Juízes 4 - Kaxinawá Bíblia (BR)

Débora inũ Baraquẽ Sísera maemanibukiaki, na hãtxarã

¹ Senhor Deusũ unãti wanika kushipa betsa Eúde ma mawakẽ hanua Israelĩ enabu ana txakabui txĩtũtã hatũ hiwea peama txakabuwaibũ Senhor Deus hatuki sinataiwẽ

² taeshũ Senhor Deusũ hatu nemashunama Canaã nawa shanẽ ibu Jabim hatu maemanikiaki, hawẽ mae ewapa Hazor anua shanẽ ibukinã.

³ Jabimnẽ detenamenikabu shanẽ ibu mẽtsisipa hawẽ kena Sísera, mae ewapa betsa Harosete-Hagoim anu hawẽ hiwe ewapa hari hayanikiaki. Hawẽ 900 ferro mane cavalo tarãti detenamenikabu mapushũ Israelĩ enabu hatu bikahaira tenemakĩ itxakawakĩ 20 ano hatu nuitapahairawakubainaya hau hatu merabewanũ atimas Israelĩ enabũ hatũ Senhor Deus ea akĩ taewaibũ

^4-5 habiatiãri Israelĩ enabu itxakawakubainaibũ Lapidotẽ aĩ Débora, aĩbu unanepa Deusũ hãtxa yuishunikatũ hãtxa pepawẽ yusĩkĩ hatu merabewakubaini Jacó huni bake Efraimnẽ enabũ maiwã pakea mati matipa anu mae Ramá inũ mae betsa Betel namakis anu paniwã nia namã uta anu tsaua hatũ txakabu pewanũ ika beabu shanẽ ibukĩ Déborã hatu pepa yusĩpaunikiaki. Ma hanu tsaua beyani uĩmis shũ kenakĩ: “Déborã paniwãki”, apaunibukiaki.

⁶ Shaba betsatiã Senhor Deusũ ma tapĩmakẽ Jacó huni bake Naftalĩ enabu Abinoão huni bake Baraque hawẽ mae Quedes anua hau hunũ Déborã huni betsa yunua kashũ yuitana ma hukẽ Déborã Baraque yuikĩ: —Israelĩ enabu mekenika Senhor Deusũ eska mia yunuikiki, ea nĩkawe, mia yuinunã: “Jacó huni bake Naftali inũ Zebulom enabu shukuabu anua 10.000 detenamenikabu katushũ Mati Tabor anu hatube katãshãwẽ.

⁷ Mati Tabor dapi pashku Quisom napaku anushũ mia detekĩ atxinũ ika Canaã nawa shanẽ ibu Jabimnẽ hawẽ detenamenikabu shanẽ ibu Sísera hatũ cavalo tarãti detenamenikabu hawẽ mapuabu inũ hawẽ detenamenikabu maĩ mapuabuyabi hau mianu benũbũ ẽ mia hatu meshui ashanaii. Hakia matube detenameaibu mã hatu maemashanaii”, akĩ mikiri ea yuimashinaki— aka

⁸ —Ea kairã, mĩ ebe kaya ẽ mibe kashanaii. Hakia mĩ ebe kamakẽ ẽ katirumaki— aka

⁹ Déborã kemakĩ yuikĩ: —Peki. Ẽ mibe kashanaii. Mã hatu maemaya mia kẽwãbuma hakia hau detenũ aĩbu anu Sísera Senhor Deusũ yunushanikiaki. Detekẽ dasibibũ aĩbu betsa kẽwãshãkanikiki— aka Quedes anu Baraquebe Débora ma buabũ

¹⁰ harishũ hau benũbũ Zebulom enabu inũ Naftalĩ enabu anu hawẽ hãtxa Baraquẽ hatu buma nĩkatã detenamenikabu bebirã bebiranaibu pewakĩ hatu itxawatã 10.000 detenamenikabube Mati Tabor anu Baraque mapekeaya Déborari habe mapekekẽ

¹¹ Moisĩ ainẽ epa Hobabẽ enabu hawẽ kena betsa Queneu nawabu hawenabu betsa, hawẽ kena Héber hatu pashkabiranishũ Zaananim anu hi ewapa kushipa dapi hatũ tari hiwe betsa betsapa ma pũtenibu inikiaki, Quedes dapirã.

¹² Mati Tabor Baraque hawẽ detenamenikabube ma mapekekẽ Abinoão bake Sísera banabimabu

¹³ nĩkatã hatu detenũ ishũ hawẽ 900 ferro mane cavalo tarãti mẽtsisipa mapubainabu inũ hawẽ detenamenikabu maĩ buriai mapekeriaibũ hatu itxawatã Harosete-Hagoim anua hatu tashnimabaina shukurakabaini pashku Quisom napaku anu Síserã hatu bitxia

¹⁴ hanushũ Déborã Baraque ana yunukĩ: —Benikaĩ ditãwẽ! Mĩ Sísera detenũ ikis Senhor Deusũ mia maemamaikiki. Hatu merabewai mĩ mẽtsisipa detenamenikabu bebũ Senhor Deus kaikiki— aka 10.000 hunibube Mati Tabor anua Baraque matxi butebainaya

¹⁵ matxatu txaipa kenuhairawẽ Balaquenẽ detenamenikabu hatube detenamekĩ taewaibũ Síserã cavalo tarãti mẽtsisipabu mapekebainaibu inũ hawẽ maĩ buaibu detenamenikaburi Senhor Deusũ hatu mesewakĩ date paepa mistua haska uĩtã hawẽ cavalo tarãtikia Sísera butui pashai kushikainaya

¹⁶ hawẽ cavalo tarãtikia detenamenika mapubainaibu inũ hawẽ detenamenikabu pashaibu detenũ ika hawenabubetã Baraquenẽ hatu txibãbaĩkĩ hatũ maewã Harosete-Hagoim anu hikipanãbu Baraquenẽ enabũ hatu detekĩ keyukubaĩkĩ Síserã detenamenikabu dasibi hatu tenã keyunibukiaki, tsua hiwemamarã.

¹⁷ Canaã nawa Hazor anu shanẽ ibu Jabim Queneu nawabu Héberĩ enabube sinatanameismawẽ taea Sísera hariri pashai kushikaini Héberĩ aĩ Jaelĩ tari hiwe anu ma kemaya

¹⁸ uĩtã inũ ika hawẽ tari hiwe anua tashnikirã Jaelĩ Sísera yuikĩ: —Neri huriwe, shanẽ ibuũ. Neri huriwe. Ewẽ dateama ẽ hiwe anu hikiwe— aka hawẽ tari hiwe anu hikia hunekĩ mai bebekãtiwẽ atximaya

¹⁹ Síserã yukakĩ: —Ẽ ũpash manuhairaii. Ea ũpash amawe— aka ina awa txutxu buspuai ma bũkashai txashuwã bitxi bishtuki arushĩshũ bishũ bebekãti bepẽshũ amatã ana atximaya

²⁰ Síserã ana yuikĩ: —Mĩ hiwe sheshekaiã tsaushũ ea uĩshũwẽ. Tsuara hushũ mia yukakĩ: “Mĩ hiwe anu tsua huama ishumẽ?” mia akabu: “Tsua huamaki”, iwanã hatu yuishãwẽ— itã

²¹ hĩ ikirana punu nukatã usha txakayamakẽ hawẽ tari hiwe pũteti hi kenuhairatã hawẽ mastakĩ hawẽ mestẽwãkĩ neshamisbu betsa bitã hawẽ mastatiri bishũ Sísera anu unãshubira kakaĩ hawa banawama ha dakanu mebaũkĩ hawẽ bushka unãtã hi kenuhaira Síserã ishpushku anu timashũ unãshubima hawẽ mastakĩ hi kenuhairawẽ bushka pesabaĩ maiki seuwa Sísera hawaira mawakẽ

²² hanua Baraquenẽ Sísera benakubirani huaya haki nukunũ ika hawẽ tari hiwe anua Héberĩ aĩ Jael tashnikaĩ Baraque yuikĩ: —Neri huriwe, ha mĩ benai huairã, ẽ mia uĩmairã— aka Baraque hikikaĩ Sísera ma mawa hi kenuhaira ishtxãkamea daka uĩtã

²³ hawẽ detenamenikabu Israelĩ enabũ detekĩ keyuabuwẽ taeshũ hau punu nukanũ Canaã nawa shanẽ ibu Jabim Senhor Deusũ datehairamaya

²⁴ habiatiãri Israelĩ enabu ana kushipakubaĩkĩ Jabim inũ hawenabu itxakawakubaĩkĩ atimas hawẽ mae mishkiwẽ kenebaunibu tekebaĩ hawẽ maewãyãbis Canaã nawa shanẽ ibu Jabim tenãkĩ yamawanibukiaki.