دَرگوَز 35 - هُدائے پاکێن کتاب، بلۆچی زبانا

شَبَّتئے کانون

¹ موسّایا اِسراییلئے سجّهێن مهلوک مُچّ کرت و گۆن آیان گوَشتی: ”اِش اَنت هما کار که هُداوندا شمارا اِشانی کنگئے هُکم داتگ:

² شش رۆچا کار کنێت، بله هپتمی رۆچ شَبَّت اِنت، په شما پاکێن رۆچے و آرام کنگئے رۆچ اِنت. اے رۆچا په منِ هُداوندا وَپْک کنێت. هرکَسا شَبَّتئے رۆچا کار کرت، آییئے سِزا مَرک اِنت.

³ شَبَّتئے رۆچا وتی لۆگ و مێتگان آس رۆک مکنێت.“

تَمبوئے اَڈّ کنگئے چِن و لانچ

⁴ موسّایا گۆن سجّهێن اِسراییلی مهلوکا گوَشت: ”اے هما هُکم اِنت که هُداوندا داتگ:

⁵ چه وتی مال و هستیا په هُداوندا شُگرانه پێش بکنێت. شُگرانه هما کَس بدنت که دلیَ پرماییت. په هُداوندا اے چیزّان بیاریت: تلاه و نُگره و بْرنج،

⁶ آسمانی و جَمو و سُهرێن پَژم، شَرّێن لیلُم، بُزئے مود،

⁷ گوَرانڈئے رَتکگێن سُهرێن پۆست، دگه پئیمێن مُهرێن پۆست، چِگردئے دار،

⁸ په چراگان ٹێل، په پِر مُشَگی رۆگن و وشبۆێن سۆچُکیا مَساله و

⁹ په اێپۆد و سێنَگ‌پۆشا سِنگِ سُلئیمان و دگه گران‌کیمّتێن سِنگ.

¹⁰ شمئے سجّهێن هُنَرمند بیاینت و اے سجّهێن چیزّان اَڈّ بکننت که هُداوندا هُکم داتگ:

¹¹ شاهِدیئے تَمبوا گۆن تۆکی تَمبو و پۆش و کَڑی و مِکّ کنگی تَهتَگ و گوَربَست و مِنُک و بُنهِشتان،

¹² پێتیا گۆن گوَرباسک و کَپارَتئے سرپۆش و پێتیئے دێما لۆنجانێن پردها،

¹³ ٹێبَلا گۆن گوَرباسک و سجّهێن سامان و پاکوَنڈێن نگنان،

¹⁴ په رُژناییا، چِراگدانا گۆن چراگ و ٹێل و سجّهێن سامانان،

¹⁵ بۆسۆچی کُربانجاها گۆن گوَرباسک و پِر مُشَگی رۆگن و وشبۆێن سۆچُکیان، شاهِدیئے تَمبوئے دپئے پردها،

¹⁶ سۆچَگی کُربانیگئے کُربانجاها گۆن بْرِنجێن جالی و گوَرباسک و سجّهێن سامانان، بْرِنجێن ترَشتا گۆن پادَگا،

¹⁷ پێشگاهئے پردهان گۆن تَهتَگ و بُنهِشتان، پێشگاهئے دپئے پردها،

¹⁸ تَمبوئے مێه و پێشگاهئے مێه و سادان،

¹⁹ دینی پێشوا که پاکێن جاگها رئونت و هِزمتَ کننت، په آیان دَزگواپێن گُد، په دینی پێشوا هارونا پاکێن گُد و په آییئے مردێن‌چُکّان گُد که دینی پێشوایی کنگئے وهدا گوَرااِش بکننت.“

²⁰ گڑا اِسراییلیانی سجّهێن مهلوک چه موسّائے کرّا در آتک و

²¹ هرکَس که دلا پرمات و اَرواها سِکێن دات، آییا په شاهدیئے تَمبوئے کاران، په سجّهێن هِزمتی کاران و په پاکێن گُدان شُگرانهَ آورت.

²² جنێن و مردێنَ آتکنت. هرکَس که دلا پرمات، آییا ٹاسین و نالُک و مُندریکّ و هار، هر تَهرێن سَهت و زێوَرَ آورت. هر مردما تلاهئے ٹێکیَ آورت و په هُداوندا چست کنگی کربانیگَ کرتنت.

²³ هرکَسئے کِرّا که آسمانی و جَمو و سُهرێن پَژم یا شَرّێن لیلُم، بُزئے مود، گوَرانڈئے رَتکگێن سُهرێن پۆست یا دگه مُهکمێن پۆست هست‌اَت، آورتی.

²⁴ هرکَسا که نُگره و بْرنجئے شُگرانهے داتَ کرت، په هُداوندا آورتی و هرکَسئے کِرّا که چِگردئے دار هست‌اَت، آورتی که په تَمبوئے یکّ نه یکّ بَهرێا کار بِدنت.

²⁵ سجّهێن هُنرمندێن جنێنان جَلّکئے کار دستا کرت و اے چیزِّشَ گوَپت و آورتنت: آسمانی و جَمو و سُهرێن پَژم و شَرّێن لیلُم.

²⁶ آ سجّهێن کارزانتێن جنێن که دلا پرماتنت، پَسئے مودِشَ زرت و جَلّکئے کارِشَ کرت.

²⁷ مهلوکئے سرۆکان په اێپۆد و سێنَگ‌پۆشا سِنگِ سُلئیمان و دگه گران‌کیمّتێن سِنگَ آورت.

²⁸ په چراگانی رۆک کنگا و په پِر مُشَگی رۆگنا و په وشبۆێن سۆچُکیانی اَڈّ کنگا مَساله و ٹێلِش هم آورت.

²⁹ اِسراییلئے هر جنێن و مردێنے که دلا پرمات، آییا په هُداوندا هما ٹێکیَ آورت که دلا گوَشت، په اے سَرجمێن کارا که هُداوندا موسّائے وَسیلها هُکم داتگ‌اَت.

بِسَلێل و اُهولیاب

³⁰ موسّایا گۆن اِسراییلیان گوَشت: ”بچارێت، هُداوندا چه یَهودائے کَبیلها اوریئے مردێن‌چُکّ، اَهورئے نُماسگ بِسَلێل گچێن کرتگ و

³¹ چه هُدائے روها پُرّ کرتگ و اَگل و پَهم و زانت و هر کِسمێن دستئے هُنَر بَکشاتگ.

³² په تلاه و نُگره و بْرِنجئے سامانانی سرا نَکشئے سازگا،

³³ په سِنگئے تراشگ و نادێنگا و په دارئے آجِنَگ و دگه هر پئیمێن اِزمکاریا هُنَری بَکشاتگ.

³⁴ هُداوندا بِسَلێل و دانئے کَبیلهئے اُهولیابِ اَهیسامَک سِکّارێنَگئے لاهکی هم داتگ‌اَنت.

³⁵ هُداوندا اِشانا په هر پئیمێن کارا هُنَر بَکشاتگ، په هما سجّهێن کاران که آجِنۆکِشَ کننت و اِزمکارِش آسمانی و جَمو و سُهرێن پَژم و شَرّێن لیلُمئے سرا گوَپنت و دۆچنت، بزان هر کارے که بَلدێن اِزمکارَ کننت.“