Provérbios 18 - Kaxinawá Bíblia (BR)

¹ Tsuãra ibubis haska betxipaikĩ akatsis ikai hawenas besti shinaĩ huni betsã yusĩti hãtxa betxipaiama beshtekĩ danãkubaĩmisbuki.

² Huni unaĩsmapatũ shinanã, ana hawara betsa tapĩkatsi ismaki. Haska hawẽ shinã ma haya unãkĩ haska besti hatu yuikatsis imisbuki.

³ Hamapai txakabuwairã, ha besti kaka tashniama dake paeyabi kaĩmiski. Kẽmisbu beaibũ hatuki dakei hatuki hãtxa txakabumisbuki.

⁴ Huni unanepatũ hãtxarã, hene nuahaira keskaki. Hanua hene bei tueai keskai hawẽ unanepa hãtxa itxapa mata hayaki.

⁵ Huni txakabubiakẽ pepabu keska wakĩ shanẽ ibu unanikabũ hatu mekekĩ ha habũ hawa txakabuwaisbuma hatu itxakawakĩ hatu parãmisbu haska pemahairaki.

⁶ Ha unaĩsmapa hiwe betsa anu kashũ txakabu hatu tueshũmisbuki, hau hawẽ taea ha iki detenamenũbunã. Hatu haskamamiswẽ taeshũ ha huni kusha kusha atirubu peki.

⁷ Unaĩsmapa hawẽ keshawẽ hãtxairã, ibubis txakabui dispiwẽ teneshekea keskamisbuki, hawẽ hiwea txakabuwairã.

⁸ Matxupã txani yuibaũkinã, misi batapabu pimisbu keska wakĩ hatu nĩkamabaũmisbuki, hatũ shinã uke merã hatu mistukĩ txakabuwakinã.

⁹ Txikish inũ hamapai sharabu txakabuwanikarã, ha dabe hawẽ betsa kayabi keskaki.

¹⁰ Senhor Deusũ kushipa kayabi shinãtirã, mishki kushipa hiwe keyatapa wanibu hanu iruti keskaki. Tsuara pepabu hatũ mekenika Senhor Deus anu itxai buaibu hatu mekekubaĩmiski.

¹¹ Huni mabuyatũ hawẽ mabu itxapakiri shinãkĩ ikũwainã, mishki kushipawẽ mae kenebaũkĩ keyatapa wanibu hatũ mekea keska tsua hikikaĩ metiruma keska shinãmisbuki.

¹² Ha dukũ kanei ibubis kẽkũkainaiwẽ taearã, txipu ana hawa hayama keyushanikiki. Hakia ibubis keĩsmarã, txipu hawẽ hamapai hawẽruawai shabakabishanikiki.

¹³ Hatu hãtxa wakĩ hawẽ hãtxa hatu yui keyuriamabiakẽ bebũkiri unaĩsmapatũ hawaira hatu kemakĩ hatu dakewamisbuki.

¹⁴ Isĩ tenebiai hawẽ huĩti shinã txãkãtiruki. Hakia punu nukai keyua dakakẽ tsuã shinã txakawãkĩ benimawatirumaki.

¹⁵ Unanepa tapinikabunã, unanepa hãtxa sharabu benakĩ ana tapĩkubaĩmisbuki.

¹⁶ Shanẽ ibuhaira betsabe hãtxanũ ishũ tsuãra hawẽ daewati pepa beshũ hawẽ tsuma mĩ inã mia bitxitiruki.

¹⁷ Ha dukũ tsuara parananaĩ hãtxai taeai nĩkakĩ: “Hawẽ hãtxa txanimaki”, ibiatã hakia ha katxu betsari txanikĩ yui pewai nĩkatã hatũ shinã betsa watirubuki.

¹⁸ Shuku dabetũ shinã dabe wai ha ikaibu haratura pe hatu unanũ, iwanã, hawẽ henekĩ tapĩkatsi huni betsã unãti númeroya urẽkĩ Senhor Deusũ haska betxipaiai hatu yunuai tapĩtirubuki.

¹⁹ Mishki kushipawẽ mae kenebaunibu hawa bika teneama tsuãra di atiru bikahairaki. Hamẽ hawẽ betsa sinatamahairashina hawa bika teneama keska daewakĩ shinã betsa wamarã, ha binua bikahairaki. Shanẽ ibũ hiwe anu hawẽ nemakĩ mane kushipawẽ kebenibu anu tsua hikitirubuma keskai tsuara ha irabetã pashkakainarã, ibubis txakabuima ana daeama habe sinatapaketiruki.

²⁰ Pikĩ yaniwai keskai tsuara hatũ hãtxa tibiwẽ ibubis hãtxakĩ nĩkai benimamisbuki.

²¹ Mĩ hãtxawenã, mĩ hiweshanai inũ mĩ mawashanai haratura yui mĩ hãtxaii. Haska txakabu yui mĩ hãtxa txakayamamisrã, habiaskari mei mĩ bika tenepakeshanaii.

²² Tsuãra aĩbu pepa biarã, hawẽ taea pepa besti hayakũkaĩshanikiki. Senhor Deusũ hawẽ mia duawakatsi hawẽ pepa mia uĩmakubainikiki.

²³ Nuitapaibu hãtxa pewẽ ea ibiaibũ hakia huni mabuyabũ hatũ hãtxa kushipawẽ hatu kũyã akĩ kemamisbuki.

²⁴ Huni haibu itxapa hayabia habũ hawaira itxakawatã henebaĩtirubuki. Hakia hawẽ haibu hatiribũ hawẽ betsa kayabi binumakĩ duahairawatirubuki.