Provérbios 14 - Kaxinawá Bíblia (BR)

¹ Aĩbu unanepatũ hawenabu tibi hatu pe mekekubaĩmisbuki. Hakia aĩbu pe shinaĩsmatũ hawenabu hawa hatu pe mekeama hiwe txakamakubaĩmisbuki, hiwe teke teke aka keska wakinã.

² Tsuara txanima hiwei peshũ Senhor Deus duawakĩ benimawamisbuki. Hakia tsuara hiwei peama kanekubaĩkinã, Senhor Deus danãkubaĩmisbuki.

³ Unaĩsmapatũ ibubis kẽkĩ hawẽ hãtxa kushipawẽ hatu kũyã amisbuki. Hakia unanepatũ hawẽ hãtxa pepawẽ hatu pe mekekubaĩmisbuki, tsua sinatamamarã.

⁴ Ina awa hayamawẽ taea hatũ bai anu shekiwã trigo hayabumaki. Hakia ina awa hawẽ kushipawẽ hatũ bai anu mai sheshaimashũ shekiwã trigo itxapa tsekakubaĩmisbuki.

⁵ Tsuãra hawara ikaibu ibubis uĩtanã, txanitxakama yui kayabitirubuki. Hakia tsuãra uiãmabia kaka besti nĩkatã txanitxaka bestimisbuki.

⁶ Tsuara yunua nĩkaismatũ unanepanũ ishũ unanepã hãtxa benabiai haki nukutirumaki. Hakia nĩkanikabũ hãtxa bena tapĩkinã, hawa bikama hawaira tapĩkubaĩmisbuki.

⁷ Unaĩsmapabũ hãtxa nĩkakĩ mĩ hawa tapĩtirumawẽ taea hatube haibunameama tari mapukubaĩkãwẽ.

⁸ Huni pepa unanepatunã, haska pe hiwetiru bebũkiri unanepakĩ unãkubaĩmiski. Hakia unaĩsmapa pe hiwetiruma ibubis parananãmisbuki.

⁹ Unaĩsmapaburã, kanei kashekenãmisbuki. Hakia huni duapaburã, hatube haibunamekĩ hatu merabewakĩ hatu benimawakubaĩmisbuki.

¹⁰ Huni tibitũ hatũ huĩtinĩ hawara bika teneai inũ haskai benimai hamesti shabakabi unãtiruki, tsua hawa unãmamarã.

¹¹ Huni txakabubũ enabu txakabuwakĩ yamawashãkanikiki. Hamẽ huni duapa nuikipabũ enabu pe hiwei pakubaĩshãkanikiki.

¹² Hiwei pea dabanẽ merabenã bestikũkaini hãtxai hiwemisburã, bari hawẽ heneaitiã Deusũ hawẽ huĩti pema unãtã hatu kupishanikiki, mawa kayabimakinã.

¹³ Bemakis usãbiai huĩti uke merã bika tenei hawawẽ haskatima mĩ isĩ tenetiruki. Haskai bemakis benimabiashina hawẽ henei kashatirubuki.

¹⁴ Haska unaĩsmapabu hawẽ hiwea pemabiakẽ hiwekũkaini benimakubaimisbuki. Hakia huni pepabũ haska pe wakubaĩmisbuwẽ benimai shinã txãkãkubaĩmisbuki.

¹⁵ Huni betsã bebũkiri tapĩtã pe shinaĩsmatunã, hawara yuiaibu nĩkatã hawa shinãma hawaira ikũwãmisbuki. Hakia huni betsã bebũkiri pe shinãmisbunã, dasibi pewatã mapumisbuki.

¹⁶ Unanepabu txakabuwẽ datekĩ henekubaĩmisbuki. Hakia unaĩsmapabu txakabuwẽ dateama nashui ika mapumisbuki.

¹⁷ Tsuabura shinãma hawaira sinatakĩ txakabuwakubaĩmisbuki. Hakia tsuabũra bebũkiri pe shinãtã hawaira sinataisbumaki.

¹⁸ Huni betsã bebũkiri pe shinaĩsmarã, hawẽ unaĩsmapawẽ taea hiwei peismaki. Hakia huni betsã bebũkiri pe shinãmisrã, unanepai hiwea dasibibũ uĩtirubuki.

¹⁹ Huni txakabubũ huni pepabu bebũ dãti iki beti itã hatu kẽwãshãkanikiki. Huni pepabũ hiwe hikiti shui anushũ huni txakabubũ hatu ea ashãkanikiki.

²⁰ Nuitapaiburã, hatũ haibuaibũ dikabi hatu danãkubaĩmisbuki. Hakia mabu itxapayaburã, haibu mirima hayamisbuki.

²¹ Hatu dapi hiweabu tsuãra merabewama danãkinã, Deusũ yusiã txibãma txakabuwaikiki. Hakia tsuara nuitapaibuwẽ nuikĩ merabewai benimakũkaĩmiski.

²² Tsuãra txakabuwanũ ishũ benabaũkinã, bai pepa benumisbuki. Hakia tsuãra pepa besti anũ ishũ benamisburã, yurabũ hatu betxipaikĩ txibãkĩ hatu hawa heneisbumaki.

²³ Tsuara daya txakayamakũkainirã, piti inũ mabu hayakubaĩmisbuki. Hakia hawa wamabia hãtxa bestikubaĩmisburã, hawa hayama nuitapakubaĩmisbuki.

²⁴ Unanepabũ hatũ shinã pepahairarã, maiti hawẽrua sawea keskabuki. Hakia habu unaĩsmapabũ hawẽ hatu uĩmairã, maiti atimapa sawea keskabuki.

²⁵ Tsuãra hawara ikaibu ibubis uĩtanã, shanẽ ibu yui pewashuna hawẽ hãtxa ikũwãkĩ huni betsã hiwea piskumatirubuki. Hakia tsuãra uiãmabia kaka besti nĩkatã txanitxakakĩ shanẽ ibu tenãmatirubuki.

²⁶ Tsuãra Senhor Deus ikũwãkĩ duawai hawa dateama hiwekubaĩmisbuki. Haska hawẽ ibu hiwea uĩkubaini hawẽ bakebu hawa datetirubumariki.

²⁷ Senhor Deus duawakĩ mĩ benimawairã, habia mĩ hiwea kayabiki, mawa kayabi mĩ ma binushinawẽ ana dateamarã.

²⁸ Shanẽ ibu kushipakĩ yura itxapa yunukubainaya kẽwãkubaĩmisbuki. Hakia yura eskarabes yunukubaini hatũ shanẽ ibu babui ana kushipamakẽ ana hawa nĩkatirubumaki.

²⁹ Tsuara hawa hĩ hĩ ikama unãshubira hãtxakĩ hawẽ unanepa hatu uĩmakubaĩmisbuki. Hakia tsuara hĩ hĩ iki hawaira hãtxakĩ hawẽ patapa hatu uĩmakubaĩmisbuki.

³⁰ Tsuãra hawara bika teneai henetã ana hawẽ nuiamakẽ hawẽ yuraki isĩ hikitirumaki. Hakia huni betsã mabu uĩ habias hayarianũ ika kemumisburã, hatũ yuraki isĩ shauki tekitã txapuai keskabuki.

³¹ Tsuãra nuitapaibu bika tenemakĩ itxakawakinã, hatũ damiwani Deus danaĩ haki sinatamamisbuki. Hakia tsuara nuitapaibuwẽ nuikĩ hatũ damiwani Deus duawakĩ benimawakubaĩmisbuki.

³² Huni txakabu hatũ txakabuwẽ txakabuwai di imisbuki. Hakia huni pepabu duapakubaini hawẽ pepawẽ hawa dateama unanuma mawatirubuki.

³³ Tsuabũra bebũkiri pe shinãkubaĩmisburã, hatũ shinã merã unanepa hãtxa hayabuki. Hakia unaĩsmapabũ unanepati hãtxa hawa tapĩtirubumaki.

³⁴ Hatũ yunuti kushipa pepawẽ nawa shukua betsa shanẽ ibui ibubis kẽkubaĩmisbuki. Hakia shanẽ ibũ txakabuwakĩ kanekubainaiwẽ hawenabu dakekubaĩmisbuki.

³⁵ Dayarubu pepa anikabu shanẽ ibubũ hatu betxipaikubaĩmisbuki. Hakia dayarubu mawaira anikabumarã, shanẽ ibubu hatuki sinatakubaĩmisbuki.