دَرگوَز 6 - هُدائے پاکێن کتاب، بلۆچی زبانا

اِسراییلئے نِجات

¹ هُداوندا گۆن موسّایا گوَشت: ”نون تئو گندئے که من گۆن پِرئونا چے کنان. پِرئون منی زۆرمندێن دستا که گِندیت، مهلوکا رئوگا کِلّیت. هئو، منی زۆرمندێن دستا که گِندیت، آیان چه وتی مُلکا گَلّێنیت.“

² هُدایا گۆن موسّایا هبر کرت، گوَشتی: ”من هُداوند آن.

³ من که اِبراهێم و اِساک و آکوبئے دێما زاهر بوتان، من وتی نام ’پُرواکێن هُدا‘ کرت. من آ هال نداتنت که منی نام ’یَهوِه‘ اِنت.

⁴ من گۆن آیان اَهد و پئیمان هم کرت که کَنهانئے مُلکا شمارا دئیان، بزان هما مُلکا که اۆدا آ، دَرامدئے پئیما نِشتگ‌اَتنت.

⁵ من دیستگ که مسریان اِسراییلی گُلام کرتگ‌اَنت و اسراییلی چه اے گُلامیا نالَگا اَنت. من اے نالَگ اِشکتگ‌اَنت و وتی اَهد و پئیمانئے یاتا کپتگان.

⁶ پمێشکا منی اے پئیگاما اِسراییلیان سَر کن: ’من هُداوند آن. من شمارا چه مِسریانی بیگاریا کشّان و چه گُلامیا آزاتَ کنان. دستا شهارَ دئیان، مِسریان گرانێن سِزا دئیان و شمارا مۆکان.

⁷ من شمارا زوران و وتی کئومَ کنان و شمئے هُدا بان. گڑا شما زانێت که من شمئے هُداوندێن هُدا آن، هما که شمارا چه مِسریانی بیگاریا دری کرتگ.

⁸ من شمارا هما مُلکا بران که وتی دستُن چِست کرت و سئوگندُن وارت که اِبراهێم و اِساک و آکوبا دئیانی. من آ مُلکا شمارا دئیان که شمئے جندئے مِلکت ببیت. من هُداوند آن.‘“

⁹ موسّایا گۆن اِسراییلیان اے هبر کرتنت، بله وتی پرُشتگێن اَرواه و گرانێن زهمتانی سئوَبا موسّائے هبرِش گۆش نداشت.

¹⁰ هُداوندا گۆن موسّایا گوَشت:

¹¹ ”برئو و مِسرئے بادشاه پِرئونا بگوَش که اِسراییلیان چه وتی مُلکا رئوگا بِلّ.“

¹² بله موسّایا گۆن هُداوندا گوَشت: ”منی هبر اِسراییلیان گۆش نداشتگ‌اَنت، گڑا پِرئونِش چۆن گۆشَ داریت؟ من وَه کُنٹ‌بئیانێن مردمے آن.“

¹³ هُداوندا گۆن موسّا و هارونا هبر کرت و هُکم داتنت که گۆن اِسراییلیان و گۆن مِسرئے بادشاه پِرئونا هبر بکنێت و اِسراییلیان چه مِسرئے مُلکا بکَشّێت.

موسّا و هارونئے بێه و بُنیاد

¹⁴ اِسراییلیانی کَبیلهانی سر و مستر اِش اَنت: اِسراییلئے ائولی چُکّ روبِنئے مردێن‌چُکّ هَنوک و پَلّو و هِسرون و کَرمی اَتنت. روبِنئے ٹَکّ همِش اَتنت.

¹⁵ شَمونئے مردێن‌چُکّ یَموێل و یامین و اوهَد و یاکین و سۆهَر و شاوول اَتنت. شاوولئے مات کَنهانیے اَت. شَمونئے ٹَکّ همِش اَتنت.

¹⁶ لاویئے مردێن‌چُکّانی نام، آیانی پێدائشئے رِد و بندئے هسابا اِش اَنت: گِرشۆن و کُهات و مِراری. لاویا 137 سال اُمر کرت.

¹⁷ گِرشۆنئے مردێن‌چُکّ لِبنی و شِمّی اَتنت، وتی ٹَکّانی هسابا.

¹⁸ کُهاتئے مردێن‌چُکّ اَمرام و اِسار و هِبرون و اُزّێل اَتنت. کُهاتا 133 سال اُمر کرت.

¹⁹ مِراریئے مردێن‌چُکّ مَهلی و موشی اَتنت. لاویئے ٹَکّ، آیانی پێدائشئے رِد و بندئے هسابا همِش اَتنت.

²⁰ اَمراما گۆن وتی پتئے گُهار یوکِبێدا سور کرت و هارون و موسّا چه یوکِبێدا پێدا بوتنت. اَمراما 137 سال اُمر کرت.

²¹ اِسارئے مردێن‌چُکّ کۆرا و نِپِگ و زِکری اَتنت.

²² اُزّێلئے مردێن‌چُکّ میشاێل و اِلساپان و سِتری اَتنت.

²³ هارونا گۆن اِلیشِبَها سور کرت. اِلیشِبَه اَمینادابئے جنکّ اَت و نَهشونئے گُهار. هارونئے مردێن‌چُکّ ناداب و اَبیهو و اِلیازَر و ایتامار چه اِلیشِبَها پێدا بوتنت.

²⁴ کۆرائے مردێن‌چُکّ اَسّیر و اِلکانا و اَبیاساپ اَتنت. کۆراییانی ٹَکّ همِش اَتنت.

²⁵ هارونئے مردێن‌چُکّ اِلیازَرا گۆن پوتیهێلئے جنێن‌چُکّێا سور کرت و چه اے جنکّا پینِهاس پێدا بوت. لاویانی سر و مستر همِش اَتنت، وتی ٹَکّانی هسابا.

²⁶ همے هارون و موسّا اَتنت که هُداوندا گۆن آیان گوَشت: ”اِسراییلیان چه مِسرا رُمب رُمبا بکشّێت.“

²⁷ اے دوێنان، همے موسّا و هارونا گۆن مِسرئے بادشاه پِرئونا هبر کرت که اِسراییلی چه مِسرا آزات کنگ ببنت.

په پِرئونا هُدائے هُکم

²⁸ آ رۆچا که هُداوندا مِسرئے مُلکا گۆن موسّایا هبر کرت،

²⁹ چُشی گوَشت: ”من هُداوند آن، هرچے که ترا گوَشان، مِسرئے بادشاه پِرئونا بگوَشِش.“

³⁰ بله موسّایا گۆن هُداوندا گوَشت: ”من کُنٹ‌بئیانێن مردمے آن، پِرئون چۆن منی هبران گۆشَ داریت؟“