Provérbios 17 - Kaxinawá Bíblia (BR)

¹ Besikĩ piti itxawashũ pibiai sinatai detenameyabi betsabu hiwemisbuki. Hamẽ misi natiãma bawaima kushi besti pibiai unanuma hiwekĩ hatu binumisbuki.

² Tsuãra huni bake tatimawẽ taeshũ hawẽ tsuma unanepa ikũkaĩkĩ shanẽ ibukĩ ha bake tatima yunukubaĩshanikiki. Hanua hawẽ ibu ma mawakẽ hawẽ huni bake betsabubetã ha hawẽ tsumapã hawẽ mabu pashkashanikiki.

³ Ouro mane inũ prata mane has unanũ, iwanã, txiwẽ kuakĩ unãmisbuki. Haska keska wakĩ hunibũ shinã pepa inũ txakabu Senhor Deusũ unãti wakubaĩmiski.

⁴ Huni txakabu txanitxakamistũ txakabu tibi yuiaibu txakabu yuimisbũri hatũ hãtxa nĩkakĩ betxipaikĩ pawamisbuki.

⁵ Hawa hayama nuitapaibuki kashekĩ Deusũ hatũ hatu dami wani sinatamamisbuki. Tsuara nuitapabiai txakabuwai benimakubaĩmisburã, hawẽ hatu kupishanai haska washũ binutirubumaki.

⁶ Anibubũ maiti hawẽrua keskarã, hawẽ bababu hayakubaĩmisbuki. Hatũ epabu pepabuwẽ taea hatũ bakebu kẽkubaĩmisbuki.

⁷ Unaĩsmapatũ hawa hãtxa pepa yuitirumahairaki. Hakia huni tsuara haki kashemisbuki huni pepa betsa hakiri hãtxakĩ hatu parãtirubumahairaki.

⁸ Hawarawẽ hatu duawakĩ taewabaĩkĩ pei kasmai mabu hune hatu inãkubaĩkĩ: “Ẽ hatu haska wa ea merabewatirubuki”, iwanã, shinãkubainaiwẽ taeshũ hawara hawẽ txakabu ashũtirubuki, yushĩ txakabũ kushipa haya ikũwaĩ keskawenã.

⁹ Hawẽ haibũ kanebiashĩkẽ hakiri yuibaunama huneshũkĩ hawẽ haibu betxipaimamiski. Hakia hawẽ haibũ kaneshina huneshunama txanikaũkĩ hawẽ haibu danãmakĩ putamamiski.

¹⁰ Hunĩ hawaira tapĩmis pewakĩ: “Mĩ ma kaneaki”, akĩ shanẽ ibũ yuia ibubis hawaira shinãkĩ pewamiski. Hakia unaĩsmapa pewanũ, iwanã, 100ki kusha kusha abiabu hawa tapĩtirumaki.

¹¹ Shanẽ ibu kaya kushanũ ishũ huni txakabubũ hawara txakabuwai benamisbuki. Hakia habũ txakabuwaibu hau hatu kupitanũ tsuara mẽtsisipahaira Deusũ yunushanikiki.

¹² Hawẽ bake biãbainabuwẽ taea yuinaka urso yushã pubeĩ sinataiki nukua meseki. Hakia unaĩsmapa sinatakĩ atimapawai patapakũkainaiki nukuarã, ha urso yushã binuaki.

¹³ Tsuãra huni betsa merabewabiamis hãtsiri manakukĩ merabewaismarã, haskawẽ taea hawenabu nuitapai hiwekubaĩshãkanikiki, hawẽ shinã txakabuwẽ taearã.

¹⁴ Hene bai mata txakayamakĩ huni betsã bai atxi keyumisrã, txakabuki. Haska keskanũ ika tsuara ha iki taeaiburã, txakabuki. Hau pikuyamanũ ha iki taeaibu anua hawa yuiama hatu henebainarã, haska pehairaki.

¹⁵ Tsuabũra txakabuwa shanẽ ibubũ hawa hatu kupiama meketã hakia tsuabũra hawa txakabuwamabiakẽ shanẽ ibubũ hatu kupiaibu Senhor Deus sinatakĩ hatu betxipaismahairaki.

¹⁶ Peiwẽ unanepa hãtxa binũ ika ha unanepa tapĩtirumabia haskai unaĩsmapa peiya huimẽkaĩ?

¹⁷ Hawẽ haibu kayabitũ hawa heneama betxipaimisbuki. Hawẽ betsa kayabi keska wakĩ hanu bika teneaitiã merabewakubaĩmisbuki.

¹⁸ Hawẽ haibũ huni betsa anua pei biyukatsi ikaya bebũkiri pe shinãma huni betsabe yubakashũ mĩ inãmakĩ mĩ haska wamaimarã, haska pemaki. Hau haskayamakubainũbũwẽ.

¹⁹ Tsuara itxakanikakatsis ikĩ betxipaimisrã, detenameari betxipaimiski. “Eã besti ibubis ẽ unãhairaii”, ikĩ shinãkubaĩmisrã, ibubis hawẽ kushipa benushanikiki.

²⁰ Hawẽ shinã pemabia parananaĩ hãtxa txakakũkaĩmisrã, hawa pepa haki nuku taskama ikũkaĩshanikiki. Txanitxaka besti parananaĩ hãtxakubaĩmisbu dakei bika tenekubaĩshãkanikiki.

²¹ Huni betsã bake waima hawẽ bake betsa unaĩsmapatunã, hawẽ epa nuimakĩ bika tenemashanikiki. Ha bake tatimatũ hawẽ epa hawa benimawamatirumaki.

²² Tsuara huĩti benimai pepeirã, dau pepa shea keskaki. Hakia tsuara huĩti nishmakĩ hawẽ benima heneirã, hawẽ yura babui keyumiski.

²³ Hawara pepa betsa wakĩ txakabuwanũ, ishũ, huni txakabubũ shanẽ ibu kushipabu hune hatu pei inãkubaĩmisbuki.

²⁴ Hawaira tapinikatunã, hawẽ unanepawẽ haska shinãkĩ akatsis imiski. Hakia unaĩsmapatũ hawa pe shinãma haska akatsis ikai mawaira hakiri shinã pewaisbumaki.

²⁵ Bake unaĩsmapatũ hawẽ epa sinatamakĩ hawẽ ewa huĩti nishma wakĩ danãmamiski.

²⁶ Tsuãra hawa txakabuwamabiakẽ hatu kupimakĩ pakamarã, txakabuki. Ha inũ, huni pepabiakẽ hatu kusha kusha amaiburã, haska pemahairaki.

²⁷ Unanepaburã, haskaira hãtxa yui hãtxa txakayamaisbumaki. Ha inũ, hawaira tapĩmisbunã, hawara uĩkĩ nĩkabiatã pes shũ uĩ bestimisbuki.

²⁸ Unaĩsmapabia hãtxa unãhairai keska inũ tapĩhairanika keskakĩ hawara tibi uĩbiatã hawa yuiama pes shũ tenemisrã, unanepa keskakĩ hatu uĩmamisbuki.