دَرگوَز 7 - هُدائے پاکێن کتاب، بلۆچی زبانا

¹ گڑا هُداوندا گۆن موسّایا گوَشت: ”بچار، من ترا په پِرئونا چۆ هُدایا کرتگ و تئیی برات هارون تئیی نبیَ بیت.

² هرچے که ترا هُکمَ کنان، هما پئیم گوَشان کن. تئیی برات هارون باید اِنت گۆن پِرئونا بگوَشیت که اِسراییلیان چه وتی مُلکا رئوگا بِلّ.

³ بله من پِرئونئے دلا سِنگَ کنان. من مِسرئے مُلکا بازێن اجبّتێن نشانی و مۆجزهے پێشَ داران،

⁴ بله پِرئون شمئے هبران گۆشَ نداریت. من وتی دستا مِسرئے هِلاپا چِستَ کنان، مِسریان گرانێن سِزا دئیان و وتی اِسراییلی کئوما رُمب رُمبا چه مِسرا کشّان.

⁵ وهدے وتی دستا مِسرئے هِلاپا چِستَ کنان و بنی اِسراییلا چه مِسریانی نیاما کشّان، نون مِسریَ زاننت که من هُداوند آن.“

⁶ موسّا و هارونا اَنچُش کرت. هما پئیما که هُداوندا هُکم داتگ‌اَتنت، آیان هما پئیما کرت.

⁷ اے وهدا که آیان گۆن پِرئونا هبر کرت، موسّائے اُمر هشتاد سال اَت و هارونئے هشتاد و سئے.

هارونئے اَسا

⁸ هُداوندا گۆن موسّا و هارونا گوَشت:

⁹ ”پِرئون که شمارا گوَشیت: ’مۆجزهے پێش بدارێت‘ گڑا تئو هارونا بگوَش: ’وتی اَسایا بزور و پِرئونئے دێما زمینا دئوری دئے.‘ اَسا مارے بیت.“

¹⁰ موسّا و هارون پِرئونئے کرّا شتنت و هما پئیما که هُداوندا هُکم داتگ‌اَتنت، هما پئیما کرتِش. هارونا وتی اَسا پِرئون و آییئے هِزمتکارانی دێما زمینا دئور دات و اَسا مارے بوت.

¹¹ گڑا پِرئونا دانا و ساهِر لۆٹاێنتنت و اے مِسری جادوگران گۆن وتی جادوا همے کار کرت.

¹² چه آیان هر یکّێا وتی اَسا زمینا دئور دات و آیانی اَسا مار بوتنت. هارونئے اَسایا آیانی اَسا وارت و اێر برتنت.

¹³ بله اَنچۆ که هُداوندا گوَشتگ‌اَت، پِرئونئے دل اَنگت سِنگ اَت و آیانی هبری گۆش نداشتنت.

ائولی کَهر: هۆن

¹⁴ هُداوندا گۆن موسّایا گوَشت: ”پِرئونئے دل سِنگ اِنت و مردمان رئوگا نئیلیت.

¹⁵ سُهبا که پِرئون آپئے کرّا رئوت، تئو برئو و نیلّئے کئورئے لمبا آییئے راهئے سرا بۆشت و مار بوتگێن اَسایا دستا کن.

¹⁶ گۆن پِرئونا بگوَش: ’هُداوندا، بزان اِبرانیانی هُدایا منا تئیی کرّا راه داتگ که ترا بگوَشان: ”منی مهلوکا بِلّ که گیابانا رئوت و منا پرستشَ کنت،“ بله تئو اَنگت گۆش دارگا نه‌ائے.

¹⁷ هُداوند چُشَ گوَشیت که تئوِ پِرئون چه اے نِشانیا زانئے که من هُداوند آن: بِچار، اے اَسا که منِ موسّائے دستا اِنت، من اِشیا کئورئے آپا جنان و آپ هۆن جۆڑَ بنت.

¹⁸ کئورئے ماهیگَ مرنت، کئور بۆَ کنت و مِسری کئورئے آپا وارتَ نکننت.‘“

¹⁹ هُداوندا گۆن موسّایا گوَشت: ”هارونا بگوَش: ’وتی اَسایا دستا کن و دستا مِسرئے آپانی سرا شهار دئے، آیانی کئورانی سرا، آیانی جۆانی سرا، آیانی تَلاوَگانی سرا و آیانی سجّهێن آپجلّانی سرا. اِشانی تهئے سجّهێن آپ هۆن جۆڑَ بنت. سجّهێن مِسرئے مُلک هۆنا پُرَّ بیت، آپدان هم چه هۆنا پُرَّ بنت.‘“

²⁰ موسّا و هارونا هما پئیما کرت که هُداوندا هُکم داتگ‌اَتنت. هارونا پِرئون و هِزمتکارانی چمّانی دێما وتی اَسا چست کرت و کئورئے آپانی سرا جت. کئورئے سجّهێن آپ هۆن جۆڑ بوتنت.

²¹ کئورئے ماهیگ مُرتنت، کئورا بۆ کرت و مِسریان کئورئے آپ وارت نکرت. سجّهێن مِسرئے مُلکا هۆن تچگا اَت.

²² بله مِسری جادوگران هم گۆن وتی جادوا همے کار کرت و هما پئیما که هُداوندا گوَشتگ‌اَت، پِرئونئے دل سِنگ اَت و موسّا و هارونئے هبری گۆش نداشتنت.

²³ پِرئونا پُشت مان دات و وتی کلاتا شت و اے گپّی هچّ مان نئیاورت.

²⁴ سجّهێن مِسریان په ورگی آپا کئورئے کَش و کرّان کانیگ جنَگ بندات کرت، چێا که کئورئے آپِش وارتَ نکرت.

دومی کَهر: پُگُل

²⁵ چه آ وهدا که هُداوندا نیلّئے کئورئے سرا اے کَهر دئور دات، هپت رۆچ گوَست.