Romanos 3 - Kaxinawá Bíblia (BR)

¹ Haskawẽ taeshũ judeu hatiritũ ea yukakĩ: “Dasibi Deusũ yusĩni judeubũ nũ unãkĩ txibaĩwẽ taeshũ Deus benimawakĩ judeubuma nũ hatu binuamẽ?” ea wamisbuki.

² Shabakabi matu yuinũ nĩkakãwẽ. Ikũki. Ha dukũ mã judeubu hawẽ hãtxa Deus mã ashũtiru matuki txiti iniki. Matu haska wani pehairaki.

³ Ana habiaskari haratutũra ea yukakĩ yuikĩ: “Judeubu betsabũ Deusũ hãtxa ana txibãma danaĩbuwẽ taeshunã, hawara Deusũ nũ judeubu nuku yubani betsa washanimẽkaĩ, nuku danãkinã?” ea wabu:

⁴ “Haska mã xinãtirubumahairaki”, akĩ ẽ hatu yuimiskiri matu yuinũ nĩkakãwẽ. Dasibi yurabu hawara yui yubakatã txani txakabiamisbũ Deusũ hawẽ hãtxa kayabi matu yubaniwẽ taeshũ Deus txani txakakĩ betsa waismariki. Haskawẽ taeshũ Deusũ hãtxa yuishunika Davĩ Deus dayuikĩ: “Deusuũ, tsuãra mĩ pepawẽ hãtxa kaneama mikiri yuimisrã, mĩ hawa kaneisma unãshãkanikiki. Miki ha ibiamisbu mĩ hatu binu keyushanaii, hanu yurabũ mia unãti waitianã”, itã keneniki.

⁵ Yura betsã xinã txakai hãtxatiru keska matu xinãmanũ nĩkakãwẽ. Yura betsã ea yukakĩ: “Nũ txakabu betsa betsapa wamiswẽ taeshũ Deusũ hawẽ yubakawẽ nukuwẽ nuibiai haskai Deus pepama ikaskĩ nuku kupimismẽ? Haskakenã Deusrã, txakaburaka”, ikaya

⁶ ẽ Paulõ kemakĩ: “Haskatirumahairaki. Deusũ yurabu kupikinã, kanetirumaki. Haskawẽ taeshũ Deus pepa bestiwẽ taeshũ yura dasibi mai hirabi anu maniabu hatu unãtã habũ txakabu inũ habũ pepawẽ hatu kupikĩ keyushanikiki”, aka

⁷ ana yuitxakakĩ: “Haskakenã, nũ txakabuwaya haska Deusũ pe bestiwakubaĩmisrã, yura betsabu nũ hatu unãmaya habũ Deus kẽwãmisbuwẽ taeshũ haskakĩ nũ txakabuwakubainaiwẽ Deusũ nuku kupishanimẽkaĩ?

⁸ Hau yura betsabũ Deus kẽwãnũbũ nukubunã, txakabuwariakubainãkãwẽ”, ikaibu hari xinã txakakĩ yuiaibuwẽ taea Deus hatuki sinatakĩ txanima hatu kupishanikiki. Hakia nuku yuaĩ: “Paulo inũ hawẽ haibuaibũ haska yusĩmisbuki”, iki habu haskakinã, Deusũ kupiti ibubis bi yupukunãkanikiki.

Tsuabu pepamakiaki, na hãtxarã

⁹ Haskakẽkaĩ nukubu judeubunã, Deus benimawakĩ habu judeubuma nũ binuamẽ? Nũ haskamahairaki. Txakabuwakĩ nũ judeubu inũ matu judeubumã nũ hamapai kemu paewẽ txakabukĩ nuku dasibibũ hatu uĩmatxakakĩ nũ kanemisbuki, txakabũ nuku tsumawẽ taerã.

^10-12 Ha haskakiri hatunabukiri Deusũ hãtxa yuishunikatũ habukiri yuikĩ: “Mai hirabi anu yura bestitxaitũ Deus haibu wanũ ishũ benamis hayamaki, tsua nũ bestitxai kaneisma pepa hayamarã. Tsua unãnepamaki. Tsuã Deuskiri tapĩkatsi ikamaki. Dasibibu bai txakabuwẽ buirã, txakabui atimapai hiweabuki. Tsuã pepahaira aki hiweamaki. Tsua yura bestitxai pepa nũ betxitirumaki.

¹³ Yura mawa pukĩtã bepuama hanamisbu keska hawẽ tepũ pisi maiyai keskaki, hawẽ hana parananaĩ txani matarã. Hawẽ keshawẽ dunũ pae arua keskaki.

¹⁴ Hawẽ hashpawẽ yupukunaĩ kũyã imiski.

¹⁵ Hawẽ taewẽ kuxikaĩkĩ yura betsa detekĩ himi txara txara imamiski.

¹⁶ Hanira niake niakekĩ pubẽkĩ nuitapawakĩ hawara yamawamiski.

¹⁷ Hani unãnuma kati bai tapia hayamaki.

¹⁸ Deusũ uĩbiaya hawẽ berubi dateismaki”, hatu haska watã kenenibuki.

¹⁹ Haskakẽ Moisés inũ Deusũ hãtxa yuishunikabũ yusĩni unãhairabianibu: “Mã pepaki”, akĩ Deusũ hatu haskakiri xinãkĩ yuiamaki. Hakia haska yura dasibi mai hirabi anuabũ txakabuwakĩ nũ kanemis nuku unãti washanai dasibibu Deus bebunua nũ hawa hãtxatirumaki.

²⁰ Deusũ hãtxa kenenibu tapĩmisshũ: “Eãnã, ẽ hawa kaneismaki”, ikĩ yui Deus unãti wamai pepatirubumaki. Hakia haska Deusũ hãtxa keneniburã, haska hawẽ nũ txakabuwakubaĩmis dasibibũ nũ hawẽ besti unãtirubuki.

Jesus nũ ikũwaĩwẽ taeshũ Deusũ nuku pepawamiskiaki, na hãtxarã

^21-22 Eska wakĩ Deusũ yurabu pepawamis shabakabi hatu uĩmani matu yusĩnũ nĩkakãwẽ. Judeubu inũ judeubumarã, tsuabũra Jesus Cristo ikũwaĩ nukũ txakabu hatũ nuku buashunikẽ: “Haska Deusũ bebũkiri yubani tsuabũra nũ ikũwaĩbu besti txakabu hayama pepabuki”, ikĩ Deusũ nukukiri pe xinãmiski. Haskakiri Deusũ hãtxa Moisés keneni inũ Deusũ hãtxa yuishunikabũ keneniburã, habiaska dabes xinã hakiri kenenibu kaneama ini uĩtirubuki.

²³ Ha inũ, yura dasibibũ txakabuwakubaĩmisbuwẽ taea haskatã ibubis Deus pepaki nũ tsua kematirubumaki, kanei hiwei peisbumawẽ taearã.

^24-25 Deus nũ hawa washũkĩ daewatirumabiakẽ Deus duapatũ hawẽ pepa hatu uĩmakĩ hawẽ bake hawa yauxiama hamẽ inãkuĩkĩ Deusũ Cristo hatu nuku tenãmashũkĩ hawẽ himi habawanirã, Jesus Cristõ nukũ kupiti biniwẽ taeshũ tsuabũra mã Cristo ikũwaĩ hawẽ nukũ txakabu buati waniki. Haska xinãkĩ tsuabũra nukũ txakabu nũ buamakatsis iki haki txaniaya txanima Deus pepa kaneismatũ nuku unãmakĩ nũ hawẽ bake ikũwaĩwẽ taeshũ besti nukũ txakabu buashũtiruki. Cristo mawakĩ nukũ txakabu besti nukuna buashunama hakia uatiã hiweshũ ikũwãniburi hatũ txakabu hatu buashũrianiki.

²⁶ Nukuwẽ nuikĩ hĩ hĩ ikama nuku manamiswẽ taeshũ na habiatiã haska Deus pepa bestitũ maturi pepa wakĩ nuku unãmakĩ tsuabũra Jesus ikũwaĩbu beru mestẽwãmakĩ natiã Deusũ nuku unãmariakubainikiki.

^27-28 Haskakẽ nuku haska wakubainai nĩkakãwẽ. Deusũ nuku pepawairã, hawẽ yunuti inũ hawẽ nemati nũ txibãkubaĩmiswẽ taeama hakia Cristõ nukũ kupiti biniwẽ taea tsuabũra nũ ha ikũwaĩ haskai pe ikasi hiwea nũ kẽmis Deusũ xinãma hawẽ pepawẽ besti nuku hawẽruawamis nũ unaiĩ. Habiaskari Deusũ yunuti inũ hawẽ nemati nũ txibãkubaini ibubis pepakĩ nũ binutirumakẽ hakia haska Jesus Cristo nũ ikũwaĩwẽ taeshũ Deusũ nuku pepawamiski. Haskakẽ hawara pepa ibubis nũ amis xinaĩ ana nũ kẽtirubumaki.

^29-30 Ha inũ, nukũ mekenika Deusrã, judeubuna bestimẽ? Haskawẽ taea yura dasibi shukua betsa betsapa hiwebaunabu hatu mekeismamẽ? Haskamaki. Txanima dasibi Jesus ikũwaĩbu nuku mekemiski, judeubu inũ hãtxa betsa betsapa tibiyarã. Nukũ mekenika Deus bestitxai hayaki.

³¹ Haskakẽ tsuabũra Jesus ikũwãtã hawẽ yunuti inũ hawẽ nemati betsa wakĩ nũ maewamaki. Habiawẽ nũ matu yusĩkubainaii. Hakia ha kene hatu yusĩni unãkĩ haska Deusũ nuku pe hiwemakatsis ikai shabakabi nĩkakĩ nũ mestẽwaiĩ, hari Deusũ hãtxa haya betsa wamarã.