دَرگوَز 27 - هُدائے پاکێن کتاب، بلۆچی زبانا

سۆچَگی کُربانیگانی کُربانجاه

¹ چه چِگردئے دارا کُربانجاهے اَڈّ کن. دْراجی و پْراهیا پَنچ پَنچ دَست ببیت. کُربانجاه چارکُنڈ ببیت. بُرزیا سئے دَست ببیت.

² کُربانجاهئے چارێن کُنڈانی سرا یکّ و یکّ کانٹے اَڈّ کن. کانٹان و کُربانجاها جتا جتا اَڈّ مکن، اے یَک‌ٹُکُّر ببنت. کُربانجاها گۆن بْرِنجا سرپۆش کن.

³ کُربانجاهئے پُرانی در کنگئے تَگاری و بَرد و تاس و چارشاه و آسدان، سجّهێن سامانانی چه بْرِنجا اَڈّ کن.

⁴ په کُربانجاها جالیے، بزان بْرِنجئے ٹَٹے اَڈّ کن و په اِشیئے چارێن کُنڈان چه بْرِنجا چار کَڑی اَڈّ کن.

⁵ جالیا کُربانجاهئے تۆکی لَمبانی چێرا پِر کن و اَنچۆ اێری کن که کُربانجاهئے بُرزیئے نێما سَر ببیت.

⁶ چه چِگردئے دارا په کُربانجاها گوَرباسک اَڈّ کن و گۆن بْرِنجا سرپۆشِش کن.

⁷ گوَرباسکان چه کَڑیان گوازێن که کُربانجاهئے چست کنگئے وهدا کُربانجاهئے دوێن کَشان ببنت.

⁸ کُربانجاها چه دارئے تَهتَگا اَڈّ کن. تۆکی بِلّ که هۆرک و هالیگ اِنت. هما پئیما اَڈّی کن که من ترا کۆهئے سرا پێش داشت.

شاهِدیئے تَمبوئے پێشگاه

⁹ په شاهِدیئے تَمبوا پێشگاهے اَڈّ کن. په پێشگاهئے جنوبی نێمگا چه هورت‌گواپێن لیلُما پرده اَڈّ کن که سَرجمیا یکّ سَد دَست ببنت.

¹⁰ گۆن بیست مِنُک و بیست بْرِنجێن بُنهِشتا اَڈِّش کن. مِنُکانی بند و کَڑی نُگرهئے ببنت.

¹¹ شمالی نێمگ هم همے پئیما ببیت. پرده سَرجمیا یکّ سَد دَست ببنت، گۆن بیست مِنُک و بیست بْرِنجێن بُنهِشتا. مِنُکانی بند و کَڑی نُگرهئے ببنت.

¹² پێشگاهئے رۆنِندی نێمگئے پرده سَرجمیا پنجاه دَست ببنت، گۆن دَه مِنُک و دَه بُنهِشتا.

¹³ پێشگاهئے رۆدراتکی نێمگئے پرده، هما نێمگ که رۆچ درَ کئیت، پنجاه دَست ببنت.

¹⁴ پێشگاهئے دپئے یکّ نێمگێئے پرده سَرجمیا پانزدَه دَست ببنت، گۆن سئے مِنُک و سئے بُنهِشتا،

¹⁵ و دپئے آ دگه نێمگئے پرده هم پانزدَه دَست ببنت، گۆن سئے مِنُک و سئے بُنهِشتا.

¹⁶ په پێشگاهئے دپا پردهے اَڈّ کن که سَرجمیا بیست دَست ببیت، گۆن چار مِنُک و چار بُنهِشتا. اے پرده چه آسمانی و جَمو و سُهرێن پَژم و چه هورت‌گواپێن لیلُما اَڈّ ببیت و رنگ‌گواپ ببیت.

¹⁷ پێشگاهئے چپّ و چاگردئے سجّهێن مِنُکانی بند و کَڑی نُگرهئے ببنت و بُنهِشت بْرِنجئے.

¹⁸ پێشگاهئے دْراجی یکّ سَد دَست ببیت، پْراهی پنجاه دَست و بُرزی پنچ دَست ببیت. گۆن هورت‌گواپێن لیلُمئے پرده و بْرِنجێن بُنهِشتان اَڈّ کنگ ببیت.

¹⁹ تَمبوئے آ دگه سامان، په تَمبوئے هر کارێا که کارمرزَ بنت، چه بْرِنجا اَڈّ کنگ ببنت. تَمبوئے و پێشگاهئے سجّهێن مێه هم چه بْرِنجا اَڈّ کنگ ببنت.

چراگانی ٹێل

²⁰ تئو اِسراییلیان هُکم دئے که زئیتون بپْرِنچێت و زَگرێن ٹێل در کنێت و په چراگان بیارێت که چراگ هر وهدا رۆک ببنت.

²¹ شاهِدیئے تَمبوئے تها، چه هما پردها ڈَنّ که شاهِدیئے پێتیئے دێما اِنت، هارون و آییئے مَردێن‌چُکّ، بزان دینی پێشوا هُداوندئے بارگاها شپا تان سُهبا چراگان رۆک بدارنت. اے په اِسراییلیانی آیۆکێن نَسل و پَدرێچان اَبدمانێن پَرمانے.