دَرگوَز 3 - هُدائے پاکێن کتاب، بلۆچی زبانا

رۆکێن ڈۆلُک

¹ موسّا وتی ناکۆ، میدیانئے دینی پێشوا یَترونئے رمگا چارێنگا اَت. رمگی زرت و گیابانئے آ دستا، هۆرێبا، بزان هُدائے کۆها شُت.

² هُداوندئے پرێشتگ چه ڈۆلُکێئے نیاما، آسئے شَمالَهێئے تها آییئے دێما زاهر بوت. موسّایا دیست که ڈۆلُک بُن اِنت، بله سُچَگ و پُر بئیگا نه‌اِنت.

³ موسّایا گوَشت: ”رئوان و اے اجبێن نِدارَگا چاران که بارێن ڈۆلُک چێا سُچگ و پُر بئیگا نه‌اِنت.“

⁴ هُداوندا دیست که موسّا اے نِدارگئے چارگا پێداک اِنت. هُدایا چه ڈۆلُکئے تها گْوانک جت: ”موسّا، او موسّا!“ موسّایا پَسّئو دات: ”جی!“

⁵ هُدایا گوَشت: ”نزّیکتر مئیا. وتی سواسان کَشّ که اے جاگها که تئو اۆشتاتگئے، اے پاکێن جاگهے.“

⁶ هُدایا پدا گوَشت: ”من تئیی پتئے هُدا آن، اِبراهێمئے هُدا، اِساکئے هُدا و آکوبئے هُدا آن.“ موسّایا هُدائے چارگ تُرست و وتی دێمی گِپت.

⁷ هُداوندا گوَشت: ”منی مهلوک که مِسرا اِنت، من آیانی بزّگی شَرّیا دیستگ. من دیستگ که وتی بیگارگیرانی سئوَبا چۆن پِریاتَ کننت. آیانی دردان شَرّیا زانان.

⁸ من اێر آتکگان که آیان چه مِسریانی دستا برَکّێنان و چه اے مُلکا، شَرّێن و پراه و شاهِگانێن مُلکێا ببَران، اَنچێن مُلکێا که اۆدا شیر و بێنَگئے جۆ تچگا اَنت، کَنهانی و هیتّی و اَموری و پِریزّی و هێوی و یَبوسیانی مُلکا.

⁹ بچار، بنی اِسراییلیانی پریات منی کرّا سر بوتگ، من هما زُلم هم دیستگ‌اَنت که مِسری آیانی سرا کننتِش.

¹⁰ برئو، من ترا پِرئونئے کرّا راهَ دئیان، منی کئوم بنی اِسراییلا بزور و چه مِسرا در آ.“

¹¹ بله موسّایا گۆن هُدایا گوَشت: ”من کئے آن که پِرئونئے کرّا برئوان و بنی اِسراییلا بزوران و چه مِسرا در بیایان؟“

¹² هُدایا گوَشت: ”من گۆن تئو گۆنَ بان. تئو که کئوما زورئے و چه مِسرا درَ کائے، شما همے کۆها هُدائے پرستشا کنێت. و اے یکّ نِشانیے بیت که تئیی راه دئیۆک من آن.“

¹³ موسّایا گۆن هُدایا گوَشت: ”اگن من بنی اِسراییلئے کرّا برئوان و بگوَشان که شمئے بُنپیرکانی هُدایا منا شمئے کرّا راه داتگ و آ چه من جُست بکننت که آییئے نام کئے اِنت، آیانی پسّئوا چے بگوَشان؟“

¹⁴ هُدایا گوَشت: ”من هما آن که هَستان. گۆن بنی اِسراییلا بگوَش که هما که نام اِنتی ’من هما آن‘، هماییا منا شمئے کرّا راه داتگ.“

¹⁵ هُدایا گۆن موسّایا اے هم گوَشت: ”گۆن بنی اِسراییلا بگوَش که ’یَهوِه‘، بزان شمئے بُنپیرکانی هُدا، اِبراهێمئے هُدا، اِساکئے هُدا و آکوبئے هُدایا منا شمئے کرّا راه داتگ. تان اَبد منی نام همِش اِنت و من نَسلانی نَسل همے ناما یات کنگَ بان.

¹⁶ برئو اِسراییلئے کماشان یکجاه کن و گۆن آیان بگوَش که هُداوند، بزان شمئے بُنپیرکانی هُدا، اِبراهێم و اِساک و آکوبئے هُدا منی دێما زاهر بوتگ و گۆن من گوَشتگی که من چه نزّیکّا دیستگ که مِسرا گۆن شما چے بوتگ و

¹⁷ من کئولَ کنان که شمارا چه اے بزّگیا درَ کنان که مِسرا شمئے سرا آتکگ و شمارا کَنهانی و اَموری و پِریزّی و هێوی و یَبوسیانی مُلکا بَران، هما مُلکا که شیر و بێنگئے جۆ تچگا اَنت.

¹⁸ اِسراییلئے کماش تئیی هبران گۆشَ دارنت. شما هۆریگا مِسرئے بادشاهئے کرّا برئوێت و گۆن آییا بگوَشێت که هُداوند، بزان اِبرانیانی هُدا مئے دێما زاهر بوتگ. نون مارا رَزا بدئے که ما گیابانا سئے رۆچئے راها رئوێن و په وتی هُداوندێن هُدایا کُربانیگَ کنێن.

¹⁹ بله منَ زانان که تان زۆرمندێن دستے مِسرئے بادشاها مجبور مکنت، آ شمارا رئوگا نئیلیت.

²⁰ من وتی دستا شهارَ دئیان و مِسرا گۆن وتی هما سجّهێن اَجَبَّتێن کارانَ جنان که منِش آیانی نیاما کنان. گڑا پِرئون شمارا رئوگا کِلّیت.

²¹ من مِسریانی دلا په اے کئوما نَرمَ تَرّێنان و وهدے شما رئوێت، چه مِسرا گۆن هۆرک و هالیگێن دستانَ نرئوێت.

²² هر جنێن چه وتی همساهگێن جنێن و چه آییئے لۆگا نندۆکێن جنێنا گُد و پُچّ و نُگره و تِلاهئے سَهت و زێوَر بلۆٹیت و وتی بَچّ و جنکّانی گوَرااِش بدنت. اے پئیما شما مِسریانی مال و هستیا پُلێت.“