Santiago 5 - Kaxinawá Bíblia (BR)

Mabuwãyãbu haskashanaibu bebũkiri hatu yuinikiaki, na hãtxarã

¹ Mabuwãyãbuũ, haska kaĩbiranaya mei kashai saĩ iki mã nuitapashanaikiri matu yuinũ nĩkakãwẽ.

² Natiã mabu inũ pei itxapa inũ, tari pepa mã hayaki. Hakia matũ pei yamaya matũ tari hawẽrua hawẽ masãnẽ pikĩ pesa pesa akĩ keyuriashanikiki.

³ Ha inũ, matũ ouro pei heshe inũ matũ prata pei heshe itxapabiakẽ tsua merabewakĩ hatu inãma mã aru bestikubaĩmis pui itxai keyushanikiki. Jesus ana huriamakẽ natiã matũ pei mã itxa wamiswẽ taea Jesus ana ma hua kemaya ha mane pui itxai habai ha matuki txaniai keskaya hawẽ taeshũ Deusũ txi keskawẽ matu yama washanikiki.

⁴ Haskashanikiki. Nĩkairakãwẽ. Dayakapabu hatu dayamakĩ matũ bai hatu urumakĩ hatu parãkĩ haska wakĩ mã hatu beshpa betximis yuiaibu nukũ Epa Deus kuxipahairatũ hatu nĩkamiski. Ha inũ, matũ yunu matu tsekashũ mãtxĩshũmisbũ haska mã hatu pakama yui matuki ha ikaibu nĩkariamiski, Epa Deusunã.

⁵ Na mai anu yura mabuwãyã hiwearã, matũ mã uĩtirubuki. Hatiriburã, eska bestiwẽ hiweabuki. Tari hawẽrua sawea inũ, mabu hawẽrua besti haya hawẽ besti kemuaiburã, ina awa pitxakayama shuarãwã nia keska ma hanu dete kemabu keska mã hiweabuki.

⁶ Matunã, haratubũra hawa matu txakabuwaisbuma betsabu tenãkĩ itxapabu mã hatu itxakawamiski, habũ hawa matu nemakĩ yuiabumarã.

Hawara bika tenebiai hĩ hĩ ikama tenetikiaki, na hãtxarã

⁷ Ẽ betsabu inũ ẽ puibuũ, nukũ Shanẽ Ibu ana hushanaya hĩ hĩ ikama tenetã manakakubaĩkãwẽ. Haska keskariakĩ bai wanikatũ hawẽ yunu banaima tsekashanũ, iwanã, ui ikai manamiski, hĩ hĩ ikamarã.

⁸ Matuburi hĩ hĩ ikama tenetã manakairã, txĩtuãma xinã mestẽwãkãwẽ, nukũ Shanẽ Ibu hawaira hushanikikirã. Uĩrakubaĩkãwẽ.

⁹ Ẽ betsabu inũ ẽ puibuũ, Epa Deusũ dasibibu hatu unãti washanai ma hua kemaki. Hau matu hatube unãti watã kupiyamashanũ ana nukũ betsabube ha iki kũyã idabeyamakubaĩkãwẽ.

¹⁰ Ẽ betsabu inũ ẽ puibuũ, nukũ shenipabũ Deusũ hãtxa yuishunikabũ Deusũ hãtxa shabakabi hatu yusĩ bika tenebiai hĩ hĩ ikama tenetã hiwepaunibukiri xinaĩ habiaskariai hiwekubaĩkãwẽ.

¹¹ Ha inũ, txĩtuãbumawẽ taeshũ Deusũ duawakĩ hatu kẽwãkubainiki. Nukubu nũ xinã txãkãkatsis ikairã, hawara bika tenekĩ haska besti meama hawẽ kuxipakĩ binukĩ nũ tenetirubuki, haska nũ abuamabiarã. Haska nukũ shenipabu Jó ini mã nĩkamiskiri shabakabi ana matu xinãmanũ nĩkakãwẽ. Hamapai bika tibi yurabũ tenetirubu Jõ tenekubainaya hawẽ yura txami keyuni inũ hamapai bikahaira teneai Deusũ nemama ibiaya Jõ Deus ikũwãpakekubaini txĩtuãma inikiaki. Haska Jõ ikũhairawai nukũ Shanẽ Ibu Deusũ haskara watã hawẽ nuikĩ duawakĩ atimas hawẽ isĩ shushawatã ana hawenabu inũ hawẽ yuinaka debui keyuima ana hawẽtxaĩs inãkeakebainikiaki, hawẽ xinã pepawẽ Deus Jówẽ nuikinã, nukũ Shanẽ Ibu nui txakama inũ merabenã txakaismatũ hawẽ nuikĩ ashũkinã.

