په تِسالونیکیان پولُسئے ائولی کاگد 3 - هُدائے پاکێن کتاب، بلۆچی زبانا

¹ پمێشکا وهدے ما گێشتر سَگّت نکرت، ما شئور کرت که من و سیلوانوس آتِنئے شهرا دارێن و

² مئے برات تیموتاووس که هُدائے راها مَسیهئے وشّێن مِستاگئے شِنگ کنگئے کارا مئے همکار اِنت، آییا دێمَ دئیێن که شمئے ایمانا مُهرتِر بکنت و شمارا دِلبڈّی بدنت

³ تانکه هچکَس اے سَکّی و سۆریانی تها ملَرزیت. چێا که شما وتَ زانێت که سَکّی و سۆری الّم مئے راها کاینت.

⁴ وهدے شمئے کِرّا اَتێن، ما شمارا چه پێسرا گوَشت که ماشُما آزار دئیگَ بێن و اَنچُش بوت، شما شرّیا زانێت.

⁵ پمێشکا، وهدے من گێشتر سَگِّت نکرت، په شمئے ایمانئے هالئے گِرگا یکّے دێمُن دات. منا ترست که بلکێن چَکّاسۆکێن شئیتانا وڑے نه وڑێا شمارا چَکّاسا دئور داتگ و مئے جُهد مُپت و ناهودگ بوتگ.

تیموتاووسئے آورتگێن وشّێن هال

⁶ بله تیموتاووس نۆکی چه شمئے کِرّا واترّ بوتگ و مئے کرّا آتکگ و شمئے باور و مِهرئے بارئوا وشّێن هالے گۆن اِنتی. مارا گوَشتی که شما مُدام مارا په شَرّی یاتَ کنێت و شمارا په مئے دیدارا زهیرَ کنت، اَنچُش که مارا په شما زهیرَ کنت.

⁷ اِشیئے سئوَبا، او براتان، مارا وتی سجّهێن جنجال و آزارانی تها شمئے بارئوا دلجمی رست، شمئے ایمانئے سئوَبا.

⁸ نون ما آراما نِشتَ کنێن که شما هُداوندئے راها مُهر اۆشتاتگێت.

⁹ ما په شما هُدائے همینچُک شُگرا بگرێن هم کَمّ اِنت، چێا که ما شمئے سئوَبا هُدائے بارگاها سکّ گَل اێن.

¹⁰ ما شپ و رۆچ چه دلئے جهلانکیا دْوا کنێن که شمارا پدا بگِندێن و هر چیزّے که شمئے ایمانئے تها کَمّ اِنت، آییا سرجم بکنێن.

¹¹ نون مئے هُداێن پتئے جند و مئے هُداوندێن ایسّا مئے راها پچ کنات که ما شمئے کرّا بیاێن.

¹² هُداوند شمئے مِهرا په یکدومیا و په سجّهێنان گێش کنات، شمئے دل چه مهرا سررێچ بات هما پئیما که په شما مئے دل چه مِهرا سررێچ اِنت.

¹³ هُداوند شمئے دلا مُهر و مُهکم کنات که وهدے مئے هُداوندێن ایسّا گۆن وتی سجّهێن پَلگارتگێنانَ کئیت، شما مئے هُداێن پتئے بارگاها بےائیب و پاک و پَلگار ببێت.