پێدایش 13 - هُدائے پاکێن کتاب، بلۆچی زبانا

لوت و اِبرامئے جِتایی

¹ اِبراما هرچے که هست‌اَت، زرتنتی و گۆن وتی لۆگیا چه مِسرا بُرزاد راه گِپت و نِگێبا شت. لوت هم گۆن آییا گۆن اَت.

² اِبرام، مال و دَلوَت و تلاه و نُگرها باز هستۆمند اَت.

³ آ، چه نِگێبا لَڈّان و رئوان تان بئیت‌اێلا رَسِت، تان بئیت‌اێل و ائیائے شهرانی نیاما، هما جاگها که پێسرا وتی گِدانی مِکّ کرتگ‌اَت،

⁴ هما جاگها که پێسرا کُربانجاهے اَڈّی کرتگ‌اَت. اۆدا اِبراما هُداوندئے نام تئوار کرت.

⁵ لوت هم که اِبرامئے همسپر اَت، آییا پَس و دَلوَت و گِدان هست‌اَت.

⁶ بله جاگه په لوت و اِبرامئے یکجاه نِندَگا کَمّ اَت، چێا که مال و دَلوَتِش باز اَت. پمێشکا هۆر نِشتِشَ نکرت.

⁷ اِبرام و لوتئے شپانک اَڑِتنت. آ زمانگا کَنهانی و پِریزّی هم اے سرڈگارا جَهمنند اَتنت.

⁸ گڑا اِبراما گۆن لوتا گوَشت: ”ما برات اێن. منی و تئیی نیاما، یا منی و تئیی شپانکانی نیاما اَڑ و کُڑے مبیت.

⁹ سجّهێن مُلک تئیی دێما اِنت. چه من جِتا بئے. اگن تئو چپّێن نێمگا رئوئے، من راستێنا رئوان و اگن تئو راستێن نێمگا رئوئے، من چپّێنا رئوان.“

¹⁰ لوتا چمّ چست کرتنت، دیستی که اُردُنئے سجّهێن دشت، تان سۆهرا سێراپ اِنت، هُداوندئے باگئے ڈئولا، مِسرئے سرڈگارئے ڈئولا. اے چه آ وهدا پێسر اَت که هُداوندا سُدوم و گُمورَهئے شهر گار و بێگواه کرتنت.

¹¹ گڑا لوتا اُردُنئے سجّهێن دشت په وت گچێن کرت و دێم په رۆدراتکا راه گِپت و دوێن مرد چه یکدومیا جِتا بوتنت.

¹² اِبرام کَنهانئے سرڈگارا نِشت و لوت هما شهران جَهمنند بوت که دشتا اَتنت. لوتا وتی گِدان زُرت و سُدومئے نزّیکّا مِکّ کرتنت.

¹³ سُدومئے مردم بَدکار و هُداوندئے دێما باز گُنهکار اَتنت.

اِبرام هِبرونا جَهمنندَ بیت

¹⁴ لوت که چه اِبراما جِتا بوت، هُداوندا گۆن اِبراما گوَشت: ”چه وتی همے جاگها، چمّان چست کن و شمال، جنوب، رۆدراتک و رۆنندئے نێمگا بچار،

¹⁵ اے سجّهێن مُلکا که تئو گِندگا ائے، چه منی نێمگا اے تان اَبد تئیی و تئیی نَسل و پَدرێچئیگ اِنت.

¹⁶ تئیی نَسل و پَدرێچا زمینئے دنزانی پئیما بازَ کنان، اگن کسے دنز و گُباران هساب کرتَ کنت، گڑا تئیی نَسل و پَدرێچا هم هساب کرتَ کنت.

¹⁷ پاد آ، اے مُلکئے دْراجی و پْراهیا تَرّ و گرد بکن، که اِشیا من ترا دئیان.“

¹⁸ گڑا اِبراما وتی گِدان چِست کرتنت و هِبرونا شت و مَمرِهئے مزنێن درچکانی نزّیکّا جَهمنند بوت. اۆدا په هُداوندا کُربانجاهے اَڈّی کرت.