Provérbios 19 - Kaxinawá Bíblia (BR)

¹ Unaĩsmapa inũ txani besti yuibauni mapumisburã, ha nuitapaibu inũ ha huni pepabu hatukiri pe yuimisbũ habũ hatu binuaki.

² Hawa bebũkiri shinã pewama hamẽ benimakaĩ daya txakayamabiashina haskarã, hawẽ daya pe kaĩtirumaki. Hawara tibi hawaira hĩ hĩ ikĩ akinã, benukĩ kanehairatirubuki.

³ Huni betsa patapakĩ hawẽ hiwea ibubis txakabuwa hanushũ: “Senhor Deusũ ea kanemashinaki”, iki unaĩsmapabu haki paranamisbuki.

⁴ Huni mabu itxapayarã, mirimabũ haibuwai bemisbuki. Hakia huni nuitapaitunã, hatũ haibuaibu benu keyumisbuki.

⁵ Hawara uiãma inũ uĩbiatã txanitxakamisburã, habunã, hatũ kupiti txakabu binuama bishãkanikiki. Txani txakamisbu hatũ txakabuwẽ taeshũ hawa unanuma wakĩ hatu mepãmakĩ pewama ishanikiki.

⁶ Tsuara shinãyã inũ mabu hatu inãmisburã, dasibibũ betxipaikĩ haibuwamisbuki.

⁷ Tsuara hawa hayamawẽ taeshũ hawẽ betsabũ danaĩbũ txanima haskawẽ taeshũ hawẽ haibuaibũri henebaĩmisbuki.

⁸ Tsuãra hawara tapĩtã ha tapĩmawẽ aki hiwekaĩkĩ ibubis pe shinãbaĩkĩ unanuma hiwekĩ hawẽ hamapai ewawabaĩshanikiki.

⁹ Hawara uiãma inũ uĩbiatã txanitxakamisburã, habunã, hatũ kupiti txakabu binuama bishãkanikiki. Txanitxakamisbunã, hatũ mawa besti manamisbuki.

¹⁰ Unaĩsmapa hawara pepa hayabia hawaira putakĩ keyubauni hawa hawẽruatã hiwetirubumaki. Haska dayaru escravobu beshmas hairabiatũ shanẽ ibukĩ shanẽ ibuhairatũ enabu hatu yunui hikitirubumahairaki.

¹¹ Bebũkiri shinã pewakubaĩmistũ sinatai taebiatã hawaira ibubis daemisbuki. Hakiri hãtxai pemisbuwẽ taea haki ha ibiabu ana shinãma ibubis hatu hakimawai pe bestikũkaĩmiski.

¹² Inu betsa leão pubeĩ tekerẽ imis keskai shanẽ ibu sinatakĩ hawẽ hãtxa kushipa hatu nĩkamamiski. Hakia shanẽ ibũ hawenabu hatu merabewakinã, hatu benimawamiski, basi anu ui eskarabes ikĩ txa amis keska hatu wakinã.

¹³ Tsuãra huni bake hawa unãma unaĩsmapatũ hawẽ epa bika tenemakubaĩmisbuki. Aĩbũ hawẽ bene ha a txakayamakĩ hiwe txakamamisrã, hiwe shui anu ui tuis tuis ikũkaĩmis keskaki.

¹⁴ Hiwe pepa inũ mabu sharabu hatũ ibubu anua bimisbuki. Hakia aĩbu unanepa Senhor Deusũ besti hatuki nukumakubaĩmiski.

¹⁵ Tsuara txikish usha besti shinaĩ usha bestikũkaĩmisrã, dayamawẽ taea buni tenekubaĩshanikiki.

¹⁶ Tsuãra Senhor Deusũ yunuti hãtxa inũ nemati hãtxa nĩkatã txibãkĩ hatũ hiwea mekemisbuki. Hakia tsuãra Senhor Deusũ yusĩti hãtxa danaĩ hawẽ kupiti bika tenekubaini mawashanikiki.

¹⁷ Nuitapaibu merabewakĩ hau hawẽ dayanũ mã hatu pei inãyumisrã, Senhor Deus mã inãyua keskaki. Nuitapai pewaima keska wakĩ Senhor Deusũ manakukĩ ana inãshanikiki.

¹⁸ Ewariama hawarakiri mĩ bakẽ mia nĩkatiru yusĩkĩ pewakubaĩwẽ. Ha dukũ yusĩkĩ pewawe. Hakia ana mĩ pewatirumabia kupikĩ ha txakabuwaiwẽ tenãtikiri shinãtimaki.

¹⁹ Tsuara sinatahairakũkaĩkĩ hawẽ kupiti bishanikiki. Hamẽ haskama hau kupiyamanũbũ tsuara hawẽ nuikĩ mĩ hatu nemashũbia ana sinata pikuhairashanikiki.

²⁰ Mia yusiãbu nĩkakĩ nemati hãtxa tapĩkubaini huni ewai mĩ unanepashanaii.

²¹ Huni yubakai ibubis hawẽ shinanẽ hãtxakĩ akatsis ibiai atirumaki. Hakia hawẽ shinã nemakĩ Senhor Deusũ haska shinaĩ hawena tashnimashũtiruki.

²² Huni betsa yubakatã txanima amisrã, ha dasibibũ betxipaimisbuki. Ha inũ, nuitapaibu hãtxamisbunã, ha txanitxakai hãtxamisbu hatu binumisbuki.

²³ Senhor Deuswẽ datekĩ hawẽ hãtxa nĩkakubaĩkĩ tsuãra hawẽ hiwea bai txibã pewai unanuma hiwekubaĩshãkanikiki, hawara txakabu ibiaya hawa dateamarã.

²⁴ Txikish bestirã, kẽtxakia besti piti meshũkaĩ metã hakia hawẽ hashpa anu hawa sanãbirã mukutirumaki.

²⁵ Ẽhẽ iki yura betsabuki kashemisbu hatu kupiaibũ ha bebũkiri pe shinaĩsmatũ uĩkĩ hatuwẽ hawenakiri tapĩkubaĩtirubuki. Hakia nemakanã bestiaibu nĩkakĩ unanepabũ tapĩmisbuki.

²⁶ Hawẽ epa itxakawakĩ hawẽ hawara yumetsũtã hanushũ hawẽ ewa hawẽ hiwe anua nitxĩtã ha huni bake itxakanika hawẽ atimapawẽ dakeama hiwea uĩmisbuki.

²⁷ Mĩ ẽ bakewẽ taea epaã, mia nemaibu mĩ hatu ana tapĩkatsi ikama hatũ yusiã pepa henetã mĩ txakabukũkaĩshanaii.

²⁸ Huni txakabubũ hawara uiãma inũ uĩbiai txani besti unãkĩ habũ pewẽ hatu unãti wabiaibũ ha yunuti kushipaki kashemisbuki. Ha inũ, huni txakabubũ hatũ keshawẽ hãtxa txakabu yuikĩ hatu mesewamisbuki, hashi kenuhaira hatuki puta keska wakinã.

²⁹ Huni txakabu hatũ yusiã nĩkama hatuki kashemiswẽ taea hawẽ kushati hi ma haki tana hayamisbuki. Huni tatimarã, kushakĩ pekushtxakayamati peki.