Marcos 9 - Kaxinawá Bíblia (BR)

¹ ana hatu yuikĩ: —Txanima ẽ matu yuiai nĩkakãwẽ. Na habia mã ebe mapuaburã, betsabu mã mawariamakẽ Deus Shanẽ Ibui taei kuxipahairai mã uĩshanaii— hatu anikiaki.

Jesus hawẽ yura damitã hatu uĩmanikiaki, na hãtxarã

² Hanua ana seis dia binuaya Pedro inũ, Tiago inũ, João Jesusũ katubaĩkĩ hatu iyui kakĩ mati keyatapahaira mapeketã hanua hatu bebũ Jesus dami

³ hawẽ tari hushupahairai txashahairai tsuã tari patsakĩ hushupa wakĩ haska waisma keskai ikaya

⁴ haskaya habianuri Elias inũ Moisés Jesusbe hãtxai uĩ

^5-6 datehairaibũ harakiri xinãtima Pedrõ Jesus yuikĩ: —Yusĩnaã, nũ nenu huarã pehairaki. Peã shubu dabe inũ besti matu washũpa, betsa mina inũ, betsa Moisésna inũ betsari Eliasnarã?— ikaya

⁷ hanua samama nai kuĩ bekĩ hatu bepuaya nai anua hui tashnikĩ yuikĩ: —Narã, ẽ bakeki. Ẽ abuhairaii. Nĩkairakubaĩkãwẽ— hatu waya

⁸ samama beru beru ikĩ uĩ ha habe mapukãshu ana niama Jesus besti nia uĩaĩbũ

⁹ hanua mati keyatapa butebirãkĩ Jesusũ hatu yuikĩ: —Ẽ matũ Hutxi Kayabi Iuwa matu mawashũtã ẽ ana matu bestẽshũriamakẽ hawara na haska mã uĩshurã, tsua yuiyamayushãkãwẽ—

¹⁰ hatu wa tsua yuiama hatũmebi yuinamekĩ: “Mawatã ana bestẽshanairã, haskaramẽ?” ishũ

¹¹ ana hawẽ tsumabũ Jesus yukakĩ: —Yusĩnãbũ hatu yusĩkĩ Deusũ hãtxa kenenibuwẽ hatu yuikĩ: “Nukũ mekenã Cristo huriama bebũkiri Elias hushanikiki”, ikirã, haskai imisbumẽ?— akabu

¹² hatu kemakĩ: —Txanima Elias bebũkiri ana hushũ dasibi benawakĩ pewakĩ taewaimaki. Ha dikabi, Deusũ hãtxa yuishunikabũ kenekĩ: “Deusũ bake hatũ Hutxi Kayabi Iuwarã, habũ danãkĩ itxakawabu nuitapashanikiki”, arianibuki.

¹³ Hakia eãnã, ẽ matu yuiaii. Eliasrã, ikũ ha dukũ huimashũ hatu yusĩayã danãkĩ Elias Deusũ hãtxa yuishunika itxakawakĩ haskarashanaikiri Deusũ hãtxa yuishunikabũ bebũkiri hakiri kenenibu akĩ habiaskari wakĩ itxakawaimabuki— hatu abirani

Huni bake yushĩ txakabuya Jesusũ kaĩmanikiaki, na hãtxarã

¹⁴ hanua Jesus hawẽ tsuma betsabuki nukunũ ika hui hanu yurã kaiã hawẽ tsumabuki itxa Deusũ hãtxa kenenibu yusĩnanãmisbube hatube itxa yuinameakeakeaibu Jesusũ uĩkubiranaya

¹⁵ Jesus huai dasibibũ uĩ benimahairai kuxibaini haki nukushũ yukakĩ: —Mĩ ma huai?— akabu

¹⁶ hanushũ Jesusũ hatu yukakĩ: —Hawai Deusũ hãtxa kenenibu yusĩnanãmisbube harakiri mã hãtxawẽ yuinamei ikai?— hatu waya

¹⁷ nĩkatã huni betsã yuikĩ: —Yusĩnaã, ẽ huni bake yushĩ txakabũ huyu wani ẽ mia anu iweshuki.

