Marcos 12 - Kaxinawá Bíblia (BR)

Dayakapabu mekenika besumakiri Jesusũ hatu yusĩnikiaki, na hãtxarã

¹ habianushũri miyuiwẽ Jesusũ shanẽ ibubu hatu yusĩkĩ: —Huni betsã bai washũ uva bimi batapa banatã mixkiwẽ dakẽbaũkĩ keyutã hanua haki uva tsiniti watã hanushũ dasibi uĩbaũti hiwe pixta keyatapa watã hanushũ hau bimi dabukũ ea inãshanũbũ, iwanã, huni betsa dayakapabube habube yubakatã ibu keska wakĩ yunuyubaini txai kaimakẽ

² hanu ma kani tsekatitiã ikaya bai ibuã hawena dabukũ hau yukatã ea bishũtanũ, iwanã, hawẽ tsuma betsa yunua ka

³ habũ hawena inãkatsi ikama uva bimi mekeabũ atxishũ kuxa kuxa ashũ hawa inãma mais kaya

⁴ hanushũ bai ibuã ana hawẽ tsuma betsa yunuria ka kũyã ashũ makuxkĩ mapeshtã nitxĩriabu kariakẽ

⁵ hanushũ bai ibuã ana hawẽ tsuma betsa yunua ka tenãbũ hanushũ betsa betsapari yunua buabu hatu kuxa kuxa akĩ hatiri tenãbũ

⁶ hatu haska tibi wabia habũ inãbumakẽ hawẽ bake bestitxai abuhairai ha besti niti itanaya hakiri xinãkĩ: “Ẽ bake ẽ yunua kaya haki mesekĩ ẽ bimi ea ha inãshũtirubumẽkaĩ”, iwanã, yunua ka

⁷ hawẽ bake hatuki kemai kai betxitã yuinamei: “Bai ibu mawaxĩkẽ na hawẽ bakẽ hawẽ bai tibi inũ hawẽ hiwe tibi dasibi hawenawayuikiki. Na bai nukunas nũ wanũ tenãnãkãwẽ”, ishũ

⁸ atxishũ tenãtã bai tsisumẽ putanibuki— iwanã,

⁹ —Haskakenã, ha bai ibuã haskara hatu washanimẽkaĩ? Matu yuinũ nĩkakãwẽ. Bai ibu hawenabube hushũ bai anu dayamisbu hatu tenãtã hanushũ huni betsabu hawẽ bai anu hau dayashunũbũ hatu yunushanikiki— iwanã

¹⁰ —Deusũ hãtxa kenenibu uĩkĩ mã yuismamẽ? Matu ana xinãmanũ nĩkakãwẽ: ‘Hiwe wanikabũ mixki danãbiaibũ habias mixki Deusũ bishũ deshũ makeresh wakĩ hawẽ kene mestẽwã keska wakĩ

¹¹ nuku uĩmakĩ “habaa”! imakĩ nuku harakiri xinãtima washanikiki’, hatu waya

¹² na miyuiwẽ hatu ha akĩ txiteai unãkĩ shanẽ ibubũ Jesus atxikatsis ibiai yurã kaiãki mesekĩ hawa meama heneyunibukiaki.

Ha governo dayashũmisbu pei pakatimẽ? ikaibu Jesusũ hatu yununikiaki, na hãtxarã

¹³ Hanushũ Jesus haska washũ tenãtima hawẽ parãtã Romano shanẽ ibu ha amakatsi ikĩ judeu shanẽ ibubũ fariseubu inũ Herodeski txiti ika betsabu Jesus anu hatu yunuabu

¹⁴ haki beparamebaĩ yuikĩ: —Yusĩnaã, yura betsabu miki sinatabiaya hawa hatuki dateama ikũ hãtxa besti yusĩkĩ haska wakĩ Deus txibãtirubu besti mĩ hatu shabakabi yusĩkubainairã, nũ unaiĩ. Haskawẽ taeshunã, haskara mĩ xinaĩmẽkaĩ mia yukapa? Ha Romano shanẽ ibu Césarn nuku pei yukamisrã, haska wanãshãpa? Pakanãshãpa? Pakatimaraka?— akaibu

¹⁵ Jesus hawẽ beparãkĩ hamakiri yuimatã itxakawatirubu unãkĩ hatu yuikĩ: —Haskarawẽ mã ea unãti wakĩ beparanũ ika ikanai? Hawẽ governo imposto pakati pei heshe betsa ea uĩmakãwẽ— hatu wa

¹⁶ betsa beshũ inãbu uĩkĩ Jesusũ hatu yukakĩ: —Narã, tsuã besu inũ tsuã kena neamẽ? Ea yuikãwẽ— hatu wa habũ yuikĩ: —Romano shanẽ ibu Césarnaki— akabu

¹⁷ Jesusũri hatu yuikĩ: —Imperador Césarnawẽ taeshũ matũ shanẽ ibu duawakĩ hawẽ governo dayashũmisbu pei hatu inãshũkubaĩkãwẽ. Hakia Deusri duawakĩ hawẽ yusĩa txibãkĩ hawara abuai ashũriakubaĩkãwẽ— hatu waya —Nũ haska washũ parãtirumaki— iki e itã ana hawa yuitima buaibũ

Mawanibu bestẽshanaikiri Jesus yukanibukiaki, na hãtxarã

¹⁸ hanua saduceubu judeubu pashka betsa: “Ha mawabu hawẽ yura tsua ana besteĩsmaki”, imisbu Jesus anu haburi beshũ yukakĩ:

¹⁹ —Yusĩnaã, Moisés yusĩkĩ: “Huni betsa aĩyã huni bakewariama huni mawakẽ hanua hawẽ betsã aĩ hanubi aĩwãtã huni bakewashũtiki, hawẽ betsa mawaimatũ kena dabikinã”, nuku waniki.

²⁰ Haskakiri ha hawẽ sete betsabukiri mia yuinũ nĩkawe. Ha dukũ iuwatũ aĩbu betsa aĩwãshũ huni bakewariama mawakẽ

²¹ ha katxukeatũ hawẽ betsã habias aĩbu aĩwãshũ huni bake wariamari mawakẽ ana ha katxukeatũ hawẽ betsã aĩ habiari aĩwãriatã huni bake wariamari mawaniki.

²² Hanua ha sete hawẽ henekĩ habias aĩburi bishũ habu tibitũ hawa huni bake bawabuma mawai keyuabũ hanua hawẽ henei aĩbu huni bake biamas mawarianiki.

²³ Ha haskaniburã, mawabu ana besteaĩbutianã, ha aĩbu bestitxai ha huni setebũ aĩwaniburã, haratutũ kaya ana ha aĩbu bishanimẽkaĩ?— akabu

²⁴ Jesusũ hatu kemakĩ: —Matunã, Deusũ hãtxa kenenibu unãma hawẽ kuxipa mã unãmariki. Haskakĩ mã kanemiski. Shabakabi matu xinãmanũ nĩkakãwẽ.

²⁵ Mawanibu ana bestẽshanaibutianã, hawa ana aĩyaĩ inũ ana beneyai ikama ishãkanikiki. Hanua Deusũ nai tsumabu keska beneuma inũ aĩyuma hiweshãkanikiki.

²⁶ Mawakubainaibu besteĩ ana hiweshanaibukiri matu yusĩnũ nĩkakãwẽ. Hi mashu kua here hi hi ikai anushũ Deusũ Moisés hãtxa wakĩ: “Earã, natiã ẽ Abraãonẽ mekenikaki. Ẽ Isaquẽ mekenikaki. Ẽ Jacõ mekenikariki”, ikai nĩkayamashũ Moisés kenenirã, mã uĩkĩ yuismamẽ?

²⁷ Deusrã, mawabunamaki. Hakia hiweabunaki. Haskakẽ Abraão inũ Isaque inũ Jacó hatũ yushĩ hiweabuki. Txipu ana yura bena Deusũ hatu inãshanai xinãma mã kanehairamiski— hatu wa

Deusũ yununirã, haratu bestitũ binu keyuamẽ? ikaikiri Jesusũ hatu yusĩnikiaki, na hãtxarã

²⁸ Jesus saduceubube yuinameai nĩkabaikĩ Jesus haskakiri yukabu hatu yui pewashukiri unaĩ Deusũ hãtxa kenenibu yusĩnanãmis betsa Jesuski kemashũ unãti wanũ ishũ yukakĩ: —Haratu yunua kuxipa binua Moisés nuku keneshuniwẽ besti nũ txibaĩwẽ taeshũ Deusũ nuku mekekubaĩtirumẽ?— aka

²⁹ Jesusũ yuikĩ: —Na eska yununi betsa betsapa tibi dasibi binuhairarã, eskaki. Nĩkakãwẽ: “Israelbuũ, nukũ Shanẽ Ibu Deus ha besti ikibi ini hiwepakeikiki.

³⁰ Haskakẽ nukũ Shanẽ Ibu Deus duahairawakĩ abukĩ hawẽ nuikĩ matũ huĩti inũ, matũ yushĩ dasibiwẽ inũ, matũ xinã dasibiwẽ inũ, dasibi matũ kuxipawẽ heneama akubaĩkãwẽ.” Mĩ haska tibiwẽ xinãkĩ akairã, ha yunua betsa dasibi binuhairaki.

³¹ Ha katxu yunua betsarã, habe ketashnirã, nĩkawe: “Mĩ habube hiweabu duawariakubaĩkãwẽ, ibubis mã nui mekemis keska wakinã”, akĩ yuini ha yunuti dabe txibaĩ mã haki txiti ikaiwẽ taea matuwẽ Deus benimashanikiki— aka

³² Deusũ hãtxa kenenibu yusĩnanãmistũ Jesus yuikĩ: —Yusĩnaã, mĩ yusĩanã, peki. Txanima mĩ yui kayabiaii. Nũ abuhairaii. Txanima Epa Deus bestitũ nuku mekekubaĩtiruki, betsã nuku mekeamarã.

³³ Haska inũ, nukũ huĩti inũ, nukũ yushĩ dasibiwẽ inũ, nukũ xinã dasibiwẽ inũ, dasibi nukũ kuxipawẽ Epa Deus duawai haska nukũmebi nũ nuimis keskai yura betsabu tibiwẽ nũ nuiaiwẽ taeshũ Deusũ nuku abuhairaikiki. Hamẽ haskama hatira yuinaka deteshũ kuakĩ Deus nũ inãkuĩmis inũ hatira inãkuĩti betsa betsapa Deus kẽwãti hiwe anu nũ bumisrã, hawama keska Deusũ xinãmiski— akaya

³⁴ Deusũ hãtxa pe nĩkakĩ yuiai Jesusũ yuikĩ: —Deus shanẽ ibuaiki mĩ ma haki dasi kemaki— aka ana tsuã hawa yukama mapuabũ

Messias Cristorã, tsuã babamẽ? iwanã, Jesusũ hatu yukanikiaki, na hãtxarã

³⁵ habianushũri Templo hemaĩtĩ anushũ Jesusũ hatu bepushumakĩ yukakĩ: —Deusũ hãtxa kenenibu yusĩnanãmisbũ matu yusĩkĩ: “Cristorã, Davĩ baba ishanikiki”, ikĩ haskakĩ matu haska yusĩmisbumẽ?

³⁶ Matu yuinũ nĩkakãwẽ. Deusũ Yushĩ Pepatũ Davi yusĩa kenenitũ matu yuikĩ: Deus mekenikatũ ẽ Shanẽ Ibu Messias yuikĩ: “Miki sinataibu ẽ hatu maemariama manai ẽ yusiuri tsauyuwe”, aniki. Haska watã keneniki.

³⁷ Hakia: “Messias ẽ shanẽ ibuki”, Davĩ abianikẽ haskatã hawẽ shanẽ ibu hanubi hawẽ baba itirumẽ? Ea yuikãwẽ— akĩ shanẽ ibubu xinãmaya yura mirimabũ Jesusũ hãtxa nĩkai benimai tse ikaibũ

Deusũ hãtxa kenenibu yusĩnanãmisbu Jesusũ hatu txitekĩ dabĩ wanikiaki, na hãtxarã

³⁸ habianushũs Jesusũ ana hatu yusĩkĩ: —Deusũ hãtxa kenenibu yusĩnanãmisburã, hatu uĩrakãwẽ. Hatũ tari txaipa hawẽrua sawea mae hemaĩtĩ ewapa praça anu ẽ kawanai ea abukĩ ea kẽwãkĩ hau hãtxa pewẽ ea duawanũbũ ika mapumisbuki.

³⁹ Haska inũ, hanu itxati hiwe anu hikikaĩ haki tsauti pepa hanu dasibibũ hatu uĩtirubu anu tsaukatsis imisbuki. Ha inũ, itxatã pinũ, iwanã, hanu shanẽ ibubu dakai bashti ishũ pimisbu benariamisbuki.

⁴⁰ Haska inũ, aĩbũ bene ma mawakĩ shũnunikẽ hawẽ hamapai pepayabi hawẽ hiwe mebinũ itã aĩbu beparãkĩ hakiri pe xinãmanikapai Deusbe hãtxai txaipahairamisbuki. Haskamisbuwẽ taeshũ Deusũ hatu unãti watã kupiarã, yumãhairashãkanikiki— hatu watã

Aĩbu beneuma nuitapaitũ pei pixta inãkuĩnikiaki, na hãtxarã

⁴¹ Jesusũ hatu yusĩ meneaya nuitapaibu hawẽ merabewati inãkuĩ pei hanu mistumisbu anu bau bebũ tsaushũ Jesusũ uĩayã yura pei mirima hayabũ itxapa mistubirãbiranaibũ

⁴² aĩbu beneumari nuitapai hushũ pei heshe dabe hawa damahaira mistuaya Jesusũ uĩtã

^43-44 hawẽ tsumabu kenashũ hatu yuikĩ: —Eskaki, matu shabakabi yuinũ. Ha hunibu pei itxapayabũ hatũ pei pashkashũ teshe besti inãkuĩkãshuki. Hakia ha aĩbu nuitapaitũ dasibi hawẽ hawara biti pei inãkĩ keyushuki— hatu watã