Marcos 13 - Kaxinawá Bíblia (BR)

Templo hiwe tekei purekei keyushanaikiri Jesusũ hatu yuinikiaki, na hãtxarã

¹ hanushũ Templo hiwe hemaĩtĩ anua hawẽ tsumabube Jesus kaĩkainaya hawẽ tsuma betsã yuikĩ: —Yusĩnaã, uĩwẽ. Na Templo hiwe wakĩ mixki tsamakeakeniburã, habi hawẽrua benibĩ!— aka

² Jesusũ yuikĩ: —Txanimaki. Na dasibi hiwe ewapa wanibu hawẽrua mã uĩaĩnã, hawẽruahairaki. Haskabiakẽ ha mixki hiwe tekekĩ purekĩ keyushãkanikiki, mixki betsa ana matsãbaunabumarã— hatu abaini

Mai anua haska tashni keyunũbariai bebũkiri Jesusũ hatu yusĩnikiaki, na hãtxarã

³ hanua bui Oliveiras Mati anu mapeketã Templo bebũ tsauwabũ Pedro inũ Tiago inũ João inũ Andrẽ Jesus hune yukakĩ:

⁴ —Ha mixki hiwe tekei purekei keyushanai mĩ nuku yuishurã, mia yukapa? Ma kemai taei haskai nũ unãtirumẽkaĩ? Nuku yuiwe— akabu

^5-8 Jesusũ hatu yuikĩ: —Ẽ ka ẽ ana huriamakẽ eskai nuitapai taeshanaibu Deusũ yununi eskashãkanikiki. Shabakabi matu yuinũ nĩkakãwẽ. Ẽ kani ma ẽ hanu hua kemaya huni betsa betsapa beshũ yuikĩ: “Ẽ Deusũ Katua Messias Cristoki”, iwanã, yura itxapabu hatu parãshãkanikiki. Hau tsuabũra haska wakĩ matu parãyamashanũbũ uĩrashãkãwẽ. Ha inũ, yurabu nuitapai taeaitianã, nawabu nawa betsabube detenamei inũ tsakanameakeakeaibu mai patxa sakuakeakeaya bunihairai nuitapaibũ isĩ betsa betsapa teneakeakeshãkanikiki. Hakia tsakanameakeakeaibukiri bana nĩkai datei meseyamashãkãwẽ, na haskairã, isĩ betsa beai mekĩ mã uĩshanai keska bebũkiri shabakabi ẽ matu banabimairã.

^9-11 Hakia matu dukũ taewakĩ betsabũ matu kupinũ, iwanã, hatũ mae shanẽ ibu anu matu iyushãkanikiki. Ha inũ, itxati hiwe anushũ ekiri mã hatu yusĩaĩbu betsabũ matu kuxa kuxa ashãkanikiki. Uĩrashãkãwẽ. Hakia ẽ kakape ikũwãkĩ mã ea txibaĩbuwẽ taeshũ tsuabũra matu atxishũ shanẽ ibu kuxipabu anu matu iyuabu hawara mã yuitiru Deusũ Yushĩ Pepatũ matu yuimashanikiki. Haskakẽ hawa dateama: “Harakiri yuishãpa?” ikĩ bebũkiri xinãyamashãkãwẽ, hawẽ Yushĩ Pepatũ matu haska merabewaya ẽ yusĩakiri shanẽ ibu betsa betsapabuki mã txanishanairã. Ẽ ana huriamakẽ ikũ yurabu maniakeakeabu dasibibu tsuabũra ẽ kakapekiri ea ikũwãkĩ hatu yusĩbaũshãkanikiki.

¹² Ha inũ, yura betsã hanubi hawẽ betsabũ ea ikũwaĩbu hatu atximakeakeriashãkanikiki, hau hatu tenãnũbunã. Habiaskari wakĩ hatũ ibubũ hanubi hawẽ bakebu hatu atximariashãkanikiki. Ha inũ, habiaskari wakĩ bakebu hatũ ibubuki sinatakĩ hatũ ibubũ ea ikũwaĩbu hatu atximashũ hatu tenãmariashãkanikiki.

¹³ Ekiri haska yuibaũkĩ mã ea txibaĩbuwẽ taeshũ yurabũ matu danaĩ mirima matuki sinatashãkanikiki. Matu haska wabiaibũ tsuãra ea txibãkĩ heneisma hatu mekekĩ ẽ hatu pashamashanaii.

¹⁴ Haskakẽ ha itxakanikakiri Deusũ Daniel yuia keneni tsuãra ha yuikĩ unãmisrã, ha itxakanika tashnia Templo merã nia mã betxiaya ha Judéia anuabu mati keyatapa anu hau pashashanũbũwẽ.

¹⁵ Ha inũ, betsabu na mai bawa hiwe sapa sheni manaũri maniaburã, butushũ hawẽ hamapai bikatsis ibiakĩ hau hawẽ hiwe anu hikiama hau hawaira pashariashanũbũwẽ.

