Salmos 2 - Kaxinawá Bíblia (BR)

Deus inũ hawẽ Katuakirikiaki, na nawati hãtxarã

¹ Haskai yurabu Deus ikũwãbuma mae tibi anua hawa unãma hawẽ hawatima bestiwẽ yubakai shinã betsa betsapa wai itimaskakanimẽkaĩ?

² Mai anua shanẽ ibu kushipabu shanẽ ibu betsabube Deus inũ hawẽ Katuaki sinatai hatu maemanũ ika yubakai hatuki ha ikanikiki.

³ Hui kushipawẽ habũ yuikĩ: “Ha Deusũ hatũ nuku mekea ana ẽ betxipaiamaki! Hawẽ mane dispiwẽ nuku menesha keska wani pekenãkãwẽ!” ikaibũ

⁴ haskaibu Senhor Deus naiuria shanẽ ibumistũ nĩkatã hatukiri shinaĩ hawa unãbumawẽ taea hatu usãmiski.

⁵ Hanua hau haki datehairashanũbũ hatuki sinatahairakĩ hatu yuikĩ:

⁶ “Ha Shanẽ Ibu ẽ katuni ẽ yunushanai ha meribi mae pepa mati Sião anu shanẽ ibushanikiki”,

⁷ Senhor Deusũ haska wani ekiri shinaĩ matu yuinũ nĩkakãwẽ: “Ẽ hawẽ Katua ea yuikĩ: ‘Mĩ ẽ bakerã, natiã ẽ hiwea mia inãkĩ ẽ mia yunuaii.

⁸ Mĩ ea ea akaya mai pakea hirabi anu dasibi hiweabu ẽ mia yunukĩ mina ẽ mia wamashanaii, hatũ Shanẽ Ibu kayabi mia wakinã.

⁹ Mane mestẽti tsumashũ shanẽ ibu kushipa dasibibu mĩ hatu yamawashanaii, haska mai kẽti wanikatũ hawẽ kẽti txakabukẽ ibuã pusamis keska wakinã’ ”,

¹⁰ haska wani matu yuinũ nĩkakãwẽ: “Mã mai anu shanẽ ibu kushipabuũ, na hãtxa nukũ Shanẽ Ibu kayabikiri nĩkakĩ tapĩhairakãwẽ!”

¹¹ Senhor Deus duawai dayashunirã, haki mesei datekĩ benima besti wakubaĩkãwẽ.

¹² Ha inũ, hawẽ bake kẽwãkĩ pepawakubaĩkãwẽ, mã nĩkamawẽ taea hawaira matuki sinataya hau bai namakishũ matu tenãyamanunã. Hamẽ tsuabũra Deusũ Katua betxipaikĩ mekemakubaĩmisburã, habu besti benimakubaĩmisbuki.