¹² Ẽ betsabu inũ ẽ puibuũ, hawara hatu ashũkatsis ikĩ hawẽ hatu mestẽhaira wamanũ ishũ Deuskiri kasmai hamapai tibikiri hãtxai habukiri yubakayamakubaĩkãwẽ. Hakia: “Ẽ akaii”, itã kaneama akubaĩkãwẽ. Hamẽ: “Ẽ akamaki”, iki yuiriatã ariayamakubaĩkãwẽ, mã haskakĩ kaneismawẽ taeshũ hau Deusũ matu kupiyamashanunã.

Deusbe hãtxatikirikiaki, na hãtxarã

¹³ Tsuabũra mã hamapai bika betsa betsapa meairã, Deusbe hãtxakĩ hawẽ kuxipa yukakubaĩkãwẽ. Ha inũ, tsuabura huĩti benimai xinã txãkãkĩ Deus kẽwaĩ hau hatũ huiwẽ nawakubainũbũwẽ.

¹⁴ Haska inũ, tsuara ikũwaĩ betsa isĩ teneaya habũ matu yusĩkĩ mekenikabu hatu kenakãwẽ, habu beshũ nukũ Shanẽ Ibũ kena kuxipawẽ haratura sheniwẽ pushatã hau shushawanũ hau Deus hakiri yukashũkubainũbunã.

¹⁵ Deus ikũhairawai mã habe hãtxashunaya ha isĩ teneai shusha wakĩ nukũ Shanẽ Ibũ ana benikĩ hatu kuxipa washanikiki. Ha inũ, ha isĩ teneaitũ hawara Deusũ nemani kanei txakaburiaxina Deusũ buashũtã ana xinãma ishanikiki.

¹⁶ Haskakẽ matũ txakabu ana huneama haska mã kanekubainai ikũwaĩ betsabube yuinamekĩ txanikĩ Deus ea akĩ hau matũ txakabu buatã matũ yura shushawanũ yukakubaĩkãwẽ. Deusũ mia unã keyuaya mã habe haskai hãtxairã, txanima tsuara yura pepakirã, Deusũ kuxipa pae itxapa hayaki.

¹⁷ Ha inũ, nukũ shenipabu Elias nuku keskakiri ana xinãnãkãwẽ. Bika tenei Deusbe nũ haibunameai keskai txĩtuãma Eliasri hiwekũkainikiaki. Hakia hawenabũ Deus txibãbumawẽ taeshũ Eliasĩ Deus yukakĩ yuikĩ: “Enabu mĩ kuxipa uĩmakĩ ana ui hatu inãyamayukubaĩwẽ”, akĩ yukakĩ ui nesewaima bari dabe inũ besti namakis ui ana imama inikiaki.

¹⁸ Hanushũ Deus ana yukakẽ hawẽ kuxipa hatu uĩmakĩ ui ana tuea hanua yunu pakiwa ewai ana bimihaira hayakũkainikiaki.

Ikũwãbiatã ha bai txanima heneabu merabewatikiaki, na hãtxarã

¹⁹ Ẽ betsabu inũ ẽ puibuũ, tsuara matũmebi txakabui bai pepa henetã mã ma benukenã, hau ikũwaĩ betsã mia merabewakĩ hau ana matu txĩtũwãkubainũbũwẽ.

²⁰ Xinãkãwẽ, matu tibibũ mã hatu merabewakatsis ikaiburã, txĩtũkĩ hatũ bai pepa benuxinabu mã hatu merabewairã, txanima mawa kayabitirububiakẽ mã hatu kaĩmakĩ pasha waii, Deusũ hawẽ hatu kupiti itxapa hayabubiakẽ hatu Deus daewashũkĩ buamashũkinã. Hatiski, ẽ hãtxarã. Tiago