پێدایش 5 - هُدائے پاکێن کتاب، بلۆچی زبانا

چه آدما بگر تان نوها

¹ آدمئے نَسل و پَدرێچئے کِتابی کِسّه چُش اِنت: هُدایا آ رۆچا که انسان جۆڑ کرت، وتی شِکلا جۆڑی کرت.

² مردێن و جنێنی جۆڑ کرتنت. هما وهدا که اَڈّی کرتنت، برکتی داتنت و آیانی نامی اِنسان کرت.

³ آدما که 130 سال بوت، وتی پئیمێن، وتی شِکلئے مردێن‌چُکّێئے پت بوت و آییئے نامی سئیت کرت.

⁴ سئیتئے پێدائِشا رند، آدما 800 سال اُمر کرت و آییا دگه مردێن‌چُکّ و جنێن‌چُکّ هم بوت.

⁵ اے هسابا آدما سَرجمیا 930 سال اُمر کرت و مُرت.

⁶ سئیتا که 105 سال بوت، چه آییا اێنۆش پێدا بوت.

⁷ اێنۆشئے پێدائِشا رند، سئیتا 807 سال اُمر کرت و آییا دگه مردێن‌چُکّ و جنێن‌چُکّ هم بوت.

⁸ اے هسابا سئیتا سَرجمیا 912 سال اُمر کرت و مُرت.

⁹ وهدے اێنۆشا 90 سال بوت، چه آییا کِنان پێدا بوت.

¹⁰ چه کِنانئے پێدائِشا رند، اێنۆشا 815 سال اُمر کرت و آییا دگه مردێن‌چُکّ و جنێن‌چُکّ هم بوت.

¹¹ اێنۆشا سَرجمیا 905 سال اُمر کرت و مُرت.

¹² کِنانا که 70 سال بوت، چه آییا مَهَلالێل پێدا بوت.

¹³ مَهَلالێلئے پێدائِشا رند، کِنانا 840 سال اُمر کرت و آییا دگه مردێن‌چُکّ و جنێن‌چُکّ هم بوت.

¹⁴ کِنانا سَرجمیا 910 سال اُمر کرت و مُرت.

¹⁵ وهدے مَهلالێلا 65 سال بوت، چه آییا یارِد پێدا بوت.

¹⁶ یارِدئے پێدائِشا رند، مَهلالێلا 830 سال اُمر کرت و آییا دگه مردێن‌چُکّ و جنێن‌چُکّ هم بوت.

¹⁷ مَهَلالێلا سَرجمیا 895 سال اُمر کرت و مُرت.

¹⁸ وهدے یارِدا 162 سال بوت، چه آییا هَنوک پێدا بوت.

¹⁹ هَنوکئے پێدائِشا رند، یارِدا 800 سال اُمر کرت و آییا دگه مردێن‌چُکّ و جنێن‌چُکّ هم بوت.

²⁰ یارِدا سَرجمیا 962 سال اُمر کرت و مُرت.

²¹ وهدے هَنوکا 65 سال بوت، چه آییا مِتوشالَه پێدا بوت.

²² مِتوشالَهئے پێدائِشا رند، هَنوکا 300 سال هُدائے راها گامَ جَت و آییا دگه مردێن‌چُکّ و جنێن‌چُکّ هم بوت.

²³ هَنوکئے سَرجمێن اُمر 365 سال بوت.

²⁴ هَنوکا هُدائے راها گامَ جت و رندا کَسّا ندیست، چێا که هُدایا هَنوک زندگا زُرت و بُرت.

²⁵ وهدے مِتوشالَها 187 سال بوت، چه آییا لَمێک پێدا بوت.

²⁶ لَمێکئے پێدائِشا رند، مِتوشالَها 782 سال اُمر کرت و آییا دگه مردێن‌چُکّ و جنێن‌چُکّ هم بوت.

²⁷ مِتوشالَها سَرجمیا 969 سال اُمر کرت و مُرت.

²⁸ وهدے لَمێکا 182 سال بوت، چه آییا مردێن‌چُکّے پێدا بوت.

²⁹ آییا وتی چُکّ نوه نامێنت و گوَشت: ”اے چُکّ مارا چه مئے دستانی هما گرانێن کار و زهمتان آسودگَ کنت که چه هُدائے نالت کرتگێن زمینا چِست بوتگ‌اَنت.“

³⁰ نوهئے پێدائِشا رند، لَمێکا 595 سال اُمر کرت و آییا دگه مردێن‌چُکّ و جنێن‌چُکّ هم بوت.

³¹ لَمێکا سَرجمیا 777 سال اُمر کرت و مُرت.

³² نوهئے اُمر 500 سال بوت و رندا چه آییا سام و هام و یاپِت پێدا بوتنت.