Neemias 8 - Kaxinawá Bíblia (BR)

¹ Jerusalém anu hanu ũpash biti beputi shui bebũ hemaĩtĩ shaba ewapa anu yurã kaiã dasibi hanus itxabũ haska Senhor Deusũ Israelĩ enabu shinãmakĩ hawẽ yunuti inũ hawẽ nemati hãtxa una merã Moisĩ hatu keneshuni hau benũ kenenika yusinã Esdras yuiabu

² ha dukũ shaba inũ ushe 7tiã nukunabu Deusbe hãtxashunika Esdrasĩ una Moisĩ hawẽ yunuti inũ hawẽ nemati hãtxa keneni beshũ hunibu inũ, aĩbuaibu inũ, bake mishtĩbu habũ ma nĩkaibu hanus itxai keyuabu anu hatu bebũ beshũ

^3-5 ũpash biti beputi shui hemaĩtĩ dapi shaba ewapa anushũ yurã kaiã itxabu hatu bebũ hushũ penamahaira kene yuitiashũ yuikubaĩkĩ bari mananãbi hau heneshanũ tapu keyatapa ashiãbu anu Esdras nia ha dapi hawẽ yusiuri Matitias inũ, Sema, inũ, Anaías inũ, Urias inũ, Hilquias inũ, Maaséias mapuabu hanua betsabu hawẽ yusmauri Pedaías inũ, Misael inũ, Malquias inũ, Hasum inũ, Hasbadana inũ, Zacarias inũ, Mesulão mapuriabũ Esdras hau uĩkĩ nĩka pewanũbũ manaũri nishũ dasibibu hatu bebũ Moisĩ keneni una bepẽshũ hatu yuikĩ haska wai uĩkĩ nĩka pehairawai dasibibu beni keyuabũ

⁶ hanushũ mekenika Senhor Deus kushipa dasibi binu keyuatũ hãtxa itxapawẽ Esdrasĩ kẽwãkubainaya nĩkai dasibibũ mekẽ meshaĩ keyushũ kemakĩ yuikĩ: “Habiaskaki! Habiaskaki!” iki keyutã dasibu dãti iki maiki beti ishũ Senhor Deus kẽwãtã benitã nĩkai tsauabũ Esdrasĩ hui kushipawẽ unãshubira hatu yuishũkubainaya

⁷ hanu habũ Esdras merabewakĩ Levĩ enabu Jesua inũ, Bani inũ, Serebias inũ, Jamim inũ, Acube inũ, Sabetai inũ, Hodias inũ, Maaséias inũ, Quelita inũ, Azarias inũ, Jozabade inũ, Hanã inũ, Pelaíasĩ tsauabu hatu yusĩkĩ

⁸ Deusũ yunuti inũ hawẽ nemati hãtxa unaki keneni hui kushipawẽ yuikĩ hau shabakabi nĩkakĩ tapinũbũ Deusũ hãtxa shinãmati shabakabi hatu nĩkamakĩ yusĩkĩ hãtxa maewakĩ hatu haska wanibukiaki.