¹⁶ Ha inũ, ikũwaĩ ha bai anu dayaiburã, mexu merã hawẽ bemakia tari keshtupa bikatsis ibiai hau ana txĩtũkiranama hau habiariari pashariashanũbũwẽ.

¹⁷ Hamẽ ha yumaĩbutianã, tuyabu inũ ha txutxu amamisburã, hatu peirawashãkãwã.

^18-19 Haska inũ, Deusũ mai damiwani anua yumãshanaiburã, tsuã haska teneriama inũ ana teneama ishanai tenei dasibibu nuitapatxakayamashãkanikiki. Haskashanaiwẽ taea uitiã mã haska teneyamashanũbũ Deus ea akĩ yukakubaĩshãkãwẽ.

²⁰ Ha haskaibutiã Shanẽ Ibu Deusũ hawa nemakĩ tsua pashawatirumabia ma hawenabu hatu katuniwẽ taeshũ hatuwẽ nuikĩ hau dasibibu debui keyuyamashanũbũ yumaĩbutiã Deusũ bari ana txai wama txaima shekashanikiki.

^21-23 Habiatiãri huni betsabu hushũ matu parãkĩ yuikĩ: “Earã, Deusũ ea yunua ẽ hawẽ hãtxa yuishunikaki. Ea nĩkairakãwẽ”, ikaibũ betsabũri yuikĩ: “Deusũ Messias Cristo, earã, matu anu ẽ ana hushuki”, ikaibu betsabũ nĩkatã hatu yuikĩ: “Uĩa. Nuku anu Cristo ma hushukiaki”, ikaibũ ana betsabũ yuikĩ: “Uĩa. Hanu ma hushukiaki, Cristorã”, ikaibũ hanushũ habũ hamapai betsa betsapa huni betsabũ atiruma habũ akĩ yura itxapa parãkĩ Deusũ hawena wakĩ hatu katuriani parãkatsis iriashãkanikiki. Haskaibu nĩkatã ikũwãkĩ mã kaneyamashanũbũ bebũkiri shabakabi ha parananãshanaibukiri ẽ matu besuũbi banabimai nĩkakãwẽ— iwanã,

Nukũ Hutxi Kayabi Iuwa huirã, eskakiranũbarikiaki, na hãtxarã

^24-25 ana hatu yusĩkĩ: —Yumaĩ keyuaibu binukainaya nai anua dasibi betsa betsapashanikiki. Bari ana pesheama nukai taeaya usheri ana txashama mexuaya bixi niri iki keyui dasibi nai taka taka iki txuruãyã

²⁶ ẽ matũ Hutxi Kayabi Iuwa shanẽ ibui kuxipahairai txashahaira nai anua nai kuĩ meranua ẽ huai uĩaĩbũ

²⁷ Deusũ hawẽ nai tsumabu yunua hawẽ katuabu mai hirabi kesua anu manibaunabu hatu itxawashãkanikiki.

²⁸ Haskakẽ hi figueirawẽ mã unãtiruwẽ miyuiwẽ matu yusĩnũ nĩkakãwẽ. Hi pei petakatã txipu metubistã peiai uĩkĩ ma bari kemai mã unãmis keskai

²⁹ hawara ẽ matu yuishu betxitã ẽ samama ana huai mã unãtirubuki.

³⁰ Haska inũ, yurabu dasibi hiwebaunabu yamariabuma ikũ dasibi ẽ matu yuishu haskai taeshãkanikiki.

³¹ Hakia habiaskariai nai anua inũ mai anua Deusũ damiwani habu keyushãkanikiki. Hakia ẽ hãtxawẽ bebũkiri ẽ matu yusĩaĩnã, binuama menepakeshanikiki.

³² Hanua hawatiãra ẽ ana hushanai tsuã unãmaki. Deusũ nai tsumabũ unãma inũ ea Deusũ bakẽ ẽ hawa unãmariki. Hakia Epa Deus ha bestitũ unaĩkiki.

³³ Haskakẽ tsuã hawa unãmawẽ taea matuburã, hawa txikixama pepakũkaini Deusbe hãtxakĩ ea manakĩ hatiãra haskashanai uĩrakubaĩshãkãwẽ.

³⁴ Haska inũ, huni txai kakĩ hawẽ tsumabu hawẽ daya tibi hawẽ hiwe anu yunuakeaketã hiwe beputi keshemis yunutã bumisbu keska wakĩ ẽ matu yunubaĩkĩ akawaii.

³⁵ Hawa txikixama ea manakashãkãwẽ. Hawa barira hiwe ibu humis keskai eari ẽ ana hushanai mã unãmariki. Mexui taeayamẽkaĩ. Yamenapũmẽkaĩ. Takara keui taeayamẽkaĩ. Mexukirimẽkaĩ.

³⁶ Haskakẽ hawairakirã ushabu keska ẽ matu betxiama ishanũ

³⁷ ẽ matu yuiai hakimama uĩrakubaĩshãkãwẽ, habiaskariai dasibibuki ẽ hatuki txaniriairã— hatu anikiaki.