زَبور 113 - هُدائے پاکێن کتاب، بلۆچی زبانا

هُداوند نێزگارا چِستَ کنت

¹ هُداوندا بنازێنێت، هَلّێلویا. بنازێنێت، او هُداوندئے هزمتکاران! هُداوندئے ناما بنازێنێت.

² هُداوندئے ناما ستا و سنا بات، چه انّونا تان اَبد.

³ مَشرِکا بگر تان مَگرِبا، هُداوندئے نام نازێنگ بات.

⁴ هُداوند سجّهێن کئومانی سرا پُرجلال اِنت و آییئے شان و شئوکت چه آسمانان بُرزتِر.

⁵ کئے مئے هُداوندێن هُدائے ڈئولا اِنت؟ مئے هُدا بُرزاد، وتی بادشاهی تهتا نِشتگ.

⁶ آ جَهلَ بیت که آسمان و زمینا بچاریت.

⁷ آ نێزگارا چه هاکا و هاجتمندا چه پُرانی هاکۆٹا چستَ کنت.

⁸ شهزادگانی نیاما نادێنیتِش، وتی کئومئے شهزادگانی نیاما.

⁹ سَنٹ و بےائولادێن جنێنا وشدل و چُکّانی ماتَ کنت و آییئے لۆگا آباد. هُداوندا بنازێنێت، هَلّێلویا.