پێدایش 15 - هُدائے پاکێن کتاب، بلۆچی زبانا

گۆن اِبراما هُدائے اَهد و پئیمان

¹ چه اے چیزّان و رند، هُداوندئے هبر الهام و شُبێنێئے تها په اِبراما آتک: ”او اِبرام! متُرس، من تئیی اِسپر آن. تئیی اِنام سکّ مزن اِنت.“

² بله اِبراما گوَشت: ”او هُداوندێن هُدا! تئو منا چے دئیئے؟ منا وَه چُکّ نێست و منی لۆگئے وارس دَمِشکی اێلیزِر اِنت.“

³ پدا گوَشتی: ”تئو منا چُکّ و پُشپَدے نداتگ و باندا رۆچ منی لۆگئے هِزمتکارے منی وارسَ بیت.“

⁴ بله هُداوندئے هبر اِبراما سر بوت که اے هِزمتکار تئیی وارسَ نبیت، تئیی جندا مَردێن‌چُکّے بیت و هما تئیی وارسَ بیت.

⁵ هُداوندا اِبرام ڈنّا بُرت و گوَشت: ”آسمانا بچار و اِستاران هساب کن، اگن هسابِش کرتَ کنئے. تئیی نَسل و پَدرێچ اِشانی پئیما بازَ بیت.“

⁶ اِبراما هُداوندئے سرا باور کرت و هُداوندا اِبرامئے اے باور، په آییا پاکی و پَلگاریے هساب کرت.

⁷ نون هُداوندا گۆن آییا گوَشت: ”من هما هُداوند آن که ترا چه کَلدانیانی شهر اورا دَرُن کرت و آورت که اے سرڈگارا ترا بدئیان و تئو اِشیئے واهند ببئے.“

⁸ بله اِبراما گوَشت: ”او هُداوندێن هُدا! من چۆن بزانان که اِشیئے واهندَ بان؟“

⁹ گڑا هُداوندا گوَشت: ”په من سئے سالیگێن مادگێن گۆکے، سئے سالیگێن بُزے، سئے سالیگێن گوَرانڈے، شانتلے و کَسانێن کپۆتے بیار.“

¹⁰ اِبراما اے سجّهێن په هُداوندا آورت و دو کپّا کرتنت و هر تَل، دومی تَلئے دێما اێر کرت، بله مُرگی کپّ نکرتنت.

¹¹ ڈونڈوارێن مُرگ که اے جۆنانی سرا نِشتنت، اِبراما گلّێنتنت.

¹² وهدے رۆچ اێر نِندَگا اَت، اِبرام گرانێن وابێا گِپت و بَزێن و تُرسناکێن تهاریێا آییئے سرا مان شانت.

¹³ گڑا هُداوندا گوَشت: ”دلجم بئے و بزان که تئیی نَسل و پَدرێچ اَنچێن سرڈگارێا دَرامَدێئے پئیما جَهمنندَ بیت که آ مُلک آیانی نه‌اِنت. تئیی اۆبادَگ اۆدا گُلامَ بنت و تان چار سد سالا زُلم و زۆراکیئے آماچَ بنت.

¹⁴ بله من، آ کئوما سِزا دئیان که تئیی نَسلا گُلامَ کنت. پدا تئیی پَدرێچ گۆن مزنێن مال و مَڈّیێا چه اۆدا درَ کئیت.

¹⁵ بله تئو وت په اێمنی وتی بُنپیرُکانی کِرّا رئوئے و شَرّێن مزنێن اُمرێا رند کَبر کنگَ بئے.

¹⁶ تئیی پَدرێچ، چارمی نَسلا اِدا پرَ ترّیت چێا که اَموریانی بَدکاری اَنگت پوره و سَرجم نبوتگ.“

¹⁷ رۆچ که اێر نِشت و تهاریا مان شانت، آسْدانے که دوتّ دئیان اَت گۆن رۆکێن مَشَلێا زاهر بوت و چه تَلانی نیاما گوَست.

¹⁸ آ رۆچا هُداوندا گۆن اِبراما اَهد و پئیمانے کرت و گوَشتی: ”چه منی نێمگا اے سرڈگار چه مِسرئے شێپا بگر تان پَراتئے مزنێن کئورا تئیی نَسل و پَدرێچئیگ اِنت،

¹⁹ بزان کَنی و کَنیزّی و کَدمونی و

²⁰ هیتّی و پِریزّی و رِپاهی و

²¹ اَموری و کَنهانی و گِرگاشی و یَبوسی مهلوکئے سرزمین.“