زَبور 123 - هُدائے پاکێن کتاب، بلۆچی زبانا

چمّان دێم په تئو چستَ کنان

دێم په اورشَلیما برزاد رئوگئے سئوتے.

¹ وتی چمّان دێم په تئو چستَ کنان، تئو که اَرشا، وتی بادشاهی تهتا نِشتگئے.

² اَنچۆ که گُلامێئے چمّ وتی واجهئے دستا سَکّ اَنت و مۆلدێئے چمّ وتی بانُکا مئے چمّ هُداوندێن هُدایا سَکّ اَنت که مئے سرا رهم بکنت.

³ مئے سرا رهم کن، او هُداوند! رهم کن مئے سرا، که ما سکّ باز بےاِزّتی سَگِّتگ،

⁴ آسودگێن مردمانی ریشکند و پُرکِبرانی کلاگ مارا په سرجمیا رستگ.