Neemias 1 - Kaxinawá Bíblia (BR)

Neemiasĩ hawenabukiri Deus yukashunikiaki, na hãtxarã

¹ Na miyuirã, haska ea Hacaliasĩ huni bake Neemias ẽ hiwekũkainaikiriki. Hanua Pérsia nawa shanẽ ibuhaira Artaxerxesĩ hatu yunukubaini ma 20 ano kaitiã ushe betsa Quisleutiã shanẽ ibũ maewã Susã anu ea Neemias ẽ dayai hiwekẽ

² ẽ betsa Hanani inũ huni betsabu Judá enabũ mai pakea anua bui hikiabu Jerusalémkiri inũ Babilônia shanẽ ibuhairatũ nukunabu hatu iyuaibũ habu Judeubu pashanibukiri ẽ hatu yuka ikaya

³ ea kemakĩ yuikĩ: “Nawabũ hatu atxiaitiã pashaniburã, pakubaini nukũ mai pakea anu bikahaira tenei dakeyabi hiweabuki. Hamẽ Jerusalém anurã, txakaburiki. Mishki kenebaunibu berã keyunibu mania inũ hanu hikiti shui beputi tibi txiwẽ kuakĩ keyurianibuki”, ea wabu

⁴ ea haska wabu haska kaka nĩkatã tsaua ẽ kashayamaki. Hanua shaba hatira punu nuka samakekĩ Deus nai anuabe hãtxakĩ ea akĩ

⁵ yuikĩ: “Nai anua Senhor Deusuũ, mĩ mekenika Deus kushipa meseki. Tsuabũra mia betxipaikĩ mĩ yunuti hãtxa inũ mĩ nemati hãtxa txibãkĩ akubainaibuwẽ nuikĩ haska mĩ hatube yubakani heneama shinãkĩ mĩ akubainaii.

⁶ Haskawẽ taeshũ shaba inũ meshu merã tibi Israelĩ enabu mĩ tsumabu ẽ mia hatukiri yukashũkubaĩmis mĩ nĩkanũ ikis ẽ mia ana ea akaii. Nukubunã, natiã nũ unaiĩ. Israelĩ enabu mikiri nũ txakabuhairakubiranimabuki, enabu inũ earã.

⁷ Mĩ nuku uĩbiaya nukurã, Israelĩ enabu nukũ shenipabu inũ nukubu txakabuhairai nũ hiwekubiranimabuki. Haska wakĩ mĩ tsuma Moisés mĩ kenemani mĩ yunuti hãtxa inũ, mĩ nemati hãtxa inũ, mĩ yusĩti hãtxa mĩ nuku yuini hawa nĩkakĩ hawa txibã pewama nũ hiwekũkainaii.

^8-9 Bebũkiri nukũ shenipabu yuikĩ: ‘Ẽ hãtxa danãkĩ mã txakabuwakubainaibu nawa betsa betsapa mai hirabi manibaunabu anu ẽ matu sa ashanaii. Hakia ekiri shinã betsa watã ẽ yusĩti hãtxa ana nĩkakatsis ikĩ mã ana ea pe txibãkubainaya kupikĩ mai kesua txaihaira anu matu nitxĩkĩ matu sa abianishũ haria iwekĩ hanushũ eã ẽ matu unãtiwamakĩ ẽ kena netãkĩ ẽ meribi wakĩ katuni anu ẽ ana matu iweshũ hiwemashanaii’, akĩ haska mĩ Moisés yuini shinaĩrawe, hakimamarã.

¹⁰ Nuku itxakawaibu hatu nemakĩ mĩ kushipawẽ mĩ nuku mekekubainiwẽ taea nũ minabuki, mĩ tsumaburã.

¹¹ Mibe hãtxakĩ ẽ mia ea akai ea nĩkawe. Senhor Deusuũ, ẽ shanẽ ibu ewẽ nuimawe. Ha ẽ shanẽ ibu Artaxerxes ewẽ nuikĩ ekiri pe shinãyã haskawẽ taeshũ ẽ mia duawakatsi haskakiri ẽ mia yukaii”, anikiaki. Ea Neemiasinã, shanẽ ibuhaira Artaxerxesĩ nushuti pewakĩ hawẽ kẽtxaki hushkeshũ dau hayamẽkaĩ, iwanã, eã dukũ metã hawa dau hayamakẽ ẽ amakubainiki.