¹⁸ Ha yushĩ txakabũ atxishũ dushku imakĩ tĩ imatã mai pusama dashka dashka iki bakushyai sheta yẽsh yẽsh iki bakush kebus iki txarix txarix imakĩ haska wakĩ babu wakubaĩmiski. Haskamiskẽ: “Hau yushĩ txakabu ea kaĩmashunũbũ ika”, mĩ tsumabu ẽ hatu xinãbiabirana tsuã hawa ea kaĩmashũtirubumaki— aka

¹⁹ mapuabu Jesusũ hatu yuikĩ: —Ikũwaĩsbumaã, hatiki matu merabewai ana ẽ matube hiweyushanai? Neri iwekãwẽ, ha bakerã— aka

²⁰ iweaibũ yushĩ txakabũ Jesus betxitã ha huni bake ana dushku ima maĩ tĩ itã taka taka iki kemu bus bus ikaya

²¹ Jesusũ hawẽ epa yukakĩ: —Hatiã berukui taenimẽ?— aka hawẽ epã yuikĩ: —Bakeixta iki taeniki.

²² Ha yushĩ txakabũ tenãnũ, iwanã, hawẽtxaĩs txi merã napukĩ inũ hene merãri pukumiski— atã —Hamapai mĩ atiruwẽ taeshũ ẽ bake mĩ ea shushawashũtirumẽ? Nukuwẽ nuikĩ mĩ atirurã, ea merabewawe— aka

²³ Jesusũ yuikĩ: —Ẽ mia merabewatirurã, mĩ xinãmamẽ? Mĩ ea ikũwãyã hamapai betsa betsapa ẽ mia ashũtiruki— aka

²⁴ hawaira hawẽ epã unãshubima yuikĩ: —Ẽ mia ikũwaiĩ. Ana ẽ ikũhairawanũ uĩmakĩ ea merabewawe— aka

²⁵ yurã kaiã itxabirãbiranaibũ uĩkĩ Jesusũ yushĩ txakabu yuikĩ: —Yushĩ pata wakĩ inũ huyu wamistuũ, ha huni bake meranua kaĩrikaĩtãwẽ. Txĩtũkirã ana haki hikiyamashãwẽ— akaya

²⁶ yushinĩ bis imatã ana dushku imabaini kaĩkainaya ha huni bake mawa keska dakakẽ itxapabũ yuikĩ: “Ma mawaki”, ikaibũ

²⁷ hanushũ Jesusũ metsũshũ benia benikãwã nikẽ

²⁸ hanua Jesus hiwetã hikiaya hawẽ tsumabus habe hikibaĩ ana yukakĩ: —Haskakĩ ha yushĩ txakabu nukũ nũ kaĩmatiruma ishumẽ?— akabu

²⁹ Jesusũ hatu kemakĩ yuikĩ: —Na eska yushĩ txakabu kaĩmakinã, Deus dayuikĩ ea a bestikubaĩkĩ mã kaĩmatiruki— hatu watã

Mawashanaikiri ana ha katxu Jesusũ hatu yuinikiaki, na hãtxarã

^30-31 hanua Jesus hawẽ tsumabu besti tari iyushũ yusĩnũ ika yurabu uĩmama hatube hune kai Galiléia napaibaini kakĩ hatu yusĩkĩ: —Ẽ matũ Hutxi Kayabi Iuwarã, tsuãra ea hatu atxima ea tenãbu shaba dabe inũ bestitiã ẽ ana bestẽshanaii— hatu wa

³² haska hatu yuiai hawẽ tsumabũ hawa nĩkamahaira hawa yuiai dabanẽ datekĩ Jesus ana hawa yukama inibukiaki.

Tsuãra hatu binũtirukiri Jesusũ hatu yusĩnikiaki, na hãtxarã

³³ Hanua Cafarnaum mae ewapanu bei hiwetã hikiabũ Jesusũ hatu yukakĩ: —Bai tanabiranirã, hawakiri mã yuinamekubirãkãshumẽ?— hatu wa

³⁴ bai tanabirani hãtxai yuinamekubirani: —Jesusbe shanẽ ibukĩ nukunã, haratu betsã nũ matu binũshanimẽkaĩ? En eamẽkaĩ?— iki yuinamekãshu dakei hawa yuiama pes maniabũ

