Marcos 8 - Kaxinawá Bíblia (BR)

Jesusũ 4.000 yurabu pimanikiaki, na hãtxarã

^1-2 Hanushũ ana shaba betsatiã yurã kaiã Jesusũ hatu yusĩkubainaya ma shaba dabe inũ besti kaya hatũ piti ma keyuabu hania pitibumakẽ Jesusũ hawẽ tsumabu kenashũ yuikĩ: —Ma shaba dabe inũ besti ea nĩkakĩ hatũ piti ma keyuabuwẽ taea ẽ hatuwẽ nuiaii.

³ Hatũ hiwe anu piti mais ẽ hatu nitxiã bui bai putxinĩ anua punu nukai babui unãyamastirubuki, betsabu txaikea bexiãburã— ikaya

⁴ hawẽ tsumabũ Jesus yuikĩ: —Nenu tsua hiweabumaki. Hania piti bishũ nũ hatu pimatirumabĩ— akabu

⁵ Jesusũ hatu yukakĩ: —Hati misi mã hayamẽ?— hatu wa —Seteki— akabu

⁶ hanushũ Jesusũ ha yurã kaiã yuikĩ: —Ha maĩ tsaubaũkãwẽ— hatu watã ha sete misi bishũ Deus kẽwãtã tũke tũke akai hawẽ tsumabũ bibaĩbaĩkĩ ha yurã kaiã hatu inãkeakeaibũ

⁷ hanua baka eskarabesri haya Jesusũ bishũ Deus kẽwãriatã tekepakeriakĩ hawẽ tsumabu inã habũ hatu inãkĩ mebesa

⁸ hanushũ dasibibũ yaniwai benimai pepeaibũ ha pikãshu piti teshea itxawakĩ sete kuki matawabũ

⁹ hanua 4.000 yurabũ pikĩ keyuabũ Jesusũ hatu yunukĩ: —Ẽ ma kai buritãkãwẽ— hatu watã

¹⁰ hanua hawẽ tsumabubes shashũ nanetã bui Dalmanuta mai pakeakiri bunibukiaki.

Hawara hawẽ unãmati dami atimaska fariseubũ Jesus yukanibukiaki, na hãtxarã

¹¹ Hanua fariseubu Jesus anu beshũ habe ha inũ, iwanã, unãti wakĩ yuikĩ: —Deus anua hawẽ unãti dami nuku ashũwẽ, mĩ hawẽ kuxipa haya nũ uĩnunã— akabu

¹² Jesus huĩti nixmashũ hatu yuikĩ: —Haskakĩ hawara Deusũ besti damiwatiru uĩnũ ishũ mã ea yukai? Ikũ ẽ matu yuiai nĩkakãwẽ. Hamapai betsa uĩmakĩ ẽ ana matu ashũtaskamaki— hatu watã

¹³ hanushũ hatu henebaini shashũ nanetã ana txĩtũkaini iãnẽwã kesha betsauri hawẽ tsumabu hatu iyua

¹⁴ hanua bui misi hakimabaini hawa piti buama misi bestitxaiya besti shashũ buaibũ

¹⁵ Jesusũ bebũkiri hatu banabimakĩ yuikĩ: —Fariseubu inũ shanẽ ibu Herodesĩ misi shasha wati meseki. Uĩrakubaĩkãwẽ— hatu wa

¹⁶ hatu haska wa hamakiri xinaĩ hawẽ tsumabu yuinamei: —Nũ misi beama ishukẽ nuku haska nemaikiki— ikaibũ

¹⁷ haskakiri yuinamei hãtxaibu unãtã Jesusũ hatu yuikĩ: —Haskai bushka kuxikĩ mã nĩkariabumamẽ? Haskai: “Nũ misi beama ishukẽ haska nuku yusĩkiki”, iki mã yuinamekanai?

¹⁸ Mã beruyabia hawara ẽ matu ashuaĩ mã uĩ pewama ikũkainaii. Mã pabĩkiyabia hawara ẽ matu yusĩaĩ mã nĩka pewama iriakũkainaii.

¹⁹ Eska uĩbiairã, misi mekẽ besti tũkepakeshũ 5.000 hunĩ kaiã ẽ hatu pimarã, hati kuki hawẽ teshe mã itxawaxinamẽ, ha pitirã?— hatu wa —Doze kaĩ— akabu

²⁰ —Hanua betsarã, sete misi tũkepakeshũ 4.000 ẽ hatu pimarã, teshe waburã, hati kuki mã matawaxinamẽ?— hatu wa —Sete kaĩ— akabu

²¹ hanushũ Jesusũ hatu yuikĩ: —Matunã, haskakĩ mã tapĩriabumamẽ?— hatu wabaini

Betsaida anushũ huni bekũ Jesusũ shushawanikiaki, na hãtxarã

²² hanua bui mae betsa Betsaida anu hikiabũ huni bekũni hau shushawanũ Jesus anu iweshũ ea ashũkĩ: —Haki bemepiwe— akabu

²³ huni bekũ metsũbaĩkĩ benãta iyushũ hawẽ beruki kemu mitxushũ bemepitã metseketã yukakĩ: —Haskara mĩ uĩaĩ?— aka

²⁴ bepeshe mirĩtã yuikĩ: —Hunibu uĩbiakĩ hi mapua keska buanaibu ẽ hatu uĩaiĩ— aka

²⁵ Jesus ana hawẽ beruki mepia hanũkaĩ ma shusha shabakabi dasibi uĩkĩ pewaya

²⁶ Jesusũ hawẽ hiwetã nitxĩkĩ yuikĩ: —Na mae anu ana hari kama mĩ hiwe anu inũ kariwe— abainikiaki.

Mĩ nukũ Messias Cristoki, akĩ Pedrõ yuinikiaki, na hãtxarã

²⁷ Hanua Jesus hawẽ tsumabube kai Filipẽ mae Cesaréia txaima anu ana bai tanabaĩkĩ hawẽ tsumabu yukakĩ: —Yurabunã, ẽ tsua ekiri yuimisbumẽ?— hatu wa

²⁸ hawẽ tsuma betsã yuikĩ: —Betsabũ mikiri yuikinã: “Naximanika João ana bestẽxinaki”, mia wakanikiaki. Betsabũri yuikĩ: “Elias ana huxiãki”, mia wariakanikiaki. Betsabũri yuikĩ: “Deusũ hãtxa yuishunika betsa ana besteĩmaki”, mia wariamisbukiaki— akabu

²⁹ hanushũ Jesusũ haburi yukakĩ: —Hamẽ matũ xinãkinã, mã tsua ea yuimismẽ?— hatu waya hanushũ Pedrõ hatu yuishũkĩ: —Miarã, mĩ nukũ mekenika Messias Cristoki— akaya

³⁰ Jesusũ hatu nemakĩ: —Ẽ Messias Cristoki tsua banabimayamayushãkãwẽ— iwanã,

Jesus mawashanai bebũkiri hatu banabimanikiaki, na hãtxarã

³¹ Jesusũ ana hatu yuikĩ: —Deusũ bake ẽ matũ Hutxi Kayabi Iuwarã, ea nuitapawashãkanikiki. Eki sinatakĩ ea itxakawakĩ mae shanẽ ibubu inũ, Deusbe nukunabu hãtxashunika shanẽ ibubu inũ, Deusũ hãtxa kenenibu yusĩnanãmisbũri ea danãkĩ ea hatu tenãmabu dabe inũ besti shaba kaya ẽ ana bestẽshanaii— akĩ

³² haska wakĩ hatu shabakabi yuiai nĩkatã Pedrõ Jesus ha mesti pashkabaĩ nemakĩ yuikĩ: —Mĩ haskatirumaki— aka

³³ Jesus hawẽ tsumabukiri nasauketã uĩkĩ Pedro nemakĩ yuikĩ: —Satanásã xinãwẽ mĩ ea nemaii. Ana hari haskayamawe. Hawara Deusũ uĩaĩ keska mĩ uĩyamaki, eska xinãkinã, haska yurabũ uĩmis keskawẽ mĩ ea nemairã— atã

³⁴ hanushũ Jesusũ hawẽ tsumabu inũ yurabu habe buaibu kenashũ yuikĩ: —Tsuabura eki txiti ikatsis ikirã, hamebi haska xinãmis hakimatã: “Bika tenei ẽ hawẽ taea mawatiruki”, ikĩ hau ea txibãkubainũbũwẽ.

³⁵ Hamẽ tsuabũra xinaĩ: “Ẽ mawakatsi ikamaki”, iki hatũmebi mekeaiburã, eauma mawakĩ hatũ hiwea benushãkanikiki. Hakia ea ikũwãkĩ ẽ kakape yusĩkĩ ea txibaĩwẽ taeshũ tenãbiabu hatũ hiwea benuama hiwekuĩshãkanikiki.

³⁶ Haska inũ, haskati dabanẽ yurabũ xinãma mai anua mabuwẽ inũ hamapai tibiwẽ kemukĩ itxawai hiwemisburã, haburi eauma mawai benushãkanikiki.

³⁷ Ha inũ, hawara inãnanãkĩ hawẽ hiwea pakatã hawẽ hiwekuĩti tsuã bitirubumahairaki.

³⁸ Haska inũ, tsuabura na yurabu txakabu bebunua eki inũ ẽ hãtxaki dakemisburã, ẽ Epã kuxipaya hawẽ nai tsuma pepabube hua habiaskariai ẽ hatuki dakeriashanaii— iwanã,