Neemias 4 - Kaxinawá Bíblia (BR)

Judá enabuki sinatai hatuki kashenibukiaki, na hãtxarã

¹ Jerusalém mishkiwẽ kenebaunibu di anibu nũ ana bena wakĩ pewakĩ taewaya Sambalatẽ nĩkatã pubeĩ nukuki sinatahairakĩ Judeubuki kashei taekĩ

² nukukiri hawẽ haibuaibu inũ Samaria anu detenamenikabu Sambalatẽ hatu yuikĩ: “Ha Judá enabu pitiuma mawabiairã, haskara shinaĩ dayai ikanimẽkaĩ? Hawẽ mekenika Deus kẽwãkĩ inabu nami ana menushunaibu nũ hatu nematiruma dabanẽ haska shinaĩ ikanimẽkaĩ? Hawẽ kene benawakĩ shaba bestitxai keyutirubu shinãkanimẽkaĩ? Mishki datsa kene pewanibu menunibu anua hawẽ mishpu bena watirubumẽ?” hatu waya

³ ha dapi nishũ Amom nawa Tobiasĩ kashewakĩ hatu yuikĩ: “Benawakĩ keyubiabu mishki kene babui kamã inu haki inakaina di ishanikiki”, ikĩ usãkĩ hatu yuia,

Neemiasĩ Deus ea anikiaki, na hãtxarã

⁴ habu nukuki kasheaibu nĩkatã eã Deus ea akĩ: “Nukũ mekenika Deusuũ, haska nukuki kasheaibu hatu nĩkakubaĩwẽ. Nukukiri hãtxa txakabubiaibũ hatũ txakabu ana hatuki txĩtũmawe. Ha hatuki sinataibũ hau hatu maemakĩ atxishũ hatũ mae txaihaira anu hau hatu iyushanũbũwẽ.

⁵ Jerusalém mishki kene benawakĩ pewabaunaibu hatuki ẽhẽ ikaibuwẽ taeshũ hatũ txakabu buashunama mia bebunua hatu hakimayamashãwẽ”, aka

Ha hatuki sinataibu Judá enabuki yubakanibukiaki, na hãtxarã

⁶ mishki kene dayai heneama akubaini nukunabu benimai shinã txãkaĩ dayahairakĩ ma benibaũkĩ hawẽ keyatapa namakis wabainaibũ

⁷ Jerusalém mishki kenebaunibu di anibu ana benawakĩ akubaĩkĩ shui wanibu bepukĩ ma taewaibũ nĩkatã Sambalate inũ, Tobias inũ, Árabe nawabu inũ, Amomnẽ enabu inũ, maewã betsa Asdode anu hiweabu nukuki sinatahairakĩ

⁸ hatũ detenamenikabu hatu yunukĩ Jerusalém atxikĩ detekĩ txakabuwashanũ ika dasibi itxa yubakashinabuwẽ

⁹ taea hau Deusũ nuku merabewanũ Deus ea atã shaba inũ meshu merã tibi hau habũ nuku uĩkĩ nuku mekekubainũbũ nũ hatu nitxĩbauna

¹⁰ hanua Judá enabũ datekĩ ea yuikĩ: “Mishki di akĩ ture ture anibu itxapahairawẽ taea nukũ dayaru hĩ iki unãyamasaibuwẽ taea mishki kenebaũkĩ nũ keyutirumaki”, ikaibũ,

¹¹ habiatiãri nukuki sinataibu nukũ mae merã hikibirã nũ hawa uiãma inũ nũ hawa unãma habũ nuku detebaũkĩ nukũ daya nuku henematirubuki.

