Provérbios 20 - Kaxinawá Bíblia (BR)

¹ Vinho itxapa atã hawẽ taea patapai huni betsabuki kashemisbuki. Shia paepa atãri detenamei itimaskai txakabumisbuki. Ha dabe aki tsuãra hatũ shinã benutã ana unanepatirubumaki.

² Hanu shanẽ ibuhaira sinatai pubẽhairaitianã, inu betsa leão pubeĩ tekerẽ tekerẽ imis keskamisbuki. Tsuãra sinatamaiburã, habu tenãtiru hatũ hiwearã, mesehairaki.

³ Ha ikeakeaibu nĩkabiai hatube kemanameisbumarã, huni pepabuki. Hakia huni unaĩsmapatunã, txakabu teneabu hatũ hatu tuekĩ taewashũmiski.

⁴ Hanu mibaĩbutiã txikishĩ hawa bai wama ibiaima hanu hatũ shekiwã tsekaibutiã hawena binũ ika kashũ hawa betxiama ishanikiki.

⁵ Hunibũ shinã hunearã, hene nuahaira keskaki. Hakia hawaira tapinikabũ unãti wakĩ habũ shinã hunea shabakabi unãtirubuki.

⁶ “Hatube yubakatã betsa wama ẽ menemiski”, iki itxapabu hãtxabiamisbukẽ txanima tsuã haskatã menetirubumaki. Haskawẽ taeshũ hunĩ hawara akĩ menemis benakĩ tsuã hania betxitirubumaki.

⁷ Huni txanitxakai parananaĩsma pe txibaĩ hiwekũkaĩmis hawẽ bakebũ hawẽ hiwea mawabaini benimakubaĩshãkanikiki.

⁸ Hatu unãti wanũ ika hawẽ tsauti anu shanẽ ibuhaira tsaushũ txakabu unãtã beshtenũ, iwanã, hatu beis keyubaũmiski.

⁹ Tsuãra eska yuitirumahairaki: “Ẽ shinã pepaswẽ taea ẽ huĩti merã ẽ hawa txakabu hayamaki”, ikĩ yuikinã.

¹⁰ Shãkama unãti txakabu inũ tanati pema ha dabe Senhor Deusũ betxipaima tsuara hawẽ dayaibu hatu danãmiski.

¹¹ Berunã hawẽ akawẽ haska hiwekũkainai uĩkĩ pepa kasmai txakabu unãtirubuki.

¹² Hawẽ nĩkati pabĩki inũ hawẽ uĩti beru Senhor Deusũ dami wakĩ hatu hayawaniki.

¹³ Tsuara mã nuitapakatsi ikamarã, usha bestiyamakãwẽ. Haskairã, ushama mã daya heneama piti itxapa teshe mã hayakũkaĩshanaii.

¹⁴ Huni betsã mabu bikĩ hawẽ karu maikiri shekamanũ, iwanã, yuikĩ: “Mĩ mabu pema duakabiki”, tsuara ikaiwẽ taeshũ hawẽ karu maikiri shekashuna biãtã benimabaĩmisbuki.

¹⁵ Ouro mane dauti sharabu mirima mai hirabi anu hayabiabũ ha huni unanepatunã, hawẽ hãtxa pepawẽ hãtxakĩ ha ouro mabu karuhaira binuabuki.

¹⁶ Huni betsa mĩ unãmatũ mĩ pei biyukatsis ikaya mĩ inãmakẽ mĩ haibũ mia inãmaya hanushũ miã hawẽ tari biãyutã mĩ mekeshũyutiruki, txipu mia pakaya mĩ inãtirurã.

¹⁷ Hawẽ hatu beparãtã hatũ piti pinũ, iwanã, yurabũ txani bushũ hatu yuimisbuki. Haskairã, hatũ txani hãtxawẽ taearã, mashi mukua keskamisbuki.

¹⁸ Hatube detenamekĩ hau hatu binushanũ, iwanã, hatũ unanepabũ hatu merabewakĩ hatu yusiãbu nĩkatã habu detenamenika shanẽ ibubu ana pe yubakatirubuki.

¹⁹ Matxupa yuanãtũ ikaibu hawaira kaka pawabaũmisbuki, hawa hatu huneshunamarã. Haskabuberã, hatube ibunanãyamakubaĩkãwẽ.

²⁰ Hawẽ ibu huni kasmai hawẽ ibu aĩbu hawẽ bakẽ hatu yupukubaini mawairã, meshu tẽ ikai mesehaira anu bushãkanikiki, hatũ hiwea benuirã.

²¹ Hawa wamabia hawaira mabu betxipaikĩ bitã txipu hatsãtã ana hawẽ benimatirumaki.

²² Tsuabũra mia ma txakabuwakẽ “Eã ẽ hatu kupiaii”, iwanã, shinaĩ tsua hãtxatimahairaki. Senhor Deus ikũwãkĩ mĩ manakubainaya Senhor Deusũ mia hatu kupishũkĩ binumashanikiki, mia mekekinã.

²³ Hawẽ shãkama unãti pemawẽ tanakĩ hatu paraĩbu ha shãkama unãti txakabu hawẽ dayaibu Senhor Deusũ hatu betxipaiama danãhairamiski.

²⁴ Haska yurabu mapukubaĩshanaibu Senhor Deusũ hatũ bai hatu katushũmiswẽ taeshũ haska hiwekubaĩshanaibu ibubis tsuã bebũkiri unãmahairaki.

²⁵ Hawara inãkatsi Senhor Deus yubai haki tanabiatã has mestẽwãma txipu shinã betsawarã, mesehairaki.

²⁶ Shanẽ ibu unanepatũ huni txakabubu ana hatu uĩkatsi ikama hatu katutã hawaira hamapai tarãti shãkamawẽ hatu txushamamiski.

²⁷ Senhor Deusũ hawẽ Yushĩ kushipa hunibu inãnitũ ha Yushinẽ hunibũ hiwea uke merãhaira hatu unãti wakĩ bĩ txasha keskawẽ unã keyumiski.

²⁸ Shanẽ ibuhairatũ hawẽ shanẽ ibu mestẽwaĩ hiwei pekĩ hawenabuwẽ nuikĩ hatu pe mekekubaĩmiswẽ taeshũ tsuã hawẽ kushipa mebĩtirumaki.

²⁹ Hatũ yura kushipawẽ taea berunãbu kẽkubaĩmisbuki. Hakia ana kushipamabia anibukũkaini hatũ bu siũ siũpawẽ taeshũ hatu kẽwãkubaĩmisbuki.

³⁰ Kusha kusha akĩ hatu isĩ tenemakĩ huni txakabubu hatu pewatirubuki, shinã txakamisbu hatu pewakinã.