Santiago 2 - Kaxinawá Bíblia (BR)

Deusũ hãtxa txibaĩ merabenaĩ eskatikiaki, na hãtxarã

¹ Ẽ betsabu inũ ẽ puibuũ, betsarã, nukũ Shanẽ Ibu Jesus Cristo pepahaira mã ikũwaĩwẽ taeshũ yura tibiwẽ nuitxakai betsa katukĩ betsa danãyamakubaĩkãwẽ.

^2-3 Haskawẽ taeshũ miyuiwẽ matu yuinũ nĩkakãwẽ. Shanẽ ibũ mane ouro meitxikiti sawea inũ, tari hawẽruahaira sawea matube itxanũ itã matu anu hikiaya huni betsã yuikĩ: “Na tsauti bebunua peki tsaushũ nĩkayuwe”, iwanã, mã hatu duawaya huni betsa nuitapai tari txuka sawea matube itxanũ itã matu anu hikiriaya huni betsã yuikĩ: “Maĩ tsaushũ nĩkayuwe. Nikatsi iki mĩ nishũ nĩkatiruki”, iwanã,

⁴ huni nuitapai dakewakĩ shanẽ ibu pe bestikiranai ikĩ mã duawakubaĩmiski. Haska katukĩ haska Deusũ matu amakatsis ikai mã akama ikũkainaii, xinãtxakakinã.

⁵ Ẽ betsabu inũ ẽ puibuũ, matuwẽ nuikĩ ẽ matu abuai ẽ hãtxa nĩkairakãwẽ. Na mai anua tsuabura nuitapaibu Deusũ katua habũ Deus ikũwã kayabiaibu pepakanikiki. Hanua txipu haska hiwekũkainaiwẽ taeshũ niti akama nai anu habe hiwemashanai Deus yubakanishũ danãma hatu abumisshũ hatu manakushanikiki, nai anu hatu hiwemakinã.

⁶ Matubunã, xinãkãwẽ, habuwẽ datekĩ mã haska hatukiri xinaĩnã. Ha yura mabuwãyãbu mã duawairã, habunã, matu itxakawamisbuki. Ha inũ, habiabũri matu atxishũ sharabaĩkĩ shanẽ ibubu matu inãmisbuki.

⁷ Habunã, nukũ Shanẽ Ibu Jesus Cristõ matu katuni hakiri hawẽ kenawẽ mã hãtxai hãtxa txakabuwẽ hakiri matu txitemisbuki. Matu haska wamisbukiri xinãkãwẽ.

⁸ Haska Deusũ hawẽ hãtxa yuishunikabu hatu kenemakĩ hatu yusĩmakeakeni tibi binua Jesusũ ha kene ana hatu yusĩni matu ana yuinũ nĩkairakãwẽ: “Mimebi mĩ yura mĩ nuimis keskakĩ yura betsabu tibiwẽ nuikubaĩkãwẽ”, iniwẽ taea haska txibãkubaĩkĩ hawara Deusũ abumis akĩ mã txibãkĩ akĩ pewairã, haskarã, peki.

⁹ Hakia haratura mabuya inũ peiya besti hatukiri xinãkĩ ha yura betsa mabuuma hawawẽ matu merabewatirubuma hatu xinãkĩ kanekĩ Deusũ yununi pewama matũmebi Deusũ kupiti mã itxawaii.

¹⁰ Tsuãra dasibi Deusũ yusĩa txibãkatsis ibiakĩ hakia yusĩa bestitxai txibãma kanekĩ dasibi ha Deusũ Moisés yununi inũ nemani mã ma habiati txakabuwaki, matũ yura hawawẽ shushati hayamairã.

¹¹ Ha inũ, Deusũ Moisés hawẽ yusĩa kenemakĩ yuikĩ: “Aĩyãbia inũ beneyabia betsabe txutanametimaki”, ani inũ: “Matũmebi pubẽkĩ yura betsa tenãtimaki”, akĩ yuinikẽ hanua mã aĩyã inũ mã beneya yura betsabe mĩ txutanameamarã, haskai mã peaii. Hamẽ haskabiai huni betsa tenãkĩ Deusũ yusĩaki meseama patapakĩ mã kanekubainaii.

¹² Tsuabũra Deusũ yunuti inũ hawẽ nemati Jesuswẽ hatu unãti wakatsi ma pewaniwẽ taeshũ harakirira mã hãtxai inũ mã hatu uĩmakubainairã, txanima Jesusũ yunuti benawẽ ma matu tashnimakubainikiki.

¹³ Deusũ nuku eska washanikiki. Matu yuinũ nĩkakãwẽ. Tsuabura nũ hatuwẽ nuisbuma Deusũri nuku unãti wai nuiama ishanikiki. Hamẽ tsuabura nũ hatuwẽ nuikubaĩmisburã, hanu kupikĩ unãti waitiã hawa nuku itxakawama hatu binumakĩ nuku pasha wakĩ binumashanikiki.

Haratubũra ikũwã kayabi wai merabenaĩ unãtikiaki, na hãtxarã

¹⁴ Ẽ betsabu inũ ẽ puibuũ, tsuabura eska hãtxamisbuki. “Ẽ Deus hiweshũkĩ pe txibãkĩ ẽ ikũwaiĩ”, ibiamisbu hakia haska Deusũ yununi ashũkĩ benimawatirubumaki, hamẽ hawẽ hãtxa bestiwẽ yuirã, hawa hawẽ ikũwaĩ kayabi shabakabi hawẽ hatu uĩmakĩ ashũamabiarã. Haska Deus ikũwaĩkiri besti hãtxamisburã, Deus anu mekei pashati hawẽ ikũwaĩ hayamaki.

¹⁵ Xinãkãwẽ. Eska ikũwaĩ betsa huni kasmai aĩbu haratura nuitapai tariuma inũ pitiuma natiã hawa hayama hiweyukẽ

¹⁶ tsuãra tari inũ piti hatu inãkĩ merabewayukatsi ikama hawa hatu merabewatikiri hawẽ xinãnẽ merabenã besũmai hatũ kesha bestiwẽ yuikĩ: “Tari pe sawetã hawara piti mã pikatsis ikai pikĩ yaniwatã unãnuma hiwekũkaĩwẽ”, iwanã, hãtxa pepa yuibiakĩ haska hatu uĩmakĩ ashũamabia matũ hãtxa hamẽki.

¹⁷ Hamẽ tsuara: “Deus ẽ ikũwaiĩ”, iwanã, kesha bestiwẽ yuiairã, haska besti kaĩmaikiki, haska Deusũ abuai shabakabi ashũkĩ uĩmamarã. Hawẽ akarã, mawa keskaki.

¹⁸ Haskai tsuãra ikũwã kayabi wariamabe hãtxai eskai mã unãtinãtirubuki. Matu yuinũ nĩkakãwẽ. Tsuabubera hãtxakĩ yuikĩ: “Mianã, Cristo mĩ ikũwãyã eãnã, yura betsabu ẽ merabewakubainaii, ikĩ ẽ yuiaiwẽ taeshũ haska yura betsa betsapa merabewai ẽ pe hiwemis mia uĩmakĩ haska Cristo ẽ ikũwaĩ ẽ mia uĩmatiruki. Ẽ akaya hakia miã tsuara merabewama haskara Cristo mĩ ikũwaĩ shabakabi mĩ ea uĩmatirumaki. Hãtxawẽs besti ikũwãkĩ mĩ hawara mĩ ea uĩmatirumaki”, akĩ mã hatu dakematiruki.

¹⁹ Hanushũ matu betsãri xinãkĩ yuikĩ: “Epa Deus ha besti kuxipakẽ ha besti ẽ ikũwaiĩ”, ikĩ mã pe xinãkĩ yuiaii. Haskabiakẽ yushĩ txakabubũ habiaskari ikũwãbiai Deuski datei hawẽ yura txuruĩ saki saki iriamisbuki, kupishanaiki dateirã.

²⁰ Haskakẽ Deus ikũwaĩnã, ana unaĩsmapayamakãwẽ. Cristowẽ Deus mã hamẽ ikũwã bestiairã, hamẽki. Haskakẽ mã kanemis hamẽwãma unãtã ana hamẽama ikũ kayabi wakĩ Cristowẽ Deus dayashũkubaĩkãwẽ.

²¹ Nukũ shenipabu Abraãokiri matu xinãmanũ nĩkairakãwẽ. Hawẽ bake Isaque kaĩma ma berunãkẽ Deusũ Abraão ikũwaĩ unãti wakĩ yuikĩ: “Mĩ huni bakerã, ha mĩ abuhairai, mĩ bake Isaque Mati Moriá anu iyushũ txi tapu fogão watã hakishũ ea inãkĩ kuakĩ menushãwẽ”, aka iyushũ samama txatxinũ, iwanã, uĩmakĩ akaya Deusũ nemanikiaki. Haska wakĩ hawẽ xinã pewẽ Deus benimawaya: “Ea ikũwaĩ huni pepaki”, aniki.

²² Haska nukũ shenipabu Abraãonẽ Deus ashũkĩ uĩmai hawẽ akawẽ haska ikũwaĩ kayabi shabakabi wamaniki.

²³ Haska Abraãonẽ Deus nĩkashũ hawẽ hãtxa txibãkĩ hawẽ bake yauxiama hawara Deusũ yunua ashuniwẽ taeshũ Moisés hakiri kenekĩ yuikĩ: “Abraãonẽ Deusũ hãtxa ikũwãniwẽ taeshũ Deusũ xinãkĩ: ‘Abraão huni pepaki’ ”, aniki. Hanushũ ana Deusũ yuikĩ: “Abraãonã, ẽ haibuki”, anikiaki.

²⁴ Haskakẽ bemakis Deus ikũwã bestiama hakia Deusũ yunuari haratubũra mã ashuaĩwẽ taeshũ Deusũ matukiri: “Ma pe wanikẽ haska xinãkĩ ikũwãkĩ mã uĩmakĩ hawara ashũriairã, mã ma periki, ikũwã bestikĩ mã akamarã”, xinãkĩ matũ aka uĩrakubaĩkãwẽ.

²⁵ Abraão keskai Raabe atiabiamis Deuski mesekĩ Israelbũ shanẽ ibũ tsuma unãnepa unãtinã dabenika Jericó mae ewapa anu shanẽ ibuki txaniabu hawẽ soldadobu habu unãtinãtã txaninika dabe hatu atximanũ, iwanã, Raabeĩ hiwe anu hikiabu Raabeĩ hatu merabewakĩ soldadobu parãshũkĩ hawẽ hiwe anu arubiatã hatu yuikĩ: “Txanima ẽ hatu uĩshuki. Hakia harakirira ma bukanikiki. Hatu benatãkãwẽ”, atã bai betsawẽ hatu nitxĩkĩ merabewanikiaki. Raabeĩ hatu haska waiwẽ taeshũ hawẽ akawẽ Deusũ pepa warianiki.

²⁶ Ha inũ, yura yushĩyãbia hawẽ yushĩ kaĩkainaya mawamiski. Haska keskariai ikũwã bestikĩ haska Deusũ yunua txibãkĩ dayashunama hawẽ akarã, hamẽki, hatũ xinã pewama mawa keskarã.