Juízes 16 - Kaxinawá Bíblia (BR)

Mae ewapa Gaza anu Sansão kanikiaki, na hãtxarã

¹ Shaba betsatiã uĩtanũ ika Filisteu nawabũ maewã Gaza anu Sansão kai hikitã aĩbu hininipa dasibitũ memis ha aĩbu anu hawẽ hiwetã habe ushatanũ ika ka hikikẽ

² Sansão hatũ maewã anu ma hikia dasibibũ nĩkakĩ unãtã atxikatsi bari hirabi hatũ mae keshebaunabu hatũ beputi tibi mekea mapua ibai ma bari kaya ushai bukĩ shinaĩ yuinamei: “Penama bestẽkaĩ Sansão detekĩ tenanãkãwẽ”, itã buabũ

³ hakia Sansão yamenapũ aĩbube besti ishĩ habiatiãri hawaira Sansãonẽ aĩbu txibutukaini kakĩ mae hanu hikiti shui anu hune bepubiabũ hawẽ beputi txibuyabis tasketã dasibi iabaĩkĩ txai bushũ mae betsa Hebrom besusi mati mamaki mapebaĩ beputi kepinikiaki.

Aĩbu betsa Dalila Sansãonẽ betxipainikiaki, na hãtxarã

⁴ Jerusalém anua ianẽwãkiri kai napãpa hawẽ kena Soreque anu mae pishta anu Filisteu nawa aĩbu hawẽ kena Dalila hiwea uĩkĩ Sansãonẽ betxipaihairai habe hiweaya

⁵ Filisteu nawa shanẽ ibubu Dalila uĩ kashũ yuikĩ: —Sansão beparãtã hania hawẽ kushipahaira huimẽkaĩ? nuku tapĩshũwẽ. Haska watã atxishũ nũ nea ana pashamakẽ nũ maematirumẽkainã. Haska wakĩ txanima mĩ nuku tapĩshuna nukũri bestibu tibi mia duawakĩ 1.100 prata pei heshe nũ mia inãshanaii. Nukũ hãtxa ikũwãkĩ nuku pewashũwẽ— akĩ haska yubatã txĩtũbainabũ

⁶ haska wawanabu Dalilã Sansão yukakĩ: —Ea benimawakĩ ea tapĩmawe, hania mĩ kushipahaira huimẽkainã. Hau mĩ pekayamanũ haska wakĩ tsuã mia neatirumẽ, mia maemakatsirã?— aka

⁷ parãkĩ Sansãonẽ yuikĩ: —7 kanũ dispi benahaira tsusĩriamawẽ tsuãra ea neahairabu ẽ kushipa ẽ benutiruki, huni kushipa mirĩ keskairã— aka

^8-9 nĩkabaĩ shanẽ ibubu banabima 7 kanũ dispi benahaira tsusĩriama beshũ inãbu ushahaira dakakẽ hawẽ hiwe anu huni kushipabu itxapa hatu hunetã Dalilã Sansão neahairatã datekĩ hui kushipawẽ kenakĩ yuikĩ: —Sansãonẽ, mia atxinũ ika Filisteu nawabu bekanikiki— aka bestẽkauãkĩ dispi sheni menua keska ha kanũ dispi dasibi Sansãonẽ bikama hawaira tesa keyushukẽ haskatã hania hawẽ kushipahaira huimẽkaĩ unãkĩ tapiãbuma

¹⁰ haska washinawẽ taeshũ Dalilã Sansão yuikĩ: —Txanitxakakĩ mĩ ea parãshinaki. Hakia eskatianã, ana ea parãma ea yui kayabiwe, haskatã mia neabu mĩ pashatirumarã?— aka

¹¹ ana parãkĩ yuikĩ: —Dispi ewapa bena tsuã meriamawẽ ea neahairabu ẽ kushipa ẽ benutiruki, huni kushipa mirĩ keskairã— aka

¹² ana ushahairariakẽ hawẽ hiwe anu huni kushipa itxapa ana hatu huneriatã Dalilã dispi ewapa benahaira bishũ Sansão daneakĩ pehaira watã hui kushipawẽ kenakĩ yuikĩ: —Sansãonẽ, Filisteu nawabũ mia atxinũ ika bekanikiki— aka bestẽkauãkĩ habiaskari wakĩ dispi ewapa benabiakẽ liã mesi pishta keska wakĩ hawaira ana tesa keyuriakẽ habũ atxinũ ikaibũ uĩtã tashniabumakẽ

¹³ shaba betsatiã meshu huaya Dalilã ana Sansão beparãkĩ yukakĩ: —Haskakĩ ea yui pewama txanitxakakĩ mĩ ea parãkubainai? Ea yuiwe. Tsuã haska watã mia nea pewatirubumẽ?— aka ana parãkĩ yuikĩ: —Ẽ bu pashkakĩ 7 pikũtã batxi timakĩ ha ẽ bu tibi mĩ kapikũshu mistutã haki ea timakubaĩkĩ mestẽwãtã haska watã hi kupa kenuwẽ maiki seukĩ mĩ hawẽ ea mestẽwãtiruki. Mĩ ea haska wa ẽ kushipa ẽ benutiruki, huni kushipa mirĩ keskairã— aka Sansão ushãshũ hawẽ bu pashkakĩ 7 pikũwãtã batxi timakĩ hawẽ bu pikũ mistutã timakubaĩkĩ menetã

¹⁴ ha hi kupawẽ maiki seukĩ mestẽhairawatã ana hui kushipawẽ kenakĩ yuikĩ: —Sansãonẽ, ma mia atxinũ ika mianu Filisteu nawabu bekanikiki— aka besteĩ benikauãkĩ ha hawẽ seua betsekĩ ha haki bu timakĩ mestẽwãshu nasa keyuaya

¹⁵ haska wai uĩtã Dalilã ana yuikĩ: —Mĩ ea beparani txanitxakai ikaii. “Ẽ mia betxipaihairaii”, ibiakĩ shabakabi mĩ ea yuiama ikũkainaii. Dabe inũ bestiki mĩ eki kasheaii. Hania mĩ kushipa huai mĩ ea yuiriamaki— akĩ

¹⁶ hawẽtsaĩs shaba tibi habias yukakĩ daketapahaira wakubaina bika tenei mawakatsis ikĩ

¹⁷ atimas Sansãonẽ hakiri hawẽ hunea kushipa txanima shabakabi Dalila yuikĩ: —Ẽ nanei taei bebũkiri meribi Deusuna wakĩ Nazireu ea wani ẽ hiwekũkainaiwẽ taeshũ ẽ bu tsuã ea meshtetirubumaki. Tsuãra ẽ bu ma ea meshteaburã, ẽ kushipa benui ẽ ma babuaii, huni kushipa mirĩ keskairã— aka

¹⁸ atimas hawẽ hunea kushipa ma yui kayabia Dalilã unãtã Filisