زَبور 114 - هُدائے پاکێن کتاب، بلۆچی زبانا

وهدے اِسراییل چه مِسرا در آتک...

¹ وهدے اِسراییل چه مِسرا در آتک، آکوبئے هاندان، چه درامَدێن زبانێئے مردمانی نیاما،

² یَهودا هُدائے گِچێن کرتگێن و اِسراییل آییئے بادشاهی بوت.

³ دریایا دیست و تَتک، اُرْدُنئے کئور، پُشتا کنزِت.

⁴ کۆه چۆ گوَرانڈا سِٹّ جنان بوتنت و جُمپ چۆ گوَرَگا.

⁵ او دریا! چے بوت که تئو تَتکئے؟ او اُرْدُن! چے بوت که تئو پُشتا کِنزِتئے؟

⁶ او کۆهان! چے بوت که شما چۆ گوَرانڈا سِٹّ جت، شما چۆ گوَرَگا، او جُمپان؟

⁷ بِلَرز، او زمین! هُداوندئے بارگاها، آکوبئے هُدائے بارگاها.

⁸ آییا تَلار گوَرم کرتنت، چه آپا پُرّ، مُهرێن سِنگ آپئے چمّگ.