Neemias 2 - Kaxinawá Bíblia (BR)

¹ Artaxerxes shanẽ ibui ma 20 ano kaya ushe Nisã anu shaba betsatiã hawẽ vinho ẽ amai ẽ punu nukahaira ea uĩkĩ

² ea yukakĩ: —Mĩ punu nukahaira ẽ mia uiaiĩ. Mĩ haskai ikai? Mĩ isĩ teneamabia haskai hawa shinãhairai mĩ punu nukamẽ?— ea wa ea haska wakĩ datea dateyabi

³ ẽ shanẽ ibuhaira yuikĩ: —Shanẽ ibuũ, hiweyukũkaĩwẽ! Txanima na ẽ punu nuka mĩ ea uiainã, ha maewã anushũ ẽ shenipabu maiwapaunibu hatũ mishki hiwe inũ kenebaunibu ma hatuki di iki keyuni inũ hawẽ shui beputi tibi kuabiranibuwẽ taea ẽ ana hatu uĩsma haska shinaĩ ẽ punu nukahairaki— ẽ wa

⁴ shanẽ ibũ ea yukakĩ: —Mia haska washũkĩ ẽ mia merabewatirumẽ?— ea wa hau ea merabewanũ Deus nai anua ẽ huĩtinĩ yukatã

⁵ ẽ shanẽ ibu yuikĩ: —Shanẽ ibuũ, haska ẽ mia dayashunai mĩ ea betxipaiai keskarã, mĩ ẽ shanẽ ibũ ekiri haska pe shinãkĩ mĩ ea yunuarã, Judá mai pakea anu kashũ hanu ẽ shenipabu maiwanibu anu uĩkĩ ẽ hatũ mae ana pewakĩ ẽ hatu bena washũkatsis ikaii— ẽ waya

⁶ hawẽ aĩ shanẽ ibuhairari ha dapi tsaukẽ shanẽ ibũ ea kemakĩ yuikĩ: —Hari karã, hati ano mĩ txĩtunũ ika ikai?— ea wa ha baritiã ẽ hushanai ẽ yuia ea nitxinũ ika shanẽ ibu benimakĩ: —Katãwẽ— ea waya

⁷ hanushũ eã yuikĩ: —Judá enabũ mai pakea anu ẽ kai hau ea nemayamashanũbũ Hene Eufrates ukeri bari kaikiri hiweabu habũ yununikabu shanẽ ibu beshmasbu yunukĩ ekiri ea hatu keneshũwẽ, haska mĩ betxipaiai keska wakinã.

⁸ Ha inũ, mĩ yunua betsarã, hatũ hi shukua mekea hawẽ kena Asafe anu ea hatu kenemashũriawe. Deus kẽwãti hiwe beputi inũ, mae mishkiwẽ kenebaunibu hikiti shui beputi ẽ washanai inũ hanu ẽ hiweshanai anu ẽ beputi ẽ washanai hau ea yunushanũ ea yuishũwẽ— akĩ ẽ Deus nuikipahairatũ ea merabewaya shinãkĩ ẽ shanẽ ibu ẽ yuia haska ẽ yukai keska ea merabewayamaki.

⁹ Kai Hene Eufrates ukeri bari kaikiri hiweabu yununika shanẽ ibu beshmasbu shanẽ ibuhairatũ hatu keneshũshina ẽ hatu inãniki. Ea haska besti nitxiãma hau habũ ea mekebainũ hawẽ detenamenikabu shanẽ ibu beshmasbu inũ cavalowẽ katsaumebaĩmisbu itxapaya ebe shanẽ ibuhairatũ hatu yunuyamaki.

¹⁰ Israelĩ enabu merabewatanũ ika ẽ ma hikikẽ Horom anua Sambalate inũ Amom nawa yununika beshmas Tobiasĩ nĩkatã hawa habũ haska betxipaiama inibuki, tsua hushũ Israelĩ enabu merabewai uĩkatsi ikamarã.

