Marcos 14 - Kaxinawá Bíblia (BR)

Jesus atxishanũ ika yubakanibukiaki, na hãtxarã

¹ Ha Páscoatianã, Egito anushũ Deusũ yunua debuwanika nai tsumã nawã bakebu tenãkĩ nukũ shenipabu dũkebaini xinãmatitianã, usha dabe ma kemai misi shashama nũ pimis ma kemaya Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbũ Jesus hune parãshũ atxitã tenãnũ ika yubakaibũ

² hakia betsabũ hatu yuikĩ: —Nukunabu besiaibutiã meyamayushãkãwẽ, hawẽ taea berukubaũtirubukirã— inibukiaki.

Jesus aĩbũ sheni maukanikiaki, na hãtxarã

³ Txipu Betânia anushũ Simão yuraki txamini Jesusũ kaya waimatũ hiwetãshũ Jesus pimaya aĩbu betsã nẽkati bixtu hushupaki sheni inĩ pepa karuhaira hawẽ kena nardo beshũ tesketã Jesusũ bushkaki mauka haki hababainaya

⁴ ha habetã piaibu hatiritũ inĩ mayai shetekĩ uĩ haki sinatai yuinamekĩ yuikĩ: —Haska wakĩ ha sheni karuhaira hamẽ txakawakĩ maukashumẽ?

⁵ Hatu inãshũ 300 shaba daya pei bitã nuitapaibu merabewatibĩ!— ika aĩbuki ha ikaibũ

⁶ haki haskaibu Jesusũ hatu nemakĩ: —Na aĩbũ ea duawai haskakĩ mã dakewai?

⁷ Nuitapai matube hiweabu merabewakĩ mã hatu duawapaketirubuki. Hakia earã, hawẽtxaĩs mã ea duawapaketirubumaki.

⁸ Haskakẽ eki sheni ininipa maukakĩ na aĩbũ ẽ mawariama bebũkiri ẽ yura ea pewashuki, hau hawama ea maiwaxarashanũbunã.

⁹ Hakia ikũ ẽ matu yuiaii. Mai hirabi anushũ kakape ekiri txanibaũkĩ na aĩbũ ea ashu xinãkĩ yuiriabaũshãkanikiki, tsua hau hakimayamashanũbunã— hatu wai nĩkaxinabũ

Judasĩ Jesus hatu atximashanũ ika hatube yubakanikiaki, na hãtxarã

¹⁰ hanua Jesusũ 12 tsumabu betsa Judas Iscariotes Deusbe nukunabu hãtxashunika shanẽ ibubube hãtxai ka haska wakĩ Jesus hatu atximatiru Judas hatube yubakai

¹¹ nĩkai xinã txãkãkĩ pei inãkatsi yubabu txĩtũkirãkĩ: “Hatiã hanishũ ẽ Jesus hatu atximatirumẽ?” ikĩ xinãkubiranikiaki.

Bari kaya Jesusũ hawẽ henekĩ hawẽ tsumabubetã pinikiaki, na hãtxarã

¹² Ha bari Páscoa besi taemisbutiã ha dukũ txashuwã bake tesẽshũ taewamisbutiã habianuri misi shashama pikubaĩmisbutiã hawẽ tsumabũ Jesus yukakĩ: —Hani kashũ Páscoatiã bari kaya piti bawakĩ mia pewashũtãpa?— akabu

¹³ hanushũ hawẽ tsuma dabe yunukĩ yuikĩ: —Bui Jerusalém anu hikitã habianua huni betsã ũpash xumuwã iabainaiki nukutã txibãbaĩtãkãwẽ.

¹⁴ Mã txibãbaina hanu hikiai uĩtã ha hiwe ibu yukakĩ eska watãkãwẽ: “Nukũ yusĩnã nuku yunushurã, mia yukapa? Haratu dĩtu anushũ bari kaya ẽ tsumabubetã nukũ xinãmati Páscoa piti pipa?” mã wa

¹⁵ hanushũ dĩtu ewapa manaũri ma pewa matu uĩma hanushũ nukũ piti bawakĩ pewatãkãwẽ— hatu wa

¹⁶ hawẽ tsumabu kaĩbaini Jerusalém anu hikitã haska Jesusũ hatu yuishu keska ha huniki nukutã txibãbaini habe kashũ hiwe ibu yukatã hanushũ Páscoa nawakĩ piti bawakĩ menetã bushũ hatu itani

¹⁷ bari kai mexuaya Jesus hawẽ 12 tsumabube kai hikitã

¹⁸ tapu anushũ habetã piaibũ Jesusũ hatu yuikĩ: —Txanima ẽ matu yuiaii. Na habiatiã ebetã mã piaibunã, haratutũra mã ea hatu atximai kaii— hatu wa

¹⁹ hatu haska wai nĩkatã huĩti nixmai keyutã yukakĩ: —Habia ẽ eamẽ?— iaketaĩbũ

²⁰ ana Jesusũ hatu yuikĩ: —Mã ẽ 12 tsumabũ habias kẽtxaki mã misi pukushũ piaibunã, mã bestitxaitũ ea hatu atximai kaii.

