پێدایش 11 - هُدائے پاکێن کتاب، بلۆچی زبانا

بابِلئے بُرج

¹ سجّهێن دنیائے زُبان یکّێن اَت و لبز یکّێن اَتنت.

² مردم که چه رۆدَراتکا لَڈِّتنت، شینارئے سرڈگارا دَشتے دیستِش و همۆدا جَهمنند بوتنت.

³ گۆن یکدومیا گوَشتِش: ”بیا، هِشتَ جنێن و شرّیئے سرا پچێنِش.“ آیان سِنگئے جاها هِشت کارَ بست و گِلئے جاها ڈامبر.

⁴ گوَشتِش: ”بیا په وت شهرے اَڈَّ کنێن، اَنچێن بُرجے مانی ببیت که سَرٹُلّی آسمانا سر ببیت، تانکه په وت نامے اێر بکنێن که سجّهێن زمینئے سرا شِنگ و شانگ مبێن.“

⁵ هُداوند اێر آتک تانکه هما شهر و بُرجا بچاریت که مردمی اَڈّ کنگا اَتنت.

⁶ هُداوندا گوَشت: ”اِدا بچار، نون اے یکّێن راج و کئوم اَنت و سجّهێنانی زبان یکّ اِنت. اگن اے کارِش بِندات کرتگ، چه اِد و دێم اے هرچے کنگ بلۆٹنت، په اِشان نَبوتنیَ نبیت.

⁷ بیا، جَهلادَ رئوێن و اِشانی زُبانا گَڑ و مَنجَ کنێن که اے، یکدومیئے هبران سرپد مبنت.“

⁸ هُداوندا، اے مردم چه اۆدا سجّهێن زمینئے سرا شِنگ و شانگ کرتنت و اِشان شهرئے اَڈّ کنگئے کار بند کرت.

⁹ پمێشکا آ شهرئے نام بابِل بوت که هُداوندا اۆدا سجّهێن دنیائے یکّێن زُبان گَڑ و مَنج کرت. آییا مردم چه اۆدا زُرتنت و سجّهێن زمینئے سرا شِنگ و شانگ کرتنت.

سامئے نَسل و پَدرێچ

¹⁰ سامئے نَسل و پَدرێچئے کِسّه چُش اِنت: توپّانا دو سالا رند وهدے سامئے اُمر 100 سال اَت، چه آییا اَرپَکشاد پێدا بوت.

¹¹ اَرپَکشادئے پێدائِشا رند، ساما 500 سال اُمر کرت و آییا دگه مردێن‌چُکّ و جنێن‌چُکّ هم بوت.

¹² اَرپَکشادئے اُمر 35 سال اَت که چه آییا شِلَه پێدا بوت.

¹³ شِلَهئے پێدائِشا رند، اَرپَکشادا 403 سال اُمر کرت و آییا دگه مردێن‌چُکّ و جنێن‌چُکّ هم بوت.

¹⁴ شِلَهئے اُمر 30 سال اَت که چه آییا اِبِر پێدا بوت.

¹⁵ اِبِرئے پێدائِشا رند، شِلَها 403 سال اُمر کرت و آییا دگه مردێن‌چُکّ و جنێن‌چُکّ هم بوت.

¹⁶ اِبِرئے اُمر 34 سال اَت که چه آییا پێلِگ پێدا بوت.

¹⁷ پێلِگئے پێدائِشا رند، اِبِرا 430 سال اُمر کرت و آییا دگه مردێن‌چُکّ و جنێن‌چُکّ هم بوت.

¹⁸ پێلِگئے اُمر 30 سال اَت که چه آییا رَهو پێدا بوت.

¹⁹ رَهوئے پێدائِشا رند، پێلِگا 209 سال اُمر کرت و آییا دگه مردێن‌چُکّ و جنێن‌چُکّ هم بوت.

²⁰ رَهوئے اُمر 32 سال اَت که چه آییا سِروگ پێدا بوت.

²¹ سِروگئے پێدائِشا رند، رَهوا 207 سال اُمر کرت و آییا دگه مردێن‌چُکّ و جنێن‌چُکّ هم بوت.

²² سِروگئے اُمر 30 سال اَت که چه آییا ناهۆر پێدا بوت.

²³ ناهۆرئے پێدائِشا رند، سِروگا 200 سال اُمر کرت و آییا دگه مردێن‌چُکّ و جنێن‌چُکّ هم بوت.

²⁴ ناهۆرئے اُمر 29 سال اَت که چه آییا تێرا پێدا بوت.

²⁵ تێرائے پێدائِشا رند، ناهۆرا 119 سال اُمر کرت و آییا دگه مردێن‌چُکّ و جنێن‌چُکّ هم بوت.

²⁶ تێرائے اُمر 70 سال بوت و رندا چه آییا اِبرام و ناهۆر و هاران پێدا بوتنت.

تێرائے نَسل و پَدرێچ

²⁷ تێرائے نَسل و پَدرێچئے کِسّه چُش اِنت: چه تێرایا اِبرام و ناهۆر و هاران پێدا بوتنت. چه هارانا لوت پێدا بوت.

²⁸ هارانئے پت، تێرا اَنگت زندگ اَت و هاران مان کَلدانیانی شهر اورا مُرت، همۆدا که پێدا بوتگ‌اَت.

²⁹ اِبرام و ناهۆر، دوێنان سور و سانگ کرت. اِبرامئے لۆگیئے نام سارایی اَت و ناهۆرئے لۆگیئے نام مِلکَه. مِلکَه، هارانئے جنکّ اَت و هاران، مِلکَه و یَسکاهئے پت.

³⁰ سارایی سَنٹ اَت و چُکّی نێست‌اَت.

³¹ تێرایا وتی چُکّ اِبرام و نُماسگ لوت، که هارانئے چُکّ اَت و وتی نِشار، بزان اِبرامئے جَن سارایی زُرتنت و چه کَلدانیانی شهر اورا در آتک. اے سجّهێن دێم په کَنهانئے سرڈگارا راه گپتنت، بله وهدے هارانئے شهرا رستنت، همۆدا نِشتنت.

³² تێرایا دو سَد و پنچ سال اُمر کرت و هارانا مُرت.