Miquéias 3 - Kaxinawá Bíblia (BR)

Yununika txakabubu Senhor Deusũ hatu dananikiaki, na hãtxarã

¹ Israelĩ enabu shanẽ ibubu inũ yununikabuũ, natiã ea nĩkakãwẽ. Yunuti kushipa peparã, matunamakẽ mã unãkatsi ikamamẽ?

² Hakia haska shinãma pepa danãkĩ txakabu mã betxipaikubaĩmiski. Enabũ bitxi dashpeshũ hawẽ nami besti bikĩ keyushũ hawẽ shau henebaina keska mã hatu txakabuwakubaĩmiski.

³ Enabu hatu itxakawakĩ mã hatu pasha pia keska wamiski. Betsabu hatu atxishũ hawẽ bitxi dashpetã hatũ shau tseka tseka ashũ kẽtiki bawanũ, iwanã, hawẽ nami meshte meshte akĩ enabu hiweabu hatu piai keska wakĩ mã hatu itxakawakubaĩmisbuki.

⁴ Txipu shaba betsatiã merabe ea Senhor Deus mã yukabiaya ẽ matu kemama ishanaii. Mã txakabuwakubaĩmiswẽ taea hanu mã ea yukaitiã ẽ matu nĩkakatsi ikama matu anua ẽ huneshanaii.

Deusũ hãtxa yuishunika paranananikabu Senhor Deus hatuki sinatanikiaki, na hãtxarã

⁵ Deusũ hãtxa yuishunika paranananikabũ hatu yusĩ txakaibuwẽ taea enabu hiwei peama bai txakabu tanabaini hamakiri bukubaĩkanikiki. Tsuabũra hatu pimakubainaibu bestikiri unanuma hiwetikiri hatu banabimakubaĩmisbuki. Hakia tsuãra hatu yaniwamabumawẽ taeshũ tsakanamei beaibukiri hatu yuikubaĩmisbuki. Senhor Deusũ habukiri eska hatu yuikiki, nĩkakãwẽ, habu hawẽ hãtxa yuishunikabubiakenã.

⁶ “Matuburã, ana meshu merã hawẽ unãmati mã namai mã ana shabakabi uiãma ishanai inũ haskashanai meshu merã Deusũ matu unãmakĩ haska inũbariai matu uĩmamawẽ taea matũ kushipa mã benushanaii, bari kai meshukainai keskairã, hawara mã unãbiaima ha shabatiã meshu meshuwai keskairã.

⁷ Deusũ hãtxa yuishunika inũ haskashanai unãtirubu dasibi hamẽshãkanikiki. Hatũ shinã benushinabũ hatuki kasheaibũ Deusũ hatu kemamawẽ taea dakei pes manishãkanikiki, hawa yuiamarã.

⁸ Hamẽ ea Miquéiasrã, Senhor Deusũ hãtxa danãkĩ Israelĩ enabũ txakabuwakubaĩmisbu hatu berabĩwãkĩ hatu yuãkĩ ẽ hatu ha akubaĩshanũ ea kushipa inãkĩ datetima ea wakĩ Senhor Deusũ Yushinĩ hawẽ yunuti kushipa pepawẽ ea amakubainikiki. Ea haska wakĩ heneama ipakeikiki.

Jerusalém txakabuwashãkanikiaki, na hãtxarã

⁹ Israelĩ enabu shanẽ ibubu inũ yununikabuũ, ikis ana eska nĩkakãwẽ. Yunuti kushipa pepa danãkĩ betxipaiama hawara pepa dasibi yushtumabiakẽ mã yushtu wakĩ keyumis keskabuki, eska tibi akinã.

¹⁰ Tsuabũra matu nemaibu detekĩ hatũ himi txakawakĩ nukunabu itxakawakĩ Mati Sião anu kebẽkĩ nukũ mae Jerusalém anu hau benikubainũbũ mã hatu yunua txakabuai dayakubaĩkanikiki.

¹¹ Shanẽ ibu beshmas unãti wanikabũ nukũ mae anushũ hune pei bikatsi hatũ txakabu pewakĩ hatu parãmisbuki. Deusbe nukunabu hãtxashunikabũ hatu yusĩkinã, pei binũ ishũ besti hatu yusĩkubaĩmisbuki. Hamẽ Deusũ hãtxa yuishunikabũ Senhor Deusũ haska akaiwẽ benimawai dabanẽ Deusũ unãmashina yuikatsi pei bitã hatu yuikĩ: “Nukũ shanẽ ibu Senhor Deusrã, nukubeki, nuku mekekubainairã. Nuku merabewamiswẽ taea hawa txakabu nuku anu hutirumaki”, iwanã, “hatu yuimisbuki.

¹² Matubũ mã kanekubainaiwẽ taeshũ Mati Sião anu maewã Jerusalém berãkĩ keyuaibu betsai mishki besti hanus mania bai wanishũ ana akatsi heneyuimabu keska anu mananã hanu Deuski nukuti hiwe wanibu anu txaka besti benea hawama dakashanikiki.”