¹² Hakia nukunabu Judá enabu hatu dapi hiweabũ hatũ hãtxa nĩkakĩ nuku yuinũ ika habu bebirã bebirãkĩ nuku yuikĩ: “Matũ mae kebaũtã hikibirãkĩ matu deteshãkanikiki. Uĩrakãwẽ”, nuku abirã abiranaibuwẽ

¹³ taeshũ hau habũ nuku uĩshunũbũ mishki kene uke merã hiwe ibu tibi hawenabu hunibuyabi hatũ matxatu txaipa kenuhaira inũ, hatũ hashi txaipa inũ, hatũ pia itxapaya hanu kene txãpa anu inũ beshpa anu hau mapubaunũbũ ẽ hatu yunua

¹⁴ hakia habu buabuma dateaibu uĩ benitã shanẽ ibumisbũ enabu inũ, yununikabu inũ, huni betsabu eã hatu yuikĩ: “Hawa dateyamakãwẽ. Nukũ mekenika Senhor Deus kushipapaira ha besti meseki shinãkãwẽ. Haska shinãkubaĩkĩ matũ betsabu inũ, matũ huni bakebu inũ, matũ aĩbu bakebu inũ, matũ aĩbuaibu inũ, matũ hiwe dasibi mekei nukuki sinataibu hatu deteshũkubaĩkãwẽ”, ẽ hatu wa, date maĩtã haska ẽ hatu yunua ikaibũ

¹⁵ hatu nemanũ ika ma dasibi nũ pei keyuabũ ha inũ habu haska nukuki sinataibu yubakaibu Deusũ hatu itimaska wakĩ keyua habũ nuku nĩkatã hatũ mae anua beabumawẽ taea nukubũ mae mishki kenebauni hanu bestibu tibi nũ dayashinabu anu nũ ana taeaibũ

¹⁶ ẽ hatu haska wa ẽ hunibu namakis betsabu ana dayakubainaibũ habiatiri hatũ detenameti mabuya hatũ hashi inũ hatũ yura nemati mane turuakea inũ, pia inũ, hatũ mane tari saweshũ dayaibu mekea mapubaunabũ Judá enabu shanẽ ibu beshmasbũ hatu merabewakubainaibũ

¹⁷ hanua habu dayakĩ mishki benibaunaibu habũ mabu hatu iashunaibu mekẽ betsawẽ hatũ matxatu txaipa tsumatã hanua mekẽ betsauri mishki inũ mabu betsa hatu bishũtãtanaibũ

¹⁸ habũ mishki kenebauni dasibi dayaiburã, hatũ matxatu txinesheketiki usuã dayakubainaibũ hanua ha hatũ trombeta nuku txã ashũtiru ebe nikũkainaya

¹⁹ dayai nũ pashkariamakẽ shanẽ ibumisbũ enabu inũ, yununikabu inũ, huni betsabu eã hatu yuikĩ: “Nukũ daya itxapa txaipaki. Nukũ mae kenebauni benãta pashkatã shukua tibi nũ dayakanaii.

²⁰ Haskawẽ taeshũ nukuki sinataibu ma kemaibũ nĩkatã trombeta txã txã akaya nukuki dasi bukĩ matũ detenametiya bushãkãwẽ. Nukũ mekenika Deus nukube detenameshanikiki”, ẽ hatu wayamaki.

²¹ Nuku haska wabiabu shaba tibi bari txaitanai mishki bebirã bebirãkĩ mãtxĩkubainaibu hunibu hatiri dayaibũ hatiri betsabũ hatu kesheshũ hashi tsumashũ uĩbauni mapui bari hikikainaya dayai henekubainaibũ

²² nũ haskaitiã dasibibu nũ dayakapabu inũ nukũ merabewanikabu hunibu hatu yuikĩ: “Jerusalém hirabi nũ dayai anurã, uke merã mekebauni meshu merã keshea hari ushai inũ bariri nũ dayaitiã nuku mekei hau mapukubainũbũwẽ”, akĩ hatu yunutã

²³ hatu yunu bestiama eari bika tenenũ ika enabuya inũ, ẽ merabewanikabu inũ, habũ ea keshea detenamenikabu ebe bumisbu habubetã nukũ tari pekama bestibu tibi nukũ txatxitiya nũ ushakũkainiki.