زَبور 1 - هُدائے پاکێن کتاب، بلۆچی زبانا

زَبورئے ائولی کتاب زَبور 1‏—41 پهرێزکار و بدکارانی راه

¹ بَهتاور هما اِنت که بدکارانی شئور و سَلاهئے سرا نرئوت، گُنهکارانی رهسرا نه‌اۆشتیت و ریشکند کنۆکانی دیوانا ننِندیت،

² هما که واهگی گۆن هُداوندئے تالیما اِنت و رۆچ و شپ آییئے تالیمئے سرا پِکرَ کنت.

³ آ هما درچکئے پئیما اِنت که رُمبۆکێن جۆسرێئے کِرّا کِشَگ بوتگ و مۆسمئے سرا نیبگَ دنت و تاکی نگیمّرنت، هرچے هم که کنت کامیابَ بیت.

⁴ بله بدکار چُش نه‌اَنت، آ هما پُگ و پَلارانی پئیما اَنت که گواتِشَ رۆپیت و بارت.

⁵ گڑا بزان که بدکاران، په دادرسیا اۆشتگئے واک و توان نێست و گُنهکار پهرێزکارانی دیوانا هۆر بوتَ نکننت.

⁶ که هُداوند پهرێزکارانی راهئے نگهپان اِنت، بله بدکارانی راه تباهی و بێگواهی اِنت.