Santiago 3 - Kaxinawá Bíblia (BR)

Nukũ hãtxa paepa txi keskakiaki, na hãtxarã

¹ Ẽ betsabu inũ ẽ puibuũ, matuwẽ nuikĩ ana matu yusĩnũ nĩkakãwẽ. Hatira itxapa matũmebi hatũ yusĩnanũ ika hawẽ kemuyamakãwẽ. Na hiwea nũ unãmabia nũ Deus dayashunũ ikaiburã, haska tibi hatu merabewai nũ hãtxakĩ hatu yusĩbiamis habiawẽ taeshũri hawa kaneama Deusũ nuku tibi unãti washanikiki.

² Dasibibunã, nũ kanehairamisbuki. Haskakenã, tsuabũra hãtxa txakabu yui shetxakakĩ kanekatsis ikama hawẽ yura mekekĩ hamapai tibi xinãkĩ hawẽ xinã meke pewatã hawẽ hiwea kayatapĩbaĩtirubuki.

³ Ha inũ, haska keska wakĩ cavalo nũ mekebaĩmisbukiri matu yusĩnũ nĩkakãwẽ. Cavalo hawẽ yura hirabi mekemabaĩkatsi hau nuku nĩkabainũ hawẽ hashpanu mane hãkishkũtã hawẽ bushka bushkeãkeakebaĩkĩ dasibi hawẽ yura hirabi nũ mekemabaĩmiski.

⁴ Ana haska keskari betsarã, shashuwã ewapa niwẽwãnẽ tuabiabaĩmiskẽ hanira bukĩ huni hatũ bunikatũ hariri bukatsis ikĩ hawẽ bushkeãkeakebaĩti haimã keska txinetamea hatiumawẽ bukĩ kayatapiãkeakebaĩmisbuki.

⁵ Haska keskari wai nukũ hanawenã, hamapai betsa betsapakiri yui nũ hawẽ hãtxamiski, pepa inũ txakabu hatu yuikĩ hatu xinã hunekĩ hatu xinã pe wamakinã. Haska keskari wakĩ nũ hatu eska watiruki. Bai ewapa txi dekẽ pixtawẽ ketiã ha bai ewapa menu keyukĩ tawakara abaĩmiski.

⁶ Nukũ hãtxarã, txi keskariki. Haska keskawẽ tsukira xinãtxaka pixtakĩ nũ shetxakai hãtxairã, nũ ha hatu dabãmakĩ nuitapa watiruki. Hamapai hãtxa txakabu nũ yuiairã, paeki. Haska xinaĩ nũ hãtxamiswenã, ibubis nukũ hiwea bai menukĩ itsa wakĩ nũ benumiski. Satanás txi anu kashanaitũ hatũ matu xinãmamiski, matũ hiwea pe kainai nakumakĩ txakabu wamakinã.

⁷ Ha inũ, yuinaka ni merã hiweabu inũ, peiyabu inũ, nutawẽ mapumisbu inũ, iãnẽwã merã yuinaka hiweabu nukuki nukuai bitã pubẽbiakẽ dasibi daewakĩ unaĩsmapa watã yurabũ beya wakĩ daewatirubuki.

⁸ Hakia tsuã nukũ hãtxa nemakĩ ibubis mekekĩ pewatirumaki. Ha txakabu haki mata hatũ binua haska washũ hãtxa pe yuitirumaki, ha txakabu itxapa pae matarã.

^9-10 Ha inũ, hãtxakĩ habias hanawẽ nukũ Shanẽ Ibu Epa Deus pe yuikĩ kẽwãbiatã yurabu ha itsa wakĩ dami wanirã, habias keshawẽ hatuki shetxakakĩ nũ hatu yupumiski. Ẽ betsabu inũ ẽ puibuũ, nũ ana haskatirubumaki. Xinaĩrakubaĩkãwẽ.

¹¹ Ha inũ, habias txatxanua ũpash paisma inũ ũpash muka habaismaki.

¹² Ha inũ, figueira hi bimi ha besti bimimiski, shenã ikamarã. Ha inũ, nixi betsa hawẽ bimi besti imiski, figueira ikamarã. Ha inũ, iã batapanu ũpash paisma nũ bitirumaki. Nukũ hãtxa habias keskari wakĩ habias hanawẽ hãtxa pepa inũ hãtxa txakabu nũ yuiama itixaraii. Haskakẽ nukũ hãtxa Deus mekematã Deus kẽwaĩ yurabuki ana shetxakai ana hatuki ẽ hẽ iyamakubaĩkãwẽ.

Unanepa kayabirã, eskatikiaki, na hãtxarã

¹³ Eskai unãnepa kayabi mã hiwetiru matu yuinũ nĩkairakãwẽ. Txanima matubu hatiribũ Deusũ hãtxa unãhairakĩ mã nĩkahairakubainaibunã, kaneama yurabu matũ xinã pe hatu uĩmai pehaira hiwekubaĩkãwẽ. Mã haska hiweabu hawara pe mã akubaĩmis xinãkĩ ana yuiama duapa bestikĩ haska Deusũ xinãwẽ babutã unãnepahairakĩ shabakabi yura betsabu mã hatu uĩmatirubuki.

¹⁴ Hakia matubu betsa unãnepakatsis ibiai yura betsabu tibi hawara haya mĩ mia haskatiruma xinaĩ matũ huĩtinĩ pubẽkĩ hatu pashkanũ ika shanẽ ibunũ ikĩ haska Deusũ abumis txanima mã hayamabia haska bestiwẽ mã kẽkubaĩkanaii.

¹⁵ Haskakĩ kanei ibubis unãnepapaikĩ haska Deusũ xinaĩ anua huai akama hakia haska Deus ikũwãbuma inũ Satanásã xinãmis haska keskarianũ ika mã ikaii, yura betsabu tibi binunũ, ikirã.

¹⁶ Hanua matu anua tsuara unãnepabiaya ha txibãkatsi ikama haki sinatai eari haskarianũ ika xinaĩ shanẽ ibunũ ika mã binunãnaĩ mã haskaibu tsuã matu pe meketimakẽ hamapai txakabu tibi mekĩ mã akai hayaki.

¹⁷ Hakia haska Deus anua huai haya hawẽ unãnepakĩ akirã, mã eskatirubuki. Matũ yura mã shanẽ ibubia matũ xinãwẽ shanẽ ibukiri xinãma hatu binukatsi ikama pe besti ikũkaini shabakabi mã hatu uĩmatirubuki. Ha dikabi duapai inũ, hatuwẽ nuikĩ betsabu hãtxai nemama nĩkamis inũ, daewanika inũ, betsabuwẽ nui merabenã bestimis inũ, beparameama dasibi hatu merabewamis inũ, txanima yui kayabimis inũ, yurabu paraĩsma inũ, Deus txibaĩ txĩtuãma inũ, pepas besti katui unãnepabu mã hiwetirubuki.

¹⁸ Haska unãnuma mã hatu hiwetãkubainai ha unãnumawẽ taeari yura betsabu unãnepariakĩ shabakabi hatu uĩmariakĩ pe besti mã hatu uĩmakubaĩtirubuki.