³⁵ Jesus tsaushũ hawẽ 12 tsumabu kenashũ yuikĩ: —Haratura mã shanẽ ibu pepa ikatsis ikairã, ha dukũ yura dasibibu merabewakĩ hatuwẽ nuikĩ habũ tsuma keska ikubaĩkĩ hau hatu duawakubainũbũwẽ— hatu watã

³⁶ hanushũ bakeixta betsa hawẽ tsumabu naxui abirã iweshũ ikushũ hatu yuikĩ:

³⁷ —Ea duawanũ, iwanã, na bakeixta keska wakĩ tsuara ẽ kenaya huairã, ikĩ ea akawakĩ mã duawatiruki. Habiaskari wakĩ ea besti duawama hatũ ea yununi Deusri habũ duawashãkanikiki— hatu waya

Tsuãra nuku danãma nukũ haibuki, anikiaki, na hãtxarã

³⁸ Joãonẽ Jesus yuikĩ: —Yusĩnaã, huni betsã mĩ kena kuxipa paewẽ yushĩ txakabu kaĩmai nũ uĩbirãxinaki. Nukubetã mia txibãmakẽ nũ nemakĩ nũ beshtepaibia nuku nĩkama ixiãki. Hari nũ nemaxinarã, pemẽ?— aka

³⁹ Jesusũ hatu yuikĩ: —Nemakĩ mã hatu beshtetirumaki. Tsuara nukuki sinatamarã, nuku merabewaikiki. Hawara atimaska yurabũ atirubuma ẽ kena kuxipawẽ abiakĩ samama ekiri txakabu yuitirubumaki.

⁴⁰ Ha inũ, tsuara nukuki sinatamarã, nuku merabewaikiki.

⁴¹ Ha inũ, mã ea ikũwaĩbuwẽ taeshũ hamapai tibiwẽ matu duawakĩ ũpash amai keskawẽ matuwẽ dabanã ikĩ matu inaĩburã, ikũ Deusũ hatu duawashanikiki, pepawẽ manakukinã— iwanã,

Tsuãra hawara txakabu hatu memairã, mesekiaki, na hãtxarã

⁴² habias bake ikushũ ana hawẽ hatu xinãmakĩ yusĩkĩ: —Tsuabũra hawara Deusũ nemamis inũ yunumis txibãma txakabu wamisbũ bake mixtĩbũ ea ikũwaĩ hatu parãkĩ txakabu hatu amakeakeriamisburã, haskawẽ taeshũ Deusũ hatu kupihairashanaiwẽ taea hawẽ shekiwã deneti mixki ewapa neshashũ teumatã iãnẽwã merã pukua hasarã, hawẽ kupiti beshmas mekeanaii.

^43-48 Haska mã ikatsi ikamarã, hawãra matu txakabuwamis beshtekekĩ hawaira henerikubaĩkãwẽ. Hanua mĩ mekẽ betsa kasmai mĩ tae betsa kasmai mĩ beru betsa kasmai haratuwẽra mia txakabuwamis ha meshtekea keskakĩ hamapai txakabu mã imis inũ mã amis tibi hawaira beshtekei henetiki. Mĩ mekẽ dabeya kasmai mĩ tae dabeya kasmai mĩ beru dabeyarã, hanu txi nukaisma anu inũ hanu nami shena debuisma anu txi merã mia puta pemahairaki. Hakia mĩ mekẽ bestitxaiya inũ mĩ tae bestitxaiya inũ mĩ beru bestitxaiyarã, Deus anu niti ikama mĩ hiwenũbariai pehairaki.

⁴⁹ Txi keskawẽ mã ikũwaĩbu tibi txushakĩ akawakĩ matu bika tenemashãkanikiki. Matu haska wabiabu Deusũ hawẽ kuxipawẽ matu mekea mã kuxipashanaii, tewẽ nami mekemis keskairã.

⁵⁰ Tewerã, nami txaputima wati inũ nami meketibia payukui keyumiski. Matubunã, Deusũ hãtxa mã unaĩbuwẽ taeshũ matunabu yusĩ mã tewe batawẽ meketi keskabuki. Hakia haskai tewe hawẽ bata keyu bumis ana meketiruma keskama Deusũ hãtxa nĩkakĩ pewatã ea txibaĩbube merabenaĩ unãnuma hiwekubaĩshãkãwẽ— hatu anikiaki.