Miquéias 2 - Kaxinawá Bíblia (BR)

Kushipakĩ hatu itxakawaibu Senhor Deusũ hatu kupishanikiaki, na hãtxarã

¹ Namawẽ dikabi txakabu yubakakubainaiburã, peirashãkãwã! Matũ kushipawẽ mã atirubuwẽ taea ha shaba mã akaitiã bestẽtã mã hatu txakabuwakubaĩmisbuki.

² Hatũ yunu bai pepa ibuyabiakẽ hawẽ kemukĩ biãkĩ mã hatu mebĩmisbuki. Hatũ hiwe pepa anu ibu hiwebiakẽ kemukĩ biaĩ mã yumetsumisbuki. Baiya hatũ bake heneshũbaĩshanaibu ha yurabu hawenabuyabis hatu itxakawakĩ mã hatu nuitapawamisbuki.

³ Mã haska hatu wamisbuwẽ taeshũ Senhor Deusũ matu yuikĩ: “Matũ besti mã hatu itxakawamaki. Eari matuki tana ẽ yubaka hayaki. Matu anuri txakabu ẽ yunushanai hani pashama hawẽ huĩsinai peti mã hawa binuama ishanaii. Hakia ma dasibi txakabu bika tenemati hukẽ ana keĩ hawẽruai mã bai tanai mapuama ishãkanaii.

⁴ Ha shaba haskaitiã mã hatũ shanẽ ibububia nui paewẽ kashakĩ matunabu saĩ ikĩ kashakĩ matukiri habuwashãkanikiki: ‘Dasibi ma nuku txakabuwakĩ keyuabuki. Nukũ mai pakea Senhor Deusunabiakẽ huni betsabũ ma nuku ibuwaĩmabuki, mã hawa hatu nemamarã. Nukũ yunu bai dasibi mebĩtã nukuri atxitã nuku ma pashkakĩ keyuabuki, ibuwãkinã’, iwanã, kashabetanã matu ha akubaĩshãkanikiki”, hatu wanikiaki.

⁵ Haskawẽ taea Senhor Deusũ maewã matu inãbiani ana hawenabui hawẽ mae anu mã habe hiweama ishãkanaii.

Deusũ hãtxa yuishunika txakabubiakẽ betxipainibukiaki, na hãtxarã

⁶ Paranananikabũ yuikĩ: “Haska txakabu hushanai hau nukuki ana txani beyamanũbũwẽ. Ha txakabu hatũ nuku dake watiru huama ishanikiki”, ikaibũ

⁷ Nũ Jacó enaburã, tsuã nuku yuputirumaki. Deus hĩ hĩ ikama teneshũ nuku manamisrã, ma benuamẽ? Haskamismẽ, Deusrã?” ikaibũ hakia Senhor Deusũ yuikĩ: “Tsuara hiwei pekubainaibu ẽ hãtxã hatu merabewakubaĩmiski.

⁸ Uatiã enabu ibiashina shinã betsa watã natiã mã eki sinataii. Habu detenametani txĩtũbirãkĩ hatũ tari pepa karuhaira beaibu mã hatu mebĩmiski, tsuã matu ana metiruma dabanẽ shinãkinã.

⁹ Hatũ hiwe betxipaiaibu anua aĩbuaibu hatu nitxĩkĩ hawẽ pepati mai ẽ hatu ibuwamani anu hatũ bakebu ana hiwetirubuma wakĩ mã hatu biãkĩ nemakubaĩmiski.

¹⁰ Na maerã, hanu huĩrukũti kayabimawẽ taea benitã burikãwẽ. Nenu atimapahairawẽ taeshũ txakabuwakĩ yamawakĩ keyushãkanikiki.

¹¹ Tsuara txanitxakakĩ yuikĩ: ‘Vinho inũ shia paepa mã ea inãkubainaya Deuskiri ẽ matu yusĩkubaĩshanaii’, ikaya na yurabũ haska txakabu betxipaikĩ ẽ hãtxa yuishunika hatu wai haska hatũ shinanã, pehairaki, ishãkanikiki”, itã,

Senhor Deusũ hawenabu ana itxawatã hatu iweshanai hatu yubanikiaki, na hãtxarã

¹² Senhor Deusũ ana hatu yuikĩ: “Itxakanikabu hatu kupi keyutã Jacó enabu dasibi ana hatu itxawakĩ ha Israelĩ enabu txai hatu iyunibu hatira itxapama teshenibu ẽ hatu itxawashanaii. Txashuwã kenekauana anu mapuabu inũ basi mirima anu mapuabu keska ẽ hatu itxawaya yurabu mirima benimai hãtxa txakayamashãkanikiki.

¹³ Deus bebukaĩkĩ hawẽ bai bepẽbainaya habũ txibaĩ maewã kenebaunibu hikiti shui hawẽ beputi anua tashni ishtxubaĩbaĩshãkanikiki. Dasibi hatu bebũ ẽ hatũ shanẽ ibu Senhor Deus kaya ea itxũ bushãkanikiki”, iwanã, ea yuimaki.