Rute 4 - Kaxinawá Bíblia (BR)

Boazĩ Rute binikiaki, na hãtxarã

¹ haskashini txipu Boaz Belém kenekĩ kebẽbaunibu anu hawẽ hikiti shui dapi hanu hunibu itxamisbu anu hikitã tsaua ha hunikiri Rute Boazĩ yuishinai Rutẽ benẽ enabi kayabi hikikiranai Boazĩ betxitã kenakĩ: —Haibũ, huyuwe. Ẽ mibe hãtxa hayaki. Nenu tsauyunuwe— aka hui habe tsauaya

² hanushũ hawaira hau habũ tsaushũ nĩkai benũbũ 10 anibu unanepabu Boazĩ hatu kena bea hatube tsaushũ nĩkaibũ

³ Boazĩ hawenabu kayabi kenashu yuikĩ: —Eskawẽ taeshũ ẽ mia akairã, mĩ unaiĩ, nukunabi kayabi Noemi Moabe anua txĩtũkirãshinarã. Hawẽ bene Elimeleque bai Noemĩ hawenabu inãkatsi ikikiki, hawẽ pei bikatsirã.

⁴ Haskaramẽkainã? mĩ nĩkaya ẽ mia yuiairã. Mĩ betxipaiairã, mĩ bitiruki. Na mapubaunabu inũ anibu unanepabu nukube tsaushũ nĩkakĩ uiaĩbũ documento watã biwe. Ea ẽ Elimelequẽ enabi kayabibiarã, ea binui mĩ hawenabu kayabihairawẽ taeshũ miã dukũ ha bai mĩ bitiruki. Mĩ biama ea yuiwe. Hakia mia katxurã, ẽ eaki. Ẽ eã bitiruki— aka —Peki. Haskakenã, eã ẽ biaiĩ— aka

⁵ Boazĩ shabakabi banabimakĩ yuikĩ: —Na haskarã, tapĩkĩ shinãwẽ, ikisrã. Noemĩ bai mĩ biairã, Elimelequẽ bake Malom ma mawaimakẽ mĩ huni bake washuã kaiã ewatã ha bai hawena ishanaiwẽ taeshũ ha baiyabi Moabe nawa Rute mĩ bishũriatiruki, aĩwãkinã— aka

⁶ haska wa nĩkatã kemakĩ yuikĩ: —Haska mĩ ea yuiayarã, ẽ bitirumaki. Ẽ epa mawakĩ hawena ea heneshũbaĩshanai ẽ benukĩ itimaska wakatsis ikamaki. Hawara ẽ itirubia ẽ mia heneshunai miã Elimelequẽ bake Malomnẽ bai inũ hawẽ aĩ miã bishãwẽ, aĩwãkinã— aka

⁷ ma haskakubiranabu hatũ beya txibãkĩ haska hawenabu kayabitũ danãkĩ hatu yunuaya betsã ashũtiru hawẽ mabu kasmai hawẽ mae kasmai hawẽ bai peiwẽ inãkatsi ikĩ hatũ bitxi tae uke betsa pekashũ huni betsã ma biãtiru inãpaunibukiaki, dasibibũ uiaĩbũ ha shinãmati wakinã. Haska beya hayawẽ taeshũ

⁸ hatũ ha bai danãkĩ hawẽ bitxi tae uke betsa pekashũ Boaz inãkĩ yuikĩ: —Ha bai aĩbuyabis miã bishãwẽ— aka

⁹ mapubaunabu inũ anibu unanepabu Boazĩ hatu yuikĩ: —Nĩkakĩ ikis mã uiãyã Elimeleque inũ hawẽ huni bake dabe Quiliom inũ Malom habũ mae inũ habũ bai keyu dasibis Noemĩ ea inaĩ ẽ biaii, peiwenã.

¹⁰ Ha dikabi nĩkakĩ mã uĩriaya habũ bai hawẽ bene Malom isãmã kena hau benuyamanũ ha huni bake washũkatsi Moabe nawa aĩbu Rute ẽ biaii. Ẽ haska washuna nuku anua Malomnẽ kena tere itirumaki, hawenabu hakimatirubumarã. Haska ẽ hãtxa dasibi ẽ matu yuishu nĩkatã tsuabura mã hatu yuitirubuki— hatu wa

¹¹ mapubaunabu inũ anibu unanepabũ kemakĩ Boaz yuikĩ: —Haa. Nũ nĩkashuki. Israelĩ enabu shuku betsa betsapabu pai taekĩ nukũ shenipabu Israelĩ aĩ dabe Raquel inũ Léiã huni bake itxapa bikubainibu keska wakĩ ha aĩbu mĩ hiwe anu mĩ bishanairã, Senhor Deusũ hau duawakĩ pepa wakubaĩshanũwẽ, bake itxapa bimakinã. Ha inũ, nukũ mae Efrata Belém anu huni pepa hiweshũ hatu uĩmakubaĩshãwẽ, hau dasibibũ mikiri pe shinãkubainũbunã.

¹² Nukũ shenipabu Judá inũ Tamarĩ huni bake Perezĩ bake mirima bawani keska wakĩ ha aĩbuki Senhor Deusũ hau mia bake itxapa inãkĩ niri amariakubaĩshanũwẽ— akabu

¹³ hatu haska wabaini kashũ Boazĩ Rute aĩwaĩmashũ habe hiweshũ mekubainaya Senhor Deusũ merabewakĩ bake bimaima Rute huni bake kaĩshunikiaki.

¹⁴ Haskai aĩbuaibũ nĩkatã Noemi yuikĩ: —Natiã ha bakeishta ewatã hau hatũ mia mekeshanũ Senhor Deusũ mia baba inãshuwẽ taeshũ Senhor Deus kẽwanãkãwẽ. Mĩ baba ewaya hawẽ kena Israelĩ enabu dasibibũ unãkĩ hau pawabaũshanũbũwẽ, kẽwãkinã.

¹⁵ Mĩ yushabuai ha bake yumekĩ mia hatũ metsũshũ mia benimawakubaĩshanikiki. Mĩ babawanẽ mia betxipaihairakĩ mia babayawakĩ 7 huni bake haya keskai binuikiki— akĩ haska yuikĩ Noemi shinã txãkãwãbu

¹⁶ hawẽ baba sharatameshũ yumewakĩ hawẽ babawã Rute merabewakubainaya

¹⁷ aĩbu ha dapi hiwebaunabũ uĩkĩ yuikĩ: —Uĩwẽ. Noeminã, ma ana bakeyaki— akubainaibũ, atimas hawẽ kena kenashũkĩ: “Obedeki”, anibukiaki. Obede ewatã bakewa hawẽ bake betsa Jessé inikiaki. Ha Jessé ewatã bakewa hawẽ bake betsa nukũ shanẽ ibuhaira Davi inikiaki.

Shanẽ ibu Davĩ shenipabu eska tananibukiaki, na hãtxarã

¹⁸ Judá huni bake Perezĩ enaburã, eska tanakubainibukiaki. Perezĩ huni bake betsarã, Esrom inikiaki.

¹⁹ Esromnẽ huni bake betsarã, Arão inikiaki. Arãonẽ huni bake betsarã, Aminadabe inikiaki.

²⁰ Aminadabẽ huni bake betsarã, Naassom inikiaki. Naassomnẽ huni bake betsarã, Salmom inikiaki.

²¹ Salmomnẽ huni bake betsarã, Boaz inikiaki. Boazĩ huni bake betsarã, Obede inikiaki.

²² Obedẽ huni bake betsarã, Jessé inikiaki. Jessé huni bake betsarã, Davi inikiaki.