Marcos 7 - Kaxinawá Bíblia (BR)

Hawara atimapa nũ xinãmistũ nuku txakabuwamiskiaki, na hãtxarã

^1-4 Fariseubu inũ judeubu dasibibũ hatũ shenipabũ beyakiri matu yusĩnũ nĩkakãwẽ. Habũ shenipabũ beya tibi txibãkĩ fariseubu inũ judeubu dasibibũ piriama mepanui taemisbuki, txakabu nemairã. Haska inũ, piti bitani hui hikitã hawẽ beyawẽ taea hatu meushkeabu mepanukubaĩmisbuki. Haska inũ, hatũ shenipabũ beya betsa betsapa txibãkĩ hatũ kẽtxa datxukĩ hatũ xumu napãkĩ hatũ mane kẽtxa datxukĩ hatũ dakati ũpashwẽ bewax bewax atã tere amisbuki. Haska hatũ shenipabũ beya txibãkĩ akeakekubaĩmisbuki. Haska wamisbuwẽ taea fariseubu inũ Deusũ hãtxa kenenibu yusĩnanãmisbu Jerusalém anua bexiãbu Jesuski kemashũ uĩkĩ haska hatũ shenipabũ beya txibãma Jesusũ tsumabũ piriama mepanuabuma piaibu uĩkĩ hatu yuãkĩ

⁵ Jesus yukakĩ: —Haskakĩ mĩ tsumabũ nukũ shenipabũ beya txibãma mepanuma pikanimẽkaĩ?— akabu

^6-7 Jesusũ hatu yuikĩ: —Mã yusĩmis keska akama mã beparamemisbukiri ikũ bebũkiri Deusũ matukiri yuikĩ: ‘Na yurabunã, hatũ hãtxawẽ ea kẽwãbiakĩ hatũ huĩtiwẽ ea xinaĩsbumaki. Ha inũ, itxatã hawa ea kẽwãkĩ pewaisbumaki. Hakia hunibũ yunuawẽ besti hatu yusĩkubaĩmisbuki’, aka hawẽ hãtxa yuishunika Isaíasĩ nĩkatã keneniki.

⁸ Haska waniwẽ taea Deusũ yunua xinãkĩ txibãma yurabũ beya besti mã txibãmisbuki— iwanã,

⁹ ana hatu yuikĩ: —Matũ beya betsa betsapa besti txibãkĩ hakia Deusũ yununi xinãbiakĩ mã akĩ pewaismaki.

¹⁰ Eska Moisés yununi ana matu xinãmanũ nĩkakãwẽ: “Matũ epa inũ matũ ewa merabewakĩ hatu duawakubaĩkãwẽ. Hakia matũ ibubu mã hatu itxakawaya hau matũ shanẽ ibubũ matu tenãshanũbũwẽ”, abianikẽ

¹¹ haska xinãma matũmebi ibubis matũ hãtxa watã hatu yusĩkĩ: “Matũ ibubu hawarawẽ merabewati mabu mã haya mã haki tanabia Templo anu inãkuĩkatsi mã butiru mã xinãtiruki. Tsuã matu ana bikawatirubumaki”, akĩ mã hatu yunutxakamiski, nemakinã.

¹² Haska wakĩ hatu nemakĩ mã haska wakubainaibu tsuã ana matu yunu yunu atirubumaki, matũ ibubu mã merabewanũbunã, akĩ mã hatu yunumiski.

¹³ Haska wakĩ matũmebi ibubis beya betsa txibãti matuna watã Deusũ yununi hãtxa mã hatu hakimawamiski, yunuti betsa betsapa hatu maewashuãkeakekinã, hau ha txibanũbunã— hatu watã

^14-16 ana Jesusũ yurã kaiã kenashũ hatu yuikĩ: —Mã pabĩkiyabuki. Matu yusĩnũ nĩkakĩ peirawakãwẽ. Piti tibi yurabũ piabu hawa hatu hawẽ txakabuwaismaki. Hakia yurabũ huĩti meranua besti hawara txakabu tashnikĩ Deus hatu danãmamiski, yurabuki sinatamakinã— hatu watã

¹⁷ hanua Jesusũ yurã kaiã henebaini hawẽ tsumabube hiwetã hikiaibũ ha miyuiwẽ hatu yusĩshukiri ana hawẽ tsumabũ yukabu

^18-19 Jesusũ hatu yuikĩ: —Matũri mã nĩkakĩ tapĩriabumamẽ? Shabakabi matu yusĩnũ nĩkakãwẽ. Piti xarabu yurabũ piabu hatũ xinã merã naneama hawa hatũ xinã txakabuwatirumaki. Hakia piti xarabu piabu hatũ hatuki naneabu puiyabu kaĩmiski— iwanã —Haskakẽ piti xarabũ hawa hatu txakabuwatirumaki— hatu anikiaki. Haskawẽ taea hawara piti xarabu pikĩ nukũ puku anu nũ nanemisrã, pekiaki. Harã, hatũ Deus sinatamaismaki.

²⁰ Haskawẽ taeshũ Jesusũ ana hatu yuikĩ: —Yurabũ xinã meranua hawara txakabu hayabu tashnikinã, haskatũ hatu txakabuwamiski, Deus sinatamakinã.

²¹ Haska inũ, eska yurabu haya hatũ xinã uke merã aruabu txakabu xinãkĩ shabakabi tashnimamisbuki. Eska tibi shabakabi xinãwẽ kaĩkinã, kemukĩ hamapai tibi shebi hayabu txutabaũmisbuki. Ha inũ, yumetsumisbuki. Ha inũ, yura betsaki yubakatã tenãmisbuki.

²² Ha inũ, aĩyã inũ beneyabia betsabe txutanamemisbuki. Ha inũ, yura betsã mabuwẽ kemumisbuki. Ha inũ, txakabu betsa betsapa wamisbuki. Ha inũ, yura betsa parãmisbuki. Ha inũ, hatũ yurawẽ hawara pae tibi aki paeĩ txakabumisbuki. Ha inũ, yura betsa hawẽ hiwea keskama hatu uĩ huni betsa haska hayatirumawẽ nui hatuwẽ bika tenemisbuki. Ha inũ, txani txakabaũmisbuki. Ha inũ, ibubis xinaĩ keĩ: “Ẽ pepaki”, imisbuki. Ha inũ, yura betsawẽ nuikĩ duawakĩ merabewaisbumaki.

²³ Haska tibi yurabũ xinã anua tashnikĩ hatu txakabuwamiski, Deus sinatamakinã— hatu anikiaki.

Siro-fenícianawa aĩbũ ikũwaĩwẽ taeshũ Jesusũ merabewanikiaki, na hãtxarã

²⁴ Hanua Jesus kaĩkirani Tiro mae pakea anu hunekaĩ hikipanã tsuãra unaĩbũ hiwe betsa anu hikiaya

^25-26 hanua judeubuma Siro-fenícianawa aĩbu hawẽ bake yushĩ txakabuya Jesuskiri txaniaibũ nĩkabirani Jesuski nukushũ dãti itã yuikĩ: —Ẽ aĩbu bake yushĩ txakabu hayaki. Ea kaĩmashuĩ kawe— aka

²⁷ Jesusũ yuikĩ: —Israelbũ piti bishũ kamã anu putama ha dukũ hau hawẽ bababũ yaniwayunũbũ metirubumaki— aka

²⁸ hawẽ hãtxa nĩkatã Jesus ana yuikĩ: —Heẽ. Yusĩnaã, nũ kamã keskaki. Israelbũ besti tapukishũ piabũ hawẽ pese kamanẽ pimisbuki. Haska keskari wakĩ ẽ bakeri mĩ ea kaĩmashũtiruki— aka

²⁹ haska ikũwaĩ unãkĩ Jesusũ yuikĩ: —Mĩ pe yuiaya ẽ mia merabewashuki. Haskawẽ taea mĩ bake anua ma yushĩ txakabu kaĩkaĩshuki. Uĩritãwẽ— akaya

³⁰ kashũ hawẽ hiwe anu hikitã ha aĩbu bake ma yushĩ txakabu kaĩma pes daka uĩtuxinikiaki.

Huni patani inũ huyuni Jesusũ shushawanikiaki, na hãtxarã

³¹ Hanua Jesus Tiro mae pakeanu txĩtũtani Sidom dũkeataĩ Decápolis kesua anu Galiléia iãnẽwã kesha anu hikikẽ

³² hanua huni betsa patani inũ huyuni Jesus anu iyushũ ea ashũkĩ: —Mĩ mekẽwẽ haki mepitã nuku shushawashũwẽ— akabu

³³ ha isĩ teneai tari ha mesti metsũbaĩ Jesusũ iyushũ hawẽ metutinĩ pamistubukũtã hashpa watã hawẽ kemu hamitxutã

³⁴ naiuri besutã huĩsinakĩ yuikĩ: —Efatá!— iwanã, nukũ hãtxawẽ yuikĩ: —Hau pabepemenũwẽ— aka

³⁵ hawẽ pabĩki dabe ma pabepemea inũ hawẽ hanari ma hãpekea ma hãtxa kayabiaya

³⁶ Jesusũ hatu anu ana iyushũ hatu nemakĩ: —Tsua yuiyamayutãkãwẽ— hatu wabia kashũ yurabu betsa betsapa hatu banabimakeakeabu

³⁷ e itã Habaa! Yuu! ikĩ yuikĩ: —Jesusũ hamapai betsa betsapa pepa atiruki, patanibu nĩkamakĩ inũ huyuniburi hãtxamaikikirã— inibukiaki.