²¹ Haskawẽ taea haska ekiri kenenibu txibaĩ matũ Hutxi Kayabi Iuwa ẽ haskai mawashanaii. Hakia ha hunĩ ea hatu atximai kairã, pemahairaki! Haskakẽ ha huni kaĩyãma inirã, pepakeanaii— ikaya

²² piti betsa keyuriabumakẽ Jesusũ misi betsa tsumashũ Deus kuxipa yukatã tũketã inãkĩ nuku yuikĩ: —Na misi betsarã, ẽ nami keskaki. Pikãwẽ—

²³ hanushũ kẽtxa vinho mata tsumashũ Deus kẽwãriatã hatu inãbauna uva bimi vinho abaunaibũ

²⁴ hatu yuikĩ: —Yura itxapabu merabewai mawakĩ ẽ himi ẽ hatu habashũshanaii. Na vinhorã, ẽ himi keskaki, hawẽ yubaka bena xinãmatirã.

²⁵ Txanima ẽ matu yuiaii. Ẽ Epa Deusbe shanẽ ibui ẽ ana huriama na uva vinho ẽ ana matubetã ayuama ishanaii. Abaũkãwẽ— hatu watã

Pedro datei paranãnaĩ kaikiri Jesusũ yuinikiaki, na hãtxarã

²⁶ habianuari Salmos Davĩ keneni betsa betsapa hatũ huiwẽ nawai menetã hanua Judasĩ hatu pashkabaĩkẽ Oliveiras Mati anu hatu iyushũ

²⁷ Jesusũ hatu yuikĩ: —Hawẽ hãtxa yuishunika ekiri Deusũ yuikĩ: “Txashuwã hatũ mekenika ẽ tenãyã hawẽ txashuwã datei pashai keyushãkanikiki”, aka nĩkatã kenenikẽ na habiatiã habiaskariai matu dasibibũ ea xinãma mã ea henebaini pashariakanaii, txashuwã keskairã.

²⁸ Hakia ea tenãbiabu ana bestẽtã hanu matuki nukunũ ika bebũkiri Galiléia anu ẽ matu kashũshanaii— hatu waya

²⁹ Pedrõ yuikĩ: —Miwẽ datei dasibi pashai keyuaibũ, eãnã, ẽ mia hawa henekĩ putamaki— ikaya

³⁰ Jesusũ Pedro yuikĩ: —Haskamaki. Ikũ kayabi ẽ mia yuiaii. Na habia mexu merã takara keu daberiamakẽ: “Ẽ ha unãmaki”, iki dabe inũ bestiki mĩ eki dakekĩ yui kaii— aka

³¹ ana unãshubima Pedrõ yuikĩ: —Haskamaki. Ẽ mibe mawabiai kai haskai ẽ miki dakeamaki— ikaya dasibibũri habiaskasri yui hãtxai keyutã

Getsêmani anu ka Jesus Deusbe hãtxanikiaki, na hãtxarã

³² Hanua Jesus hawẽ tsumabube kai mibã shuku betsa hawẽ kena Getsêmani mixkiwẽ kenenibu anu hikitã hatu yuikĩ: —Nenu habianu tsauyukãwẽ, ẽ Deusbe hãtxai kairã— ikaĩkĩ

³³ Pedro inũ Tiago inũ João besti iyui kai punu nuka hawẽtxaĩs huĩti meteshekei niti itã

³⁴ haburi yuikĩ: —Ẽ yurawẽ mawakĩ ẽ matu shunũbaĩshanai xinaĩ ẽ punu nukahairaki. Na habianushũ ushama ea manakãwẽ— hatu wabaini

^35-36 hanua kai benãta kakaĩ maĩ beui beti ishũ Deusbe hãtxakĩ yuka heneama yuikĩ: —Ẽ Epa Deusuũ, hamapai dasibi mĩ atiru ẽ unaiĩ. Ea haska waibu minaki. Ẽ mawayamanũ mĩ nematirubia ẽ xinaĩ keskawẽ ea akama mĩ xinãnẽ besti ea ashãwẽ— atã

³⁷ hanua hawẽ tsuma dabe inũ besti anu txĩtũkirã ushabuki nukutã hatu datekĩ Pedro yuikĩ: —Simãoneẽ, mĩ ushamẽ? Haskai hora bestitxai beru mestẽwãtã mã ea manatirumamẽ?

³⁸ Txanima matũ xinã pebia matũ yura babuwẽ taea mã punu nukaya matuki txakabu hikia mã kaneyamanũbũ Deusũ hau matu merabewanũ ushama habe hãtxakãwẽ— hatu wabaini

³⁹ ana habianuri Deusbe hãtxai kashũ habias hãtxa yuitani

⁴⁰ ana hua ma usha paẽ hatu atxia ushabuki nukutã ana hatu bestẽwã hawa hãtxa yuitima maniabũ

⁴¹ ana Deusbe hãtxatani hushũ hatu yuikĩ: —Haskaira mã usha nĩkama usha bestia mã huĩrukũsi ikanai? Uĩkãwẽ. Ẽ Deusũ bake matũ Hutxi Kayabi Iuwa huni txakabubũ ea atxi bei ma kemakanikiki.

⁴² Ma ea hatu atximai huikiki. Benirikãwẽ, nũ bunũbunã— hatu wabirani hatuki dasituxitã hatu yui

Judasĩ Jesus hatu atximanikiaki, na hãtxarã

⁴³ Jesus hãtxa meneriamakẽ Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbu inũ mae shanẽ ibubu betsabũ hatu yunua huni itxapa nupe txaipayabu inũ kuxati hiyabube Jesusũ 12 tsuma betsa Judas hatube hukĩ

⁴⁴ Jesuski nukuyukĩ Judas Iscariotẽ bebũkiri hatu yubakĩ yuikĩ: —Ha ẽ tãtsu akairã, haki. Atxishũ iyukãwẽ— hatu abirãshuwẽ taeshũ

⁴⁵ Judas Iscariotẽ Jesus betxituxitã haki nukushũ yuikĩ: —Yusĩnaã, ẽ miki nukuyuaii— iwanã, tãtsu akaya

⁴⁶ “Hakiaki, akãwẽ”, ibaĩ atxiaibũ

⁴⁷ Jesusũ tsuma betsã hatu mepãmanũ ika naxui ikaĩ hawẽ nupe txaipa sitã Deusbe nukunabu hãtxashunika shanẽ ibuhairatũ tsuma mapeshpaikĩ maebaĩ pashteaya

^48-49 Jesusũ hawẽ tsuma nematã ma haki nukuabu Jesusũ hatu yuikĩ: —Uatiã shaba tibi Templo hemaĩtĩ anushũ ẽ matu yusĩkubainai mã ea shabakabi atxiama ikubaĩxinabuki. Haskai natiã mexu merã yumetsu atximisbu xinaĩ hawẽ deteti nupe txaipaya inũ hawẽ kuxati hiya mã bekãshumẽ? Hamẽ mã ea akamaki. Deusũ hãtxa kenekĩ bebũkiri ekiri yuini haska menekĩ mã ea atxiaii— hatu waya

⁵⁰ hanua dasibi hawẽ tsumabu datekĩ Jesus besti henebaini pashai hunei keyubainaibũ

⁵¹ berunã betsa tari hushupa bestiwẽ yabukua ha pashama Jesus txibaĩ kai policiabu betsã atxipaikĩ

⁵² hawẽ tari besti tsumaya mepamai hawẽ tari pekabaini tariuma pashai hunekainiki.

Shanẽ ibubu Sinédrio anu Jesus iyunibukiaki, na hãtxarã

⁵³ Hanua Deusbe nukunabu hãtxashunika shanẽ ibubu dasibi inũ, mae yununika shanẽ ibubu betsabu inũ, Deusũ hãtxa kenenibu yusĩnanãmisbu habu dasibibu hanu Deusbe nukunabu hãtxashunika shanẽ ibuhaira Caifásĩ hiwe anu habu dukũ bua itxa maniabu anu Jesus iyukĩ hanu bitxiaibũ

⁵⁴ hanua Pedro datekĩ benãtashũ uĩkubaini ka shanẽ ibũ hiwe hemaĩtĩ anu Templo mekenikabube tsauwa txĩ yukĩ hune uĩayã

⁵⁵ hanushũ Deusbe nukunabu hãtxashunika shanẽ ibubu inũ Sinédriobu dasibi itxashũ Jesus hau tenãnũbũ hakiri txakabuhaira yuiaibuwẽ txanii hãtxa ikũ keska watã hawẽ unãti watã tenãkatsi benai maniabũ

⁵⁶ huni betsa betsapabũ hakiri txani txitebiakĩ hakia huni dabetũ habias txani yuiabumakẽ

⁵⁷ haskaibũ betsaburi benitã txani hakiri txitekĩ yuikĩ:

⁵⁸ —Nukũ nĩkakinã, Jesusũ eska yuiai nũ nĩkaxinaki. Matu yuinũ: “Na Deus kẽwãti mixki Templo hunibũ anirã, tekekĩ purekĩ keyutã usha dabe inũ besti kaya hunibũ akamakẽ ana ẽ benishanaii”, ikai nũ nĩkaxinaki— hatu wakeakeaibũ

⁵⁹ habũ habias txani txakabu hakiri yuiyabuma nĩkai haska washũ kupitima xinaĩbũ

⁶⁰ haska waibu nĩkatã Deusbe nukunabu hãtxashunika shanẽ ibuhaira Caifás namakis dasiabube tsauwa benitã nishũ Jesus yukakĩ: —Na hunibũ mikiri txakabu yuiaiburã, miarã, haskai mĩ hatube kemanameamamẽ?— aka

⁶¹ Jesus pes hawa yuiama nikẽ Deusbe nukunabu hãtxashunika shanẽ ibuhairatũ ana yukakĩ: —Habia mĩ miamẽ ikairã, mĩ Deusũ bake nukũ mekenã Messias Cristorã?— aka

⁶² —Haa. Haska mĩ ekiri yuiairã, ẽ haki. Epa Deus kuxipahairatũ hawẽ yusiuri ẽ tsauwa matũ Hutxi Kayabi Iuwa nai kuĩwẽ ẽ huai mã ea uĩshanaii— ikaya

^63-64 nĩkatã Deusbe nukunabu hãtxashunika shanẽ ibuhaira Caifás haki sinatahairakĩ hawẽ tima tari uxnitã yuikĩ: —Deus itxaikiki. Ana hatira hãtxai ẽ nĩkakatsi ikamaki. Na haska hari hãtxayarã, haskara hakiri mã xinaĩ?— akĩ hatu yuka: —Deus ma itxashuki. Hau tenã menũwẽ— iake iakeaibũ

⁶⁵ hanushũ itxakawakĩ taewakĩ haki kemu mitxukĩ hawẽ beru beputã kashe wakĩ kuxakĩ yukakĩ: —Tsuã mia kuxaimẽkaĩ? Unãtã nuku yuiwe— akubainaibũ hanushũ Deus kẽwãti Templo mekenikabũri bepas bepas akaibũ

Pedro Jesuski dakenikiaki, na hãtxarã

^66-67 hanua hemaĩtĩ anu Templo mekenikabube Pedro txĩ yuaya Caifásĩ tsuma aĩbu betsã betxitã yuikĩ: —Miarã, Jesus Nazaré anuabe mĩ nimiski. Ẽ mia unaiĩ— aka

⁶⁸ Pedrõ parãkĩ yuikĩ: —Ẽ ha unãmaki, ha haska mĩ hakiri hãtxairã— itã hanu hemaĩtĩ kene hikiti shui anu ka nikẽ takara keui taeaya

⁶⁹ hanua ha aĩbũ ana Pedro betxitã hanu maniabu yuikĩ: —Na hunirã, Jesusũ tsuma betsaki— hatu waya

⁷⁰ Pedrõ ana hatu yuikĩ: —Haskamaki— ikaya habianuri mapushũ Pedro uĩkĩ yuikĩ: —Txanimaki. Mĩ Jesusũ tsuma betsa ẽ unaiĩ. Galiléia anua mĩ hãtxa ẽ nĩkaii— akabu

⁷¹ Pedrõ hatu yuikĩ: —Ha huni mã hakiri hãtxairã, ẽ ha unãmaki. Ẽ txani txakayarã, hau Deusũ ea kupinũwẽ— ikaya

⁷² hakimamari ha katxu takara keuai nĩkatã haska Jesusũ yuikĩ: “Takara dabeki keuriama dabe inũ bestiki: ‘Ẽ ha unãmaki’, iki mĩ eki dakei kaii”, abirana xinãtã Pedro kashatxakayamanikiaki.