Santiago 1 - Kaxinawá Bíblia (BR)

Tiagõ hatukiri xinãnikiaki, na hãtxarã

¹ Matu Israelĩ 12 huni bakebũ hatũ bababũ mã Jesus Cristo ikũwaĩbu mai hirabi anu mã sa ini manibaunabu ẽ Tiagõ, Deus inũ nukũ Shanẽ Ibu Jesus Cristõ tsumapã ẽ matu kene bumai uĩrakãwẽ.

Hawẽ xinã Deusũ nuku tapĩmai hawẽ kuxipakũkaĩtikiaki, na hãtxarã

² Ẽ betsabu inũ ẽ puibuũ, hawara bika betsa betsapa mã mekĩ tenebiai Deusũ benimati mã hayawẽ xinã txãkãkãwẽ.

³ Mã ma unaiĩ, haska mã ikũwaĩ matu unãti wakĩ matu bika tenemaiburã. Haskawẽ taeshũ haska matu nuitapa waibu keska tapĩkĩ teneakeakekĩ ana hawẽ kuxipakĩ mã tapĩ hawẽ ewakũkainaii.

⁴ Hawara mã teneai hawẽ Deusũ matu kuxipa wakĩ matu ewa wanũ, iwanã, matu xinã nukumakatsis ikai hawẽ kuxipai mã ana hawawẽ bika tenetirumai ha hawẽ Deusũ matu unãti wai hayai keyurikubaĩkãwẽ.

⁵ Tsuara hatiri mã unãnepariamarã, Deus yukakubaĩkãwẽ. Hawẽ unãneparã, hatũ matu inaĩkiki, hawa yauxiamarã. Mã haska Deuskiri xinãkĩ dasibi hawara akatsis ikai matu ashũtiru hayaki, hawẽ unãnepa keyutiruma haya inũ hatũ hawa matukiri txakabu xinãkĩ metuismarã.

⁶ Haska Deusbe hãtxakĩ yukakinã, txanima ikũ besti wakĩ akubaĩkãwẽ: “Ea inãtirumẽkaĩ”, ikĩ xinã dabewama akinã. Hamẽ mã xinã dabewẽ xinãkĩ mã ea akairã, iãnẽwã niwẽ betxuruwãkĩ tũkash abubumis keska wakĩ mã akawaii.

⁷ Tsuabura haska keskakĩ hatũ xinã betsa wakeakekĩ yukamisburã, hawara Deus anua bitirubumaki,

⁸ natiã hatũ hamapaikiri Deus yukabiatã haskas ikũwãkĩ xinãma pena betsatiã ana haskakiri yukaxina ikũwãkĩ mestẽwãmamarã.

⁹ Haska inũ, ikũwaĩ betsa mabu itxapa hayama tsuã hakiri xinaĩsmabia Jesus Cristo ikũwaĩwẽ taeshũ Deusũ kẽwãshanaiwẽ taea hau benima bestikũkaĩnũwẽ.

¹⁰ Mã ikũwaĩ mabuyabuũ, matũ mabu bestiwẽ hawẽ keĩ mã xinãyamanũbũ Deusũ matu ma yusĩmawẽ taea maturi benimarikãwẽ, matũ mabu mã hayabiarã, harã, ni mashu hawẽ huayabis debumis keska mã unaĩnã.

¹¹ Mabuya hiwebiani eskashãkanikiki. Hakiri matu yuinũ nĩkakãwẽ. Ni hua tuea hawẽruabiakẽ bari tashni kuhairakirãkĩ hua hawẽrua pepabia benukĩ barĩ utsi wakĩ niri amis keskai haska keskariai huni mabuwãyã hiwea mawai hawẽ mabu hawẽruayabia hawẽ mabu inãnanãmis habu benui yamanũbarikanikiki.

¹² Tsuabũra ikũwaĩ bika betsa betsapa tenebiai babuama binukubaĩmisbu Deus hatuwẽ benimakĩ hatu manakukĩ haska habũ Deus abumamisbu haskabu hatuki Deus yubakai hiwekuĩa hatuki tanani hatu hawẽ manakushanikiki, maiti sawemakĩ akawakinã.

¹³ Ha inũ, txakabũ Deus unãti watiruma inũ hau nũ txakabu wanũ Deusũ nuku yunutaskaismaki. Haskawẽ taeshũ tsuabũra hatũ xinãwẽ hawara kemu tashnia uĩ kanekatsis ikĩ yuikĩ: “Deusũ unãti wakĩ ea kanemakatsis ikikiki”, iwanã, hau haska ibubis xinaĩ hãtxayamakubainũbũwẽ.

¹⁴ Deusũ haska yunuamabiakẽ ibubis hatũ xinãnẽ txakabu xinãkĩ haska abuai keska aki haki neshei txakabu beyakubaĩmisbuki.

¹⁵ Na txakaburã, eskaki. Matu yuinũ nĩkakãwẽ. Tsuabũra habũ huĩti merã hawara txakabu xinãkĩ me taewatã: “Hawamaki”, ikĩ txakabu betsa betsapa mekĩ mata wakubaini Deusbe ana haibunameama hawẽ hãtxa ana txibãkatsi ikama ikubainaibuwẽ taea niti ikama Deusbe hiweama mawai benushãkanikiki.

¹⁶ Ẽ betsabu inũ ẽ puibuũ, ẽ matuwẽ nuiairã, hau ibubis mã parananãyamanũbũ matu shabakabi yuinũ nĩkakãwẽ.

¹⁷ Nukũ Epa Deusũ bari inũ ushe inũ bixi damiwanitũ hawẽ xinã betsa betsapa waisma inũ hakiri hawa huneamawẽ taea haska tibi hawa txakabuma pepa besti hanua huai nuku inãkubainikiki.

¹⁸ Ha inũ, Deusũ nuku haska wakatsis ikĩ hawẽ kakape txanimawẽ nuku hiwea bena inãniki. Nuku dami waniwẽ taeshũ nukũ dukũ hawẽ bake ikũwãkĩ nũ taewani nũ hayabuki.

Deusũ hãtxa txibaĩ haskai hiwetikiaki, na hãtxarã

¹⁹ Ẽ betsabu inũ ẽ puibuũ, ẽ matuwẽ nuiaikirirã, eskaki, xinaĩrakãwẽ. Hawara Deusũ matu dasibi yusĩkatsis ikai menã hawaira nĩka peirawakubaĩkãwẽ. Hakia hawara yuii mã hãtxakatsis ikai unãshubira hatu yuikãwẽ, hawa hatuki sinatamarã.

²⁰ Hamẽ yura betsa ha aki sinatakinã, haska Deusũ abuai keska aki mã pepatirumaki.

²¹ Haskawẽ taea matu dasibibũ haska Deusũ atimapa danãmis txakabu betsa betsapa mã haya henekĩ puta keyurikãwẽ. Mã haska waiwẽ taeshũ Deusũ kakape matu yusĩabu mã ma nĩkanirã, hawa danãyamakãwẽ. Ha Jesusũ hãtxarã, kuxipa paepaki. Hatũ matu pasha washanikiki.

²² Deusũ hãtxa Cristokiri kakaperã, bemakis besti nĩka bestiama haska hãtxa mã nĩkai keska ha hãtxa nĩkatã akubaĩkãwẽ. Hamẽ haska mã hãtxa txibãmarã, nĩkabiai ibubis mã parananã bestitirubuki.

²³ Tsuãra Deusũ hãtxa nĩka bestimisrã, ha hãtxa txibaĩ haki meseamarã, yura betsã hawẽ besu hawẽ beisitiwẽ

²⁴ uĩbiakĩ hawẽ besu haskarara ibubis uĩbiatã nasaukekaini hawaira hakimamiski, haskarara uĩshu xinãmarã. Haska keskariai Deusũ hãtxa nĩka bestitã hakimakubaĩkanikiki, hatũ txakabu pewakatsi ikamarã.

²⁵ Hamẽ tsuabũra Deusũ hãtxa yununi nĩka bestiama hakimakatsi ikama haska txaniai txibaĩ hatũ txakabu henei pepakubaĩtirubuki. Haska bestiama hawẽ hiwekaini txĩtuãma haska tibi Deusũ hãtxã yunuai menei haskai xinã txãkãshãkanikiki.

²⁶ Hakia tsuabũra Deus hiwea kẽwãkĩ xinãkĩ: “Deus ikũwaĩ ẽ hiweshũkũkainaii”, iwanã, xinãbiakĩ hawara atimapa xinãtxakakĩ yui sheti itibia nemai sheti itirumawẽ hatũ xinã pe mekeamawẽ taea ibubis parananãkĩ kanekĩ Deus benimawatirumaki, Jesus ikũwaĩ hamẽkinã.

²⁷ Hakia tsuabũra txanima Deus hiwea kẽwã kayabikĩ nũ akaiburã, nũ eska itirubuki. Matu yuinũ nĩkairakãwẽ. Nũ pepa hawa txakabuma ikatsis ikairã, nukũ Epa Deus benimawakĩ eska uĩmakubaĩkãwẽ. Bake ibuumabu inũ, aĩbuaibu hatũ bene ana hayabuma nuitapaibu habuwẽ nuikĩ habũ hawara bishũkĩ hatu merabewakubaĩkãwẽ. Ha inũ, hamapai yurabũ akai txibaĩ kemui irumapayamakubaĩkãwẽ.