Jerusalém mishkiwẽ ana kene benibaũkatsi yubakanibukiaki, na hãtxarã

¹¹ Hanua kakũkaini atimas Jerusalém anu ẽ hikishina hanua 3 dia huĩrukũtã

¹² Jerusalém anushũ hawara ẽ ashanai Deusũ ea shinãmaima hawa tsua yuiama meshu merã bututã ẽ huni eskarabesbetã uĩ kai ea besti cavaloki katsaumea kauani

¹³ habias meshu merã napaku anu pukinibu hawẽ kena Dragãokiri hikiti shui anu hune tashnikaini inũ, hanu txaka putamisbu hikiti shuikiri kawãkĩ Jerusalém mishki kenebaunibu di akĩ keyunibu inũ, beputi tibi kua keyunibu uĩkubauni

¹⁴ hanua kakũkauni ũpash habai beputi Porta da Fonte bebũ kematã shanẽ ibũ ũpash aruti mai pukĩshũ mishkiwẽ kebẽbaunibu anu niti itã mishki kebenibuwẽ taea harakiri ẽ cavalo katimakẽ

¹⁵ yamenapũ meshubiakẽ pashku debu txai dũkeatãkĩ mishki kenebaunibu di anibu uĩ keyutã habias bai nũ kawẽ ana hawẽri txĩtũkirani habias pashku debu anu beputi kini Porta da Fontewẽ nũ hikiniki.

¹⁶ Haska shinaĩ meshu merã ẽ katãshu inũ haska yubakakatsi ẽ uiãtãshina nukunabuma nawa yununikabu shanẽ ibu beshmasbũ ea hawa unãbumakẽ ha dikabi nukunabu Deusbe hãtxashunikabu inũ, habu dukũ nukũ shanẽ ibubũ enabu inũ, nukũ shanẽ ibu beshmas yununikabu inũ, dasibi Judeu hunibu dayashanaibu ẽ haska shinaĩ ẽ hatu banabimariama iaketãshina

¹⁷ atimas hatu itxawatã yuikĩ: —Jerusalém dasibi di akĩ keyunibu inũ hikiti shui beputi dasibi kua keyukĩ nuku nuitapawanibu mã unãhairaii. Hau nukuki ana kasheyamashanũbũ eki dasikãwẽ, Jerusalém mishki kenebaunibu di anibu ana benibaũkĩ bena wakĩ nũ pewanũbunã— akĩ

¹⁸ haska Deusũ ea duawakĩ merabewashina inũ haska Pérsia nawa shanẽ ibuhairatũ ea pe yuishina ẽ habu yuia habũ ea kemakĩ yuikĩ: —Haskakenã, dayai taeribaunãkãwẽ!— iki dasibibũri hatu benimawakeakeaibũ

¹⁹ ẽ hatu haska wai ẽ hãtxa nĩkabirã Horom anua Sambalate inũ, Amom nawa yununika shanẽ ibu beshmas Tobias inũ, Árabe nawa Gesém nukuki kashekĩ nuku hãtxa txakabuwakĩ ea danãkĩ yuikĩ: —Mã nuku haska wanũ ika ikai? Pérsia shanẽ ibuhairatũ hãtxa mã daka danaĩ ana haki sinatakanai?— ea wabu

²⁰ ẽtseri hatu kemakĩ: —Deus nai anuatũ nuku yunushĩshũ dayamakĩ dasibi nuku pe keyumashanaiwẽ taeshũ nũ hawẽ tsumabunã, maewã mishkiwẽ kenebaũkĩ nũ taewaii. Hakia maturã, Jerusalém anu mã ibia mã nukubemaki. Mã ana hawa nuku yunutirubumaki. Hawaira dasibibũ matu hakimakĩ tsuã matu ana shinãma ishãkanikiki— ẽ hatu waniki.