Juízes 5 - Kaxinawá Bíblia (BR)

Eska Débora inũ Baraque kãtanibukiaki, na hãtxarã

¹ Habias shabatiã Débora inũ Abinoão huni bake Baraque kãtai eskanibukiaki:

² “Israelĩ enabu anu ana nukube detenamenũ ika beaibũ hunibu mã detenamenikabu nũ matu kena itxapa hawa dateama hawaira yunu berubirani mã beshiãbuwẽ taeshũ dasibibũ Senhor Deus kẽwanãkãwẽ.

³ Yununikabuũ, Senhor Deus ẽ kãtashunai ea nĩkakãwẽ. Shanẽ ibu beshmasbuũ, Israelĩ enabu mekenika Deus ẽ kẽwaĩ ea nĩkakãwẽ.

⁴ Senhor Deusuũ, mia bebunã, Seir anua tashnikirã ha Edomnẽ mai pakea anua mĩ kaĩkainaya mai patxa sakuaya nai anua tuis tuis ikaya nai kuinẽ ui itxapahaira tuekĩ mĩ imaniki.

⁵ Shanẽ ibuũ, mĩ huaya mati matipa mai patxa sakuaya Israelĩ enabu mekenika Senhor Deusuũ, mia bebũ Mati Sinairi mai patxa sakuniki.

⁶ Anatẽ bake Sangar unãti wanikã hatu yusiãyã Héberĩ aĩ Jael hiweyukẽ habiatiãri Israelĩ enabu maĩ bukubaini bai hashpa shabakabi anu hikiabuma bai hashu txĩtũ akeakekainawẽ datei hune buaibũ

⁷ datei mae pesheishta anu Israelĩ enabu hiwekatsi ikabuma haskawẽ taea ea ẽ Débora shanẽ ibui unãti wanikanũ ika ẽ tashnikaunimaki, Israelĩ enabu ẽ hatũ ewarã.

⁸ Yushibubu bena katutã nukunabũ kẽwaĩbu habiatiãri mae ewapa mishkiwẽ kenekauana hikiti shui anua detenameaibu hakia 40.000 Israelĩ enabu anu hashi bestitxai inũ hawẽ pia nemati mane bestitxai tsua hayama ikimaki.

⁹ Israelĩ enabu shanẽ ibuhairabu hau nukuki sinataibube hatube detenamei benũbũ ẽ hatu kena habũ ea nĩkatã bei itxashinabuwẽ taea earã, ẽ huĩti hirabiwẽ ẽ hatuwẽ benima txakayamaii. Haskakẽ dasibibũ Senhor Deus kẽwanãkãwẽ.

¹⁰ Shanẽ ibu peiyabu jumenta hushupaki katsaumebaĩmisbu inũ, tari mai bebekãti pepahaira anu tsauabu inũ, maĩ bui hatũ taewẽ mapumisbu Deusũ kushipakiri hatu yuikubaĩkãwẽ.

¹¹ Hanu ũpash biaibu anu mane mimawati txarũ txarũ amisbu anushũ haska Senhor Deusũ hatu maemashina inũ haska Israelĩ enabu mae peshepishtabia hatũ shanẽ ibubũ hawenabubetã Canaã nawabu detekĩ hatu maemashinakiri dasibi hatu banabimai txanikubaũkãwẽ.

¹² Bestẽwẽ. Déborã, bestẽwẽ. Bestẽtã haska washinabukiri hatu kãtashũwẽ. Abinoão huni bake Baraquenẽ, miarã, benikaĩkĩ detenamekĩ tsuabura mĩ hatu atxishina hatu iyuritãwẽ.

¹³ Hanushũ nawa kushipabube detenamenũ ika Israelĩ enabu itxapa manananua detenamenikabu butubiranaibũ nawa detenamenikabu maemanũ ika ewẽ taea Senhor Deusũ detenamenika butubirãshinabuki.

¹⁴ Jacó bake Efraimnẽ enabu hunibu hatiritũ Baraque merabewai natukã napãpa anu butuaibũ hatu itxũri Jacó bake Benjamimnẽ enabu detenamenikabu Baraque merabewai buturiabũ hanua José baba Maquirĩ enabu shanẽ ibubu Baraque merabewai buturiaibũ hanuari Jacó bake Zebulomnẽ enabu shanẽ ibu beshmasbu Baraque merabewai buturiaibũ

¹⁵ ha dikabi Jacó bake Issacarĩ enabu shanẽ ibubu Débora banawabirani bekĩ hawẽ detenamenikabu habũ merabewai Baraque itxũ kakĩ natukã napãpa pukebaĩkĩ Canaã nawabu hatu detei buaibũ Jacó bake iyua Rúbenẽ enabu anua shanẽ ibu betsabu huĩti kushipa hayabiakẽ hatukiri yuikĩ:

¹⁶ Txashuwã mekenikabũ hawẽ hiwe anushũ ina txashu kena nĩkabirani bebiamiskẽ haskai nuku nĩkatã beabumamẽ?” ikaibũ hakia Rúbenẽ enabu meranua shanẽ ibu betsabu dateriashinabukiaki.

¹⁷ “Hene Jordão ukeri kesha betsa anu Jacó bake Gileade enabu hiwea Baraque merabewai beabumariki. Hatũ shashu ewapa txaipa anu Jacó bake Dã enabu hatũ shashuwẽ besti nui bashikua Baraque merabewai buabumariki. Ianẽwã anu hanu shashu keti amisbu anu Jacó bake Aserĩ enabu ianẽwã kesha anua Baraque merabewanũ ika hawa e ibaunama bashikua buabumariki.

¹⁸ Hakia Jacó bake Zebulomnẽ enabu inũ hawẽ bake Naftalĩ enabu debutirubu shinaĩ mesehairabiai Canaã nawabu mananã hiweabube detenamekĩ Baraque merabewashinabuki.

¹⁹ Hanua Taanaque anu shanẽ ibubu hawẽ detenamenikabube bei mae betsa Megido hatũ txatxa ũpash betsa betsapa dapikeshũ hatu detetã hatũ mabu binũ ikaibũ Canaã nawa shanẽ ibubu bea detenametã hatũ prata pei heshe inũ mabu pepa binũ ika bebia hawa biama benushinabuki.

²⁰ Nai anua bishĩ hawẽ bai tanabirãkĩ Sísera nemakĩ bishi txasha kushipawẽ hawenabu deteaibũ

²¹ Pashku Quisom detenamenikabu dasibi hatu tsispubaĩkĩ kushibaĩkĩ bukĩ hatu yamawashinaki. Hatu haska washĩkẽ hawa punu nukai txĩtuãma ikubainãkãwẽ!

²² Detenamenika kushipabu cavaloki katsaumea cavalo tae barush barush ibirani kushibirãbiranaibũ

²³ Senhor Deusũ nai tsumã hatu yuikĩ: ‘Mae Meroz inũ hanu hiweabu txakabuhairabuki. Israelĩ enabu hawa dateama detenameaibu Senhor Deusũ hatu merabewaya Meroz anu hiweabu itxabirã hatube detenamekĩ Israel merabewai beama ishiãbuwẽ taeshũ Senhor Deusũ hatu yupua hau nuitapa txakayamashanũbũwẽ’, akĩ Senhor Deusũ nai tsuma kushipahairatũ hatu banabimakubaũshinaki.

^24-27 Ũpash Síserã yuka ina awa txutxu inãkĩ mane kẽtxa hawẽruaki txutxu pepa Jaelĩ amatã haska wamatã mekẽ yusmauriwẽ hi kenuhaira bitã tsumatã hawẽ mekẽ yusiuriawẽri hawẽ dayakĩ mastamisbu tsumatã hi kenuhaira Síserã ishpushkuki timabaĩ unãshubima mastakĩ hawẽ bushka pesabaĩ maiki seuwa hawaira ushayastã Jaelĩ tae dapi mawai Sísera dabekeakeaketã hanu daka mawashinawẽ taeshũ ha Queneu nawa aĩbu Héberĩ aĩ Jaelĩ aĩbu betsa betsapabu hatu binua pepaki. Jael aĩbu betsabu binumakĩ Senhor Deusũ hau duawakubainũwẽ, nukũ tari hiwe anu hiwebaunabu aĩbuaibu hatu binua pepahairarã.

²⁸ Haskaitiã hawẽ ewã hawẽ bake Sísera benai hawẽ nui: ‘Hani huimẽkaĩ?’ ikĩ uĩti shui anu teshũshũ uĩ yuka ikĩ: ‘Haskai yane hawẽ cavalo tarãti huama nishmaimẽkaĩ? Haskai hawẽ detenameti cavalo tarãtiya yane huamamẽ?’ ikaya

^29-30 aĩbuaibu betsa unanepatũ kemakĩ habiaska hawẽ ewã shinaĩ keskari yuikĩ: ‘Ẽ eã unanã, hatu detekĩ keyutã hawara pepa hatu biãkĩ tsisputã ma hatu pashkashũkanikiki. Ha detenamenika tibitũ aĩbu bikĩ dayaru hatu wakĩ bestitxai inũ dabe hatu bibaĩbaĩkanikiki. Hamẽ Síserã hatu biãkinã, hatũ batxi hua huaya kepanãyã tashipa betsa betsapaya bikiki, ha maemanika teyabukukatsirã’, ishiãki.

³¹ Senhor Deusuũ, dasibi miki sinataiburã, hau haskai mawai keyukubainũbũwẽ. Hakia mia betxipaiaiburã, bari kushipakĩ txasha wakĩ keyumis keskai hau txashahairashanũbũwẽ”, iki Débora inũ Baraque kãtanibukiaki. Hatu haska washunima habiatiãri ha mai pakea anu 40 ano kai Israelĩ enabu unanuma hiwekubainibukiaki.