Provérbios 31 - Kaxinawá Bíblia (BR)

Shanẽ ibuhaira Lemuelĩ unanepa hãtxakiaki, na hãtxarã

¹ Eska hawẽ ewã yusiã nĩkanishũ shanẽ ibuhaira Lemuelĩ hatu kenemakubainikiaki.

² Kukaã, Deus ẽ yukakubaina ea nĩkatã Deusũ mia ea bimaima ẽ mia kainiwẽ taeshũ hawa ana betsa mia yusĩpa?

³ Eska mia yusinũ ea nĩkairawe. Aĩbuaibuwẽ kemukũkaini shanẽ ibukĩ hatũ kushipa benumisbuwẽ taeshũ aĩbuaibu txutakubaĩkĩ mĩ kushipa benuyamakubaĩshãwẽ.

⁴ Kukaã, mia yuinũ ea nĩkawe. Uva vinho inũ shia paepa itxapa shanẽ ibubu inũ yununikabũ akubainaiburã, haska pemaki.

⁵ Haskairã, paẽshũ nukũ yunuti inũ hawẽ nemati hãtxa hakimatã nuitapaibu mekeama hatu itxakawakubaĩtirubuki.

⁶ Ha shia paepa inũ vinho aki mawai inũ nuitapaiburã, hau habũ besti anũbũ nemayamashãwẽ.

⁷ Shia inũ vinho aki nuitapai inũ isĩ tenebiai hawa ana shinãma hakimatirubuki.

⁸ Yununikabube tsuara hãtxapanãbũ tsuãra hatu nemaibu miã hatu merabewakĩ ha hatu nuitapawaibu hatu hãtxashũkũkaĩshãwẽ.

⁹ Mia shanẽ ibutanã, nuitapaibu inũ habu huni pepa hatu itxakawaibu hatu nemashũkĩ yunuti pepa kushipawẽ unãti wakĩ yunu pewakubaĩshãwẽ.

Aĩbuaibu pepabukiri hawẽ huni bake ana yusĩrianikiaki, na hãtxarã

¹⁰ Aĩbu duapa pepa bikatsi benabaunarã, bikahairaki. Hawaira hania mĩ betxitirumaki. Ha aĩbu pepa haska mĩ betxitirurã, hamapai dauti kushipa hawẽrua karuhaira binuhairaki.

¹¹ Hawẽ benẽ hawẽ ainĩ hãtxa haki txiti ikĩ ikũwãkubainaiwẽ taea hawẽ hamapai dasibi hawẽ hiweti hayakubaĩmisbuki.

¹² Shaba tibi hawẽ benimakatsi hawẽ bene pe shinãshũkĩ merabewaiwẽ taea hawẽ hiwea hirabiwẽ hawẽ bene benimakũkaĩmiski.

¹³ Txashuwã dani lana inũ shapu pepa benakĩ bitãshũ hawẽ hiwe anu beshũ hawẽ mekẽnẽ dayakĩ lana inũ shapu turu akĩ yumẽ wãtã timamiski, benimakinã.

¹⁴ Txaihairakea hukĩ shashu ewapawẽ mabu bemisbu keska wakĩ txaihaira aĩbu kashũ piti betsa betsapa hawenabu bishũtãtãmiski.

¹⁵ Penariama butukaĩ hawenabu inũ hawẽ tsumabu bawashũtã hatu pimamiski.

¹⁶ Hanu yunuti bai binũ ishũ uĩtã pekẽ benimakĩ pei bikubaĩkĩ itxawashinawẽ bai bitã hawẽ uva bai wamiski.

¹⁷ Haska watã hawẽ kushipawẽ dayai ibubis shinã txãkaĩ benimai dayakũkaĩmiski.

¹⁸ Hawẽ tsumabu bariri pe hatu dayamabai hari meshu merã dayakĩ hawẽ bĩ hawaira nukawaismaki.

¹⁹ Hanushũ hawẽ mekẽnẽ ibubis yumẽ wãtã tari wakĩ timakubaĩmiski.

²⁰ Ha inũ, hawa hayabuma nuitapaibu merabewakĩ haska yukaibu yaushiama hatu inãkubaĩmiski.

²¹ Hawenabu hatu matsi tari washuĩmawẽ taea matsihairatiã dasibi yabukui peabũ aĩbu pepa hatuwẽ dateismaki.

²² Hawẽ dayarã, ibubis dakukuti wakĩ inũ batxi mayunepa hawẽrua watã sawekubaĩmiski.

²³ Aĩbu dayakapawẽ taeshũ hatũ mae anushũ hawẽ bene dasibibũ unãkanikiki. Ha dikabi hatũ mai pakea hirabi anushũ shanẽ ibubũ hawẽ bene duawakĩ nĩkamisbuki.

²⁴ Ha aĩbunã, tima tari txaipa inũ hawẽ nanesheketi timamis shũ habu mabu inananaĩbu anu hatu inãshũ pei bimiski.

²⁵ Batxi pepa sawea keska wakĩ kushipa inũ shinã pepawẽ shinaĩ meshukiri hawara ishanai shinaĩ hawẽ nuikũkaĩsmaki.

²⁶ Hãtxairã, unanepa hãtxawẽ hãtxakĩ hatuwẽ nuikĩ hatu yusĩkubaĩmiski.

²⁷ Habe hiwemisbũ hawara akubainaibu hatu shinãkĩ hawẽ dayawẽ piti hatu bishũtã hatubetã pikubaĩmiski.

^28-29 Hawẽ bakebu inũ hawẽ benẽ kẽwãkĩ yuikĩ: “Aĩbu pepa itxapabubiakẽ mianã, dasibi mĩ hatu binuhairaki”, akĩ yuikubaĩmisbuki.

³⁰ Aĩbu natiã txipash hawẽ yura hawẽruabia hawẽ shinã mĩ unãma hawẽ yurawẽ mia parãtiruki. Ha inũ, hawẽ yura hawẽruabia hawaira atimapatiruki. Hakia aĩbu betsa Senhor Deuswẽ datekĩ duawakĩ pe shinãkubainai ha aĩbukiri hawenabũ kẽwãkubaĩshãkanikiki.

³¹ Aĩbu pepa dayakapabu mae anu itxashũ yura dasibibũ hau kẽwãkubainũbũwẽ, haska hatu ashũkubaĩmis shinãkĩ yuikinã.