پێدایش 10 - هُدائے پاکێن کتاب، بلۆچی زبانا

نوهئے نَسل و پَدرێچ

¹ نوهئے چُکّ، سام و هام و یاپِتئے نَسل و پَدرێچئے کِسّه چُش اِنت: اِشان چه توپّانا رند چُکّ و بَر کرت.

یاپِت

² گومِر و ماجوج و مَدایی و یاوان و توبال و ماشِک و تیراس، یاپِتئے مردێن‌چُکّ اَتنت.

³ اَشکِناز و ریپَت و توگَرمَه، گومِرئے مردێن‌چُکّ اَتنت.

⁴ اِلیشَه و تَرشیش و کِتّیمی مردم و دۆدانیمی مردم، یاوانئے مردێن‌چُکّ اَتنت.

⁵ چه اِشان تئیاب‌دَپی مردم وتی سرڈگاران تالان بوتنت، هر یکّے گۆن وتی جندئے زُبانا، وتی کَبیلهانی هسابا، وتی کئومانی تها.

هام

⁶ کوش و مِسراییم و پوت و کَنهان، هامئے مردێن‌چُکّ اَتنت.

⁷ سِبا و هئویلَه و سَبتاه و رامَه و سَبتِکا، کوشئے مردێن‌چُکّ اَتنت. سَبا و دێدان، رامَهئے مردێن‌چُکّ اَتنت.

⁸ چه کوشا نَمرود پێدا بوت که زمینئے سرا ائولی زۆرمندێن جَنگۆل اَت.

⁹ هُداوندئے چمّان نَمرود، زرِنگێن شکاریے اَت، پمێشکا گوَشگَ بیت: ”اے مرد، هُداوندئے چمّان نَمرودئے پئیمێن مزنێن شکاریے.“

¹⁰ نَمرودئے بادشاهیئے بِندات چه بابِل، اِرِک، اَکّاد و کَلنِها بوت که شینارئے سرڈگارا اَتنت.

¹¹ آ چه اے سرڈگارا آشورا شت و اۆدا نئینئوا، رَهوبوت‌ایر، کالَه و

¹² ریسِنئے شهری اَڈّ کرتنت. ریسِن، نئینئوا و کالَهئے نیاما اِنت، کالَه مزنێن شهرے.

¹³ چه مِسراییما، لودی و اَنَمی و لِهابی و نَپتوهی مردم پێدا بوتنت و

¹⁴ پَتروسی و کَپتوری و کَسلوهی مردم، که چه کَسلوهیان، پیلِستی پێدا بوتنت.

¹⁵ کَنهانئے ائولی چُکّ سئیدون اَت و پدا هیتّی و

¹⁶ یَبوسی و اَموری و گِرگاشی و

¹⁷ هێوی و اَرکی و سینی و

¹⁸ اَروادی و سِماری و هَماتی مردم پێدا بوتنت. رندا کَنهانی کَبیله شِنگ و تالان بوتنت.

¹⁹ کَنهانئے هَدّ و سیمسر، چه سئیدونا که دێم په گِرارا رئوئے تان گَزَّها اَت و اگن دێم په سُدوم، گُمورَه، اَدمَه و سِبویما رئوئے، تان لَشاها اَت.

²⁰ هامئے نَسلئے کِسّه، آیانی کَبیله و زُبان و سرڈگار و کئومئے هسابا همِش اَت.

سام

²¹ سام که یاپِتئے مسترێن برات اَت، آییا هم مردێن‌چُکّ بوت. سام، اِبِرئے سجّهێن چُکّانی بُنپیرُک اِنت.

²² سامئے مردێن‌چُکّ، ایلام و آشور و اَرپَکشاد و لود و اَرام اَتنت.

²³ اَرامئے مردێن‌چُکّ، اوز و هول و گیتِر و ماش اَتنت.

²⁴ اَرپَکشاد، شِلَهئے پت اَت و شِلَه، اِبِرئے پت.

²⁵ اِبِرا دو مردێن‌چُکّ بوت، یکّێئے نام پێلِگ اَت، چێا که همے وهدا زمین بهر و بانگ بوت. براتئے نامی یُکتان اَت.

²⁶ یُکتان، اَلموداد و شێلپ و هَزَرماوِت و یێرَه و

²⁷ هَدورام و اوزال و دِکلَه و

²⁸ اۆبال و اَبیماێل و سَبا و

²⁹ اُپیر و هئویلَه و یوبابئے پت اَت. اے سجّهێن یُکتانئے مردێن‌چُکّ اَتنت.

³⁰ آ دَمگا که اے نندۆک اَتنت، چه مِشایا دێم په سِپارا اَت، رۆدراتکئے کۆهستگێن مُلکا.

³¹ سامئے چُکّانی کِسّه، آیانی کَبیله و زُبان و سرڈگار و کئومئے هسابا همِش اَت.

³² نوهئے مردێن‌چُکّانی کَبیله، آیانی سَر و بُنئے رِد و بندئے سرا، آیانی کئومانی هسابا همِش اَتنت. توپّانا رَند چه همِشان سجّهێن کئوم زمینئے سرا شِنگ و تالان بوتنت.