنت که بالی مُرگے چه شکاریئے داما، دام دِرت و ما رکّتێن.

⁸ هُداوندئے نام مئے مدَت اِنت، آسمان و زمینئے جۆڑ کنۆکئے نام.