پێدایش 35 - هُدائے پاکێن کتاب، بلۆچی زبانا

بئیت‌اێلا، آکوبئے پِر ترّگ

¹ هُدایا گۆن آکوبا گوَشت: ”پاد آ، بئیت‌اێلا برئو و همۆدا بنند. اۆدا په من کُربانجاهے اَڈّ کن، په هما هُدایا که وهدے تئو چه وتی برات ایسّوا تچگا اَتئے، تئیی دێما زاهر بوت.“

² آکوبا گۆن وتی لۆگئے مردم و آ دگه سجّهێن همراهان گوَشت: ”هما ڈنّی هُدا که شمئے نیاما اَنت، چه وت دَرِش کنێت، وتا پاک و پَلگار کنێت و وتی پُچّان بدل کنێت و

³ بیاێت بئیت‌اێلا رئوێن. اۆدا من په هما هُدایا کُربانجاهے اَڈَّ کنان که سکّی و سۆریانی رۆچان منی دْوایی گۆش داشتگ و هر جاه که شتگان، گۆن من گۆن بوتگ.“

⁴ گڑا آیان هر ڈنّی هُداے که گۆن اَت و هر چُلُمبے که گۆشان اَت، سجّهێنِش آکوبارا داتنت و آکوبا اے زُرت و شِکێما، مزنێن درچکئے چێرا کَلّ کرتنت.

⁵ نون آ راه گپتنت. هُدائے تُرسا آیانی چپّ و چاگردئے سجّهێن شهرانی سرا مان شانت و کَسّ آیانی رندا نکپت.

⁶ آکوب و آییئے سجّهێن همراه کَنهانئے سرڈگارا لوزئے شهرا، بزان بئیت‌اێلا سر بوتنت.

⁷ آکوبا همۆدا کُربانجاهے اَڈّ کرت و آ جاگهئے نامی اێل‌بئیت‌اێل کرت، چێا که وهدے آ چه وتی براتا تچگا اَت، هُدایا همِدا آییئے دێما وتا زاهر کرت.

⁸ رِبِکّائے شیرمات دَبورَه بێران بوت و آاِش چه بئیت‌اێلا ڈَنّ، مزنێن درچکێئے چێرا کبر کرت. آ جاگهئے نام اَلون‌باکوت کنگ بوت.

⁹ آکوب که چه پَدّان‌اَراما آتک، هُدا پدا آییئے دێما زاهر بوت و آکوبی برکت دات.

¹⁰ گۆن آییا گوَشتی: ”تئیی نام آکوب اِنت، بله چه اِد و رند تئو آکوب گوَشگَ نبئے. تئیی نام اِسراییلَ بیت.“ گڑا آکوبئے نامی اِسراییل کرت.

¹¹ هُدایا گۆن آکوبا گوَشت: ”من پُرواکێن هُدا آن. چُکّ و بَر کن و گێش بئیان بئے. چه تئو کئومے و کئومانی رُمبے پێدا بیت و بادشاه چه تئیی سْرێنا پێدا بنت.

¹² هما مُلک که من اِبراهێم و اِساکارا دات، ترا هم دئیانی و چه تئو و رند، تئیی نَسل و پَدرێچارا هم اے مُلکا دئیان.“

¹³ گڑا هُدایا آکوب اِشت و چه هما جاگها که گۆن آییا هبری کرتگ‌اَت، بُرزاد شت.

¹⁴ همے جاگها که هُدایا گۆن آییا هبر کرتگ‌اَت، آکوبا اۆدا سِنگئے چێدَگے اَڈّ کرت و سِنگئے سرا رێچگی کُربانیگی رێتک و رۆگنی هم پِر رێتک.

¹⁵ اے جاگها که هُدایا گۆن آکوبا هبر کرتگ‌اَت، اے جاگهئے نام آکوبا بئیت‌اێل کرت.

راهیلئے مَرک

¹⁶ گڑا آ چه بئیت‌اێلا در آتکنت. اَنگت اِپراتا سر نبوتگ‌اَتنت که راهیلئے چِلّگی درد بُنگێج بوتنت. اے ساهت په آییا سکّ گران اَت.

¹⁷ وهدے آ چِلّگیئے گرانێن دردان اَت، جَنبۆگا گۆن آییا گوَشت: ”متُرس. ترا دگه مردێن‌چُکّے بیت.“

¹⁸ وهدے راهیلئے مَرکئے ساهت آتک و آییئے اَرواه بال کنگا اَت، وتی چُکّئے نامی بِن‌اونی کرت، بله پتا چُکّئے نام بِنیامین کرت.

¹⁹ راهیل مُرت و آاِش اِپراتئے راها، بزان بئیت‌لَهِمئے راها کَبر کرت.

²⁰ آکوبا آییئے کبرئے سرا شَکّے مِکّ کرت و همے شَکّ تان رۆچِ مرۆچیگا راهیلئے کبرئے نِشانی اِنت.

²¹ اِسراییل پدا راه گپت و وتی گِدانی میگدال‌اێدَرئے دومی نێمگا مِکّ کرت.

²² اِسراییل همے دَمگا نندۆک اَت. روبِن شت و گۆن وتی پتئے سُریَت، بِلَّها وپت و وابی کرت. اِسراییل سهیگ بوت. آکوبا دوازده مردێن‌چُکّ هست‌اَت:

²³ چه لیاها روبِن، که آکوبئے ائولی چُکّ اَت و شَمون و لاوی و یَهودا و ایسّاکار و زِبولون اَتنت،

²⁴ چه راهیلا ایسُّپ و بِنیامین،

²⁵ بِلَّه که راهیلئے مۆلِد اَت، چه آییا دان و نَپتالی،

²⁶ زِلپَه که لیاهئے مۆلِد اَت، چه آییا جاد و آشِر. آکوبئے هما مردێن‌چُکّ که پَدّان‌اَراما پێدا بوتنت، همِش اَتنت.

اِساکئے مَرک

²⁷ آکوب وتی پت اِساکئے کرّا مَمرِها، کِریَه‌اَربهئے شهرا بزان هِبرونا آتک، همۆدا که اِبراهێم و اِساکا دَرامدانی پئیما زِند گوازێنتگ‌اَت.

²⁸ اِساکا یکّ سَد و هَشتاد سال اُمر کرت،

²⁹ وتی گُڈّی دَمی کَشّت و گۆن وتی مُرتگێن مهلوکا هئوار بوت. اِساکا شَرّێن مزنێن اُمرے کرت و پیر بوت و مُرت. آییئے مردێن‌چُکّان، بزان ایسّو و آکوبا آ زُرت و کبر کرت.