Marcos 6 - Kaxinawá Bíblia (BR)

Nazaré anu ana Jesus txĩtũkiranikiaki, na hãtxarã

¹ Hanua Jesus hari katani ana hawẽ mae hanua yumeni anu hawẽ tsumabube hikixinabũ

² sábado huĩrukũtitiã hanu judeubu itxamisbu anushũ hatu yusĩkĩ taewaya huni itxapabũ nĩkai e itã habaa! iki yuinamei: —Na hunirã, hanishũ haska tsuã hawẽ kuxipa tapĩxinamẽ, ha atimaska nũ atiruma aki unãnepahairairã?— iwanã

³ —Hakia narã, hi mabu wanikaki. Hawẽ ewarã, Maria inũ, hawẽ betsaburã, Tiago inũ, José inũ, Judas inũ, Simãoki. Hanua hawẽ puiburã, nenu nukube hiweriabuki— itã ikũwãma danaĩbũ

⁴ Jesusũ hatu yuikĩ: —Deusũ hãtxa yuishunika hushũ yurabu hatu yusĩayã betsa betsapabũ nĩkakĩ duawaibũ hakia hawẽ mae anu kashũ hawenaburi hatu yusĩria habũ hawẽ hãtxa danaĩbũ habiatiãri hawẽ hiwe anuabu inũ hawenabu betsabũ danãriamisbuki— hatu watã

⁵ hanushũ isĩ teneaibu eskarabes hatu mekĩ hatu shushawatã hawara atimaska Jesusũ ana hatu ashũkĩ hatu uĩmama

⁶ haska hatuwẽ nuikĩ yusĩbia habũ ikũwãbumawẽ taea huĩti nixmai e inikiaki. Mae urama hiweabu tibi besti anu kakũkaũkĩ Jesusũ hatu yusĩkubaũtani hushũ

⁷ hanushũ hawẽ 12 kuxipayabu kenashũ yushĩ txakabu kaĩmati kuxipa hatu yunukĩ huni dabe tibi yunuakeakekĩ yuikĩ:

⁸ —Kairã, mã eska baĩtanũbũ matu yuinũ nĩkakãwẽ. Mais butãkãwẽ, hawa buamarã. Hakia matũ mestẽti besti mã butiruki. Ha inũ, misi inũ, kapãkã inũ, haki pei aruti buyamashãkãwẽ.

⁹ Matũ tae pewetametia inũ tima tari mã saweaya besti bukãwẽ, ana betsa buamarã— akĩ

¹⁰ ana hatu yuikĩ: —Karã, hiwe bestitxai mae tibi anu hiweyushũ yusĩkubaĩtãkãwẽ. Hanushũ yusĩkĩ menetã mae betsa anuri maekubaĩshãkãwẽ.

¹¹ Haska inũ, hanishũra matu danãkĩ nĩkakatsi ikabumakẽ Deus hatuki sinatai unãti wakĩ hanua kaĩbaĩkĩ matũ tae anua mai kuru hatuki tabaĩshãkãwẽ, hau habiaskasi maninũbunã, hawa unãmarã— hatu wa nĩkatã

¹² hanua hawẽ tsumabu buake buakeshũ dabe tibi kashũ hatu yusĩ taewakĩ: —Deuskiri mã txakabumis henetã matũ xinã betsa warikãwẽ— hatu wakĩ

¹³ yushĩ txakabu kaĩmakĩ kaya wakubaĩkĩ isĩ teneaibu sheniwẽ dapushkĩ hatũ isĩ maĩwãkubaunibukiaki.

Naximanika João tenãnibukiaki, na hãtxarã

¹⁴ Hanua hawara Jesuskiri txaniakeakeaibu shanẽ ibu Herodesĩ nĩkatã hawẽ tsumabu yuikĩ: —Naximanika João mawaxina ana bestẽxĩshũ hawẽ kuxipa Jesuski maewa hatũ hawẽ kuxipawẽ atimaska hawa nũ atiruma Jesusũ hatu uĩmaikiki— ikaya

¹⁵ hanushũ huni betsã hawẽ xinãnẽ yuikĩ: —Ha Jesusrã, Elias ana huxiãki. Elias ikibikaĩ— ikaya betsãri yuikĩ: —Ha Deusũ hãtxa yuishunika nukũ shenipabube hiwepauni betsaki, ha Jesusrã— ikaibũ

¹⁶ Herodesĩ hatu nĩkatã yuikĩ: —Habaa! João ẽ hatu yunua teshteimaburã, ma bestẽxinamẽkaĩ— inikiaki.

^17-18 Herodesĩ eska xinãkĩ anirã, matu yuinũ nĩkakãwẽ. Bari betsatiã Herodesĩ hawẽ betsa Filipẽ aĩ Herodias mebĩmakẽ Joãonẽ nemakĩ yuikĩ: —Haskakĩ mĩ betsã aĩ mebĩtã mĩ aĩwaĩmamẽ? Haskatimahairaki. Aĩwãyamawe— akubainaya atimas hawẽ aĩkiri xinaĩ henekatsi ikama nuikĩ shanẽ ibu Herodesĩ hawẽ policiabu yunua João atxishũ mane dispiwẽ meneshtã bitxiti hiwe merã bitxiabũ

¹⁹ shanẽ ibũ aĩ Herodias Joãoki sinatakĩ hatu tenãmanũ ikaya

²⁰ hakia Herodesĩ haska João huni pepa unãkĩ hawẽ aĩ nemakubaĩkĩ dasibi hawẽ yusĩa nĩkabiakubaĩkĩ hawẽ xinã pewariama ikũkainaya

²¹ hanua hawẽ bari hanu kaini tashniaya hanushũ hatu beyusmakĩ nawamakatsis ikĩ habu hatubetã yunumisbu inũ, soldadobu shanẽ ibubu inũ, Galiléia anu pei itxapayabu hawẽ hiwe anu hatu itxawashũ hatu pimaya Herodiasĩ hawẽ bene parãkĩ João hatu tenãmakatsis ikaya

²² Herodiasĩ bake txipax hatu nawashũkĩ shanẽ ibu Herodes inũ ha hatu pimakĩ itxawa hatu benimawaya Herodesĩ hawẽ aniwa yuikĩ: —Hawara mĩ ea yuka ẽ mia inãshanaii— iwanã,

²³ yubakĩ ana yuikĩ: —Hawara betsa betsapa mĩ ea yuka nukũ mai pakea namakis pashkashũ ẽ mia yunutiruki— akaya

²⁴ nĩkatã txipax nawai maĩkaini kashũ hawẽ ewa Herodias yukakĩ: —Ewaã, hawa yukatãpa?— aka hawẽ ewã yunukĩ: —Naximanika João hatu teshtemashũ hau mia hatu bemashunũ ha ea atãwẽ— aka

²⁵ hawẽ epa shanẽ ibu Herodes anu hawaira ana hikikaĩ yuikĩ: —Na habiatiã Naximanika Joãonẽ bushka ea inãriwe, sapa kẽtxakirã— aka

²⁶ hawẽ huĩti meteshekei punu nukatã Naximanika João tenãkatsi ikamabia ha hatu pimaibu bebũshũ hawẽ aniwa ma yubai nĩkakãshũwẽ taeshũ hawẽ yuba binumakatsi ikama

²⁷ hakimamari ha soldado bitxiti hiwe anu hau katanũ shanẽ ibũ yunukĩ: —Joãonẽ bushka teshteshũ ea beshũtãwẽ— aka

²⁸ soldado kashũ bitxiti hiwe meranua João teshtetã hawẽ bushka sapa kẽtxaki nanebirã beshũ ha txipax inã ha txipaxã hawẽ ewa inãnikiaki.

²⁹ Haska wakĩ João tenãkãshu hawẽ tsumabũ nĩkatã beshũ hatu yukatã hawẽ yura bibaĩ maiwati anu maiwanibukiaki.

Jesusũ yurã kaiã pimanikiaki, na hãtxarã

³⁰ Hanua hawẽ kuxipayabu yunua butani Jesuski ana haki dasitã haska wakubaũtãxinabu Jesuski txaniakeakei meneabũ

³¹ yurã kaiã Jesuski itxabu hanishũ hawẽ tsumabũ pitirubumakẽ Jesusũ hatu yuikĩ: —Benãta hatu dapashkabaĩ haria huĩrukũyunũ bukãwẽ— hatu wabaini

³² hanua Jesus hawẽ tsumabubes shashũ inatã kai hanu tsua hiweabumanu buaibũ

³³ hakia Jesusũ hatu henebaini kakĩ mae tibi dũkebainai uĩ Jesus dũkenanaĩ betxibaini txibaĩ kuxibaini mae bestibu tibi anuaburi bui Jesus hikiriama habu dukũ bebũkiri hikia maniabũ

³⁴ Jesus shashuwẽ kai keti itã shashu anua butukaĩkĩ yurã kaiã uĩ hatuwẽ nuihairakĩ habu txashuwã uĩnikauma keskabuwẽ taea hatuwẽ dabanã ikĩ hatu yusĩ taewashũ betsa betsapawẽ hatu yusĩbaiaya

³⁵ hanua ma bari kaya hawẽ tsumabu Jesus dapi bushũ yuikĩ: —Ma bari kaikiki. Nenu tsua hiweabumaki.

³⁶ Na yurã kaiãnẽ habũ hania pitirubumaki. Ha mae urama tibi anua hau misi bishũ pitã hau haskarabaĩtanũbũ hatu nitxĩriwe— akabu

³⁷ Jesusũ hatu kemakĩ nemakĩ: —Haska hatu wama, matũ hatu pimakãwẽ— hatu wa hanushũ hawẽ tsumabũ yuikĩ: —200 xaba nũ dayai peiwẽ hatu misi bishũtãpa, hau pinũbunã?— akabu

³⁸ Jesusũ hatu yukakĩ: —Hati misi mã hayamẽkaĩ? Uĩtãkãwẽ— hatu wa bushũ uĩtãshũ yuikĩ: —Mekẽ besti misi inũ baka dabe besti nũ hayaki— akabu

³⁹ hanushũ hawẽ tsumabu Jesusũ yunukĩ: —Hatu itxawakeakekãwẽ. Ha basiki hau tsaunũbũ hatu yunukãwẽ— hatu wa

⁴⁰ hatu yunuabu hatiri shuku betsai 100 inũ hatiri shuku betsai 50 maniakeakebaunaibũ

⁴¹ Jesusũ ha misi mekẽ besti inũ baka dabe tsumashũ naiuri teskãshũ uĩkĩ pitikiri Deus kẽwãtã misi tũke tũke apakekĩ hawẽ tsumabu inãkĩ hatu yunua ha yurã kaiã inãbaunaibũ hanushũ baka daberi hatu inã hari hatu inã keyuabu

⁴² dasibibũ yani wai benimai pepeaibũ

^43-44 hanua ha misi mekẽ besti inũ baka dabe ha dabe hatu pashkashuna 5.000 hunibũ pikĩ teshe wakãshu itxawakĩ 12 kuki hawẽ tsumabũ mata wanibukiaki.

Jesus iãnẽwã bemaki bepai kainikiaki, na hãtxarã

^45-46 Hanua nuku dukũ bebũkiri iãnẽwã pukei Betsaidauri nũ hawẽ tsumabu kanũ shashuwẽ nuku yunua nũ kaya yurã kaiãri hatu nitxĩbaini mati anu ka Deusbe hãtxanũ ika ka Jesus ha mesti nikẽ

⁴⁷ mexu merã hawẽ tsumabu iãnẽwã namakis bui nunubainaibũ Jesus ha mesti maĩ nishũ uĩaĩyã

⁴⁸ hawẽ tsumabũ shashu tueĩ bikaibũ niwẽwã bekĩ shashu txishtekiri butã butanaya ma pena kemaya Jesus hatuki nukuyui iãnẽwã bemaki bepaikirãkĩ hatu daĩbaini

⁴⁹ ha iãnẽwã bemaki kaya uĩ yushĩ dabanẽ sai iki

⁵⁰ dateaibũ Jesusũ hatu hãtxawakĩ: —Ẽ eaki. Ewẽ dateyamakãwẽ— hatu watã

⁵¹ hanua hawẽ tsumabuki shashũ inaya niwẽwãnẽ iãnẽwã betxurũwaĩ maiãyã habu harakiri xinãtima hatu wa Habaa! iake iakekĩ

⁵² Jesusũ haska hatu misi pimai uĩbiabirãkãshu hawa hatũ xinã shabakabiriabuma haska tapĩriabuma inibukiaki.

Genesaré mae anuabu isĩ teneaibu Jesusũ hatu shushawanikiaki, na hãtxarã

⁵³ Hanua iãnẽwã pukei besusi bupanãbũ niwẽ hamakiri hatu bukĩ shutua mae betsa Genesaré anu keti itã hatũ shashu neshatã

⁵⁴ hanua butubainaibũ yurã kaiãnẽ Jesus unãtã

⁵⁵ mae kesua anua kuxibirãkĩ isĩ teneaibu hatũ baketiki bakebirãkĩ Jesus anu hatu iweabu

⁵⁶ hanũkaĩ mae urama tibi anua inũ bai putxinĩ hiweabu anua isĩ teneaiburi bai tanamabirãkĩ hanushũ hau Jesusũ tari metsanũ, iwanã, hatu Jesus ea ashuãbu hawẽ tari kesha ha isĩ teneaibũ metsatã dasibi maĩ kayakeakenibukiaki.