دَرگوَز 17 - هُدائے پاکێن کتاب، بلۆچی زبانا

چه تَلارا آپئے دَر آیگ

¹ هما پئیما که هُداوندا هُکم داتگ‌اَت، سجّهێن اِسراییلی مهلوک چه سینئے گیابانا رهادگ بوت و داران و رئوانا شت و رِپیدیما اُردی کرت، بله اۆدا آپ نێست‌اَت که مردم بوَرنت.

² مردم گۆن موسّایا اَڑِتنت، گوَشتِش: ”مارا آپ بدئے که بوَرێن.“ موسّایا گوَشت: ”چێا گۆن من اَڑگا اێت؟ چێا هُداوندا چَکّاسێت؟“

³ بله مردم اۆدا تُنّیگ اَتنت، آیان موسّائے سرا نُرُنڈِت و گوَشت: ”تئو چێا مارا چه مِسرا در کرت و آورت؟ که مارا و مئے چُکّان و مال و دَلوَتان چه تُنّا بکُشئے؟“

⁴ موسّایا هُداوندئے کرّا پریات کرت و گوَشت: ”اے مهلوکا چۆن بکنان؟ اے وَه په منی سِنگسار کنگا اۆشتاتگ‌اَنت.“

⁵ هُداوندا گۆن موسّایا گوَشت: ”اِسراییلئے لهتێن کماش همراه کن و چه مهلوکئے دێما گوَزان کن. هما اَسا که تئو گۆن آییا نیلّئے کئور جت، آییا دستا کن و برئو.

⁶ بچار، اۆدا هُرێبا تئیی دێما من تَلارێئے سرا اۆشتان. گۆن اَسایا تلارا بجن، په مهلوکا ورَگی آپ درَ کئیت.“ گڑا موسّایا اِسراییلئے کماشانی چمّانی دێما اَنچُش کرت.

⁷ آییا آ جاگهئے نام مَسَّه و مِریبَه کرت، چێا که اۆدا اِسراییلی اَڑِتنت و هُداوندِش هم چکّاست و گوَشتِش: ”بارێن هُداوند گۆن ما گۆن اِنت یا نه؟“

اَمالیکیانی پرۆش

⁸ اَمالیکی آتکنت و رِپیدیما گۆن اِسراییلیان جنْگِش کرت.

⁹ موسّایا گۆن یوشایا گوَشت: ”لهتێن مَرد گچێن کن و برئو، گۆن اَمالیکیان جنگ کن. باندا من هُدائے اَسایا دستا کنان و جُمپئے سرا اۆشتان.“

¹⁰ یوشایا هما پئیما کرت که موسّایا گوَشتگ‌اَت و گۆن اَمالیکیان جنگی کرت. موسّا و هارون و اَهور جُمپا سر کپتنت.

¹¹ هر وهدا که موسّایا دست چستَ کرتنت، اِسراییلی بالادستَ بوتنت و هر وهدا که وتی دستی جَهلَ کرتنت، اَمالیکی بالادستَ بوتنت.

¹² موسّائے دستان دَم برت. هارون و اَهورا سِنگے آورت و آییئے چێرا دات. موسّا سِنگئے سرا نِشت. آیان موسّائے دست گِپت و بُرز داشتنت، یکّێا راستێن دست و دومیا چَپّێن دست. اے پئیما موسّائے دست تان رۆنندئے وهدا جَهل نکپتنت و

¹³ یوشایا اَمالیکی پئوج په زَهم پرۆش دات.

¹⁴ هُداوندا گۆن موسّایا گوَشت: ”اے کِسّها کتابێا نبشته کن که شَمۆشگ مبیت. اے کِسّها یوشائے کِرّا بیار. چێا که من اَمالیکئے نام و نِشانا چه جهانا سَرجمیا گارَ کنان.“

¹⁵ موسّایا کُربانجاهے اَڈّ کرت و آییئے نامی کرت ”هُداوند منی بئیرَک اِنت“.

¹⁶ گوَشتی: ”منا هُداوندئے بادشاهی تَهتئے سئوگِند اِنت که هُداوند نَسلانی نَسل گۆن اَمالیکیان جنگَ کنت.“