Juízes 2 - Kaxinawá Bíblia (BR)

Boquim mae anushũ Senhor Deusũ nai tsuma kushipatũ hatu ha anikiaki, na hãtxarã

¹ Josué mawaimakẽ Gilgal mae anua Israelĩ enabu bei Boquim mae anu ma itxa maniabu anu Senhor Deusũ nai tsuma kushipa tashnitã hatu yuikĩ: “Egito anua matũ ibubu hatu pashawabiranimashũ hatube yubakakĩ hatu yuikĩ: ‘Na eska ẽ matube yubakairã, ẽ matu henetaskama iki kaii’, iwanã,

² ‘Hamẽ matu ikirã, ha nawabu ha hari mae anu hiweabube hatube yubakataskayamashãkãwẽ. Haska inũ, hatũ yushibubũ kẽwãti txi tapu tibi teke keyukubaĩshãkãwẽ. Ẽ matu wabirani uĩkãwẽ. Haskai mã txakabube ketashamea hiwekatsis ikubaĩkanai? Mã haskaibũ ẽ matube yubakani ẽ hakimama ishanaii’, akĩ ẽ hatu wabianikẽ ẽ hãtxa ea nĩkama mã ea danãkanaii.

³ Mã haskamiswẽ taea matu bebũshũ natiã na nawabu teshe ana habu ẽ ha matu nitxĩshunamaki. Matu parãkĩ habu inũ hatũ yushibubũ birũwẽ matu kebẽkĩ akawashãkanikiki”, hatu wai

⁴ Senhor Deusũ nai tsuma kushipa hãtxai ma menekainaya hanua Israelĩ enabu huĩti nishmahairatã kasha txakayamai bis bis ikasima

⁵ nesebaũ Senhor Deus daewanũ, iwanã, txashuwã inũ awa itxapa tesẽshũ txiwẽ Senhor Deus menukĩ keyushunibukiaki. Haska watã ha mae kenakĩ: “Boquimki”, anibukiaki, nukũ hãtxawenã, Kasha Maerã.

Josué mawanikiaki, na hãtxarã

⁶ Hanu Josué hiweshũ hawẽ henekĩ hawẽ hãtxa hatu yuishina nĩkatã Israelĩ enabu tibi hatũ mae ibubis hau tsumakĩ ibuwashanũbũ hatu yunua buaibũ

⁷ Josué hiweyukẽ Israelĩ enabu Senhor Deus kẽwãkĩ duawanibukiaki. Ha dikabi ma Josué ma mawabiaimakẽ anibu unanepabũ haska Senhor Deusũ hatunabu dami washũkĩ hatu merabewakubainai uĩkubiranibu hiweyuabũ Israelĩ enabu Senhor Deus nĩkakĩ duawakĩ heneabuma iriakubainibukiaki.

⁸ Hakia 110 bariya Josué mawakẽ

⁹ Efraimnẽ enabũ mati mananã anu Mati Gaás nortekiri Timnate-Heres anu hawẽ mae anu Josué maiwanibukiaki.

¹⁰ Ha dikabi Israelĩ enabu ma Josuébe hiwekubiranimabu mawariai keyukubainaibũ habũ Senhor Deusũ kushipa uinibu ma debui keyuriabũ txipu kaĩkubirãshinabu Senhor Deuskiri inũ haska Senhor Deusũ Israelĩ enabu merabewakubirani habũ ana hawa unãbuma hiwei taebainibukiaki.

Senhor Deusũ hãtxa ana txibãkatsi ikama henenibukiaki, na hãtxarã

¹¹ Senhor Deusũ hatu uĩbia haska shinãma Israelĩ enabũ txakabuwakĩ yushibubu habũ kena tibi Baal ui itsa inũ, bari itsa inũ, mai pepa itsarã, duawakĩ hatubetã kẽwãkĩ taewai

¹² hatũ shenipabũ mekenika Senhor Deusũ Egito anua hatu iwebianikẽ habũ nĩkama ana shinãkatsi ikama henetã ha nawabu hatu dapi hiwebaunabubetã habũ yushibubu duawakĩ kẽwãkĩ Israelĩ enabũ Senhor Deus sinatamanibukiaki.

^13-14 Senhor Deus ana shinãbuma yushibubu Baal inũ yunu itxapa inũ inabu bake itxapa bitiru mekenika yushĩ hawẽ kena Astarote kẽwaĩbuwẽ taea Israelĩ enabuki Senhor Deus sinatakĩ hatu dapi hiwea yumetsubu hatu yunukubainaya hatũ yunu inũ hatũ inabu hatu yumetsũkubainaibũ hatu haska wakĩ hatuki sinataibũ hatu itxakawaibu uĩbiakĩ hatu ana nemashunama Israelĩ enabũ haskatã hawawẽ hatu nematirubuma ikubainibukiaki.

¹⁵ Hanua hatube detenameaibutiã bestikima habu hatu kupimakĩ itxakawamakubainikiaki, haska Senhor Deus hatube bebũkiri yubakaima hatu ana merabewamarã. Senhor Deusũ Israelĩ enabu hatu nuitapawabiakĩ

¹⁶ ana hatu merabewanũ ishũ shanẽ ibu unãti wanikabu betsa betsapa hatu katushũ tashnimakĩ yununika kushipabu hatu wa habũ Israelĩ enabu merabewakĩ tsuabũra hawenabu itxakawaibu habube detenamekĩ ha shanẽ ibu unãti wanikã hatu nitxĩshũkubaĩkĩ hawenabu Israelĩ enabu merabewakubaĩbia

¹⁷ hakia ha shanẽ ibu unãti wanikabũ hãtxa Israelĩ enabũ nĩkabuma patapakĩ Senhor Deusũ hãtxa txibãma yushibubu betsa betsapa txibãkĩ duawakĩ kẽwãpaunibukiaki. Hatũ shenipabũ Senhor Deusũ hãtxa nĩkakĩ txibãpaunibu keska akama hatũ bai tanama inibukiaki, betsa betsapa txibãkinã.

¹⁸ Israelĩ enabu hatu itxakawaibũ bika tenei kashaibu nĩkai hatuwẽ nuikĩ shanẽ ibu unãti wanika kushipa betsa katushũ tashnimatã Senhor Deusũ hatu merabewakubainaya ha shanẽ ibu unãti wanika kushipa hiwekũkaĩkĩ Israelĩ enabu itxakanikabu hatu nemashũkubainaya

¹⁹ hakia hatũ shanẽ ibu unãti wanika kushipa tibi mawakubainaibũ hatũ txakabu shinaĩ ana txĩtuĩ yushibubu betsa betsapa duawakĩ kẽwaĩ hatũ epabu binui txakabu pikui hatũ beya txakabu henekatsi ikama inũ hatũ huĩti kushi pewakatsi ikama ikubainibukiaki.

^20-21 Haskakẽ Israelĩ enabuki Senhor Deus sinatakĩ yuikĩ: “Haska hatũ shenipabube ẽ yubakabiani ea danãkĩ ẽ hãtxa ana nĩkakatsis ikabumawẽ taeshũ yura betsa betsapabu Josué nitxĩriama mawanikẽ eãri ẽ hatu nitxĩshunamaki”, ishũ

²² haska hatũ shenipabu ẽ hãtxa txibani keskakĩ Israelĩ enabũ txibãkatsi ikanimẽkaĩ, txibãkatsi ikabuma daka, iwanã, hatu unãti wakĩ Senhor Deusũ hatu uĩkĩ manakubainikiaki.

²³ Haskawẽ taeshũ nawa betsa betsapabu Josué hatu nitxĩshunama ini hiweabu hatũ mai pakea anua Senhor Deusũ hawaira hatu merabewakĩ nitxĩshunama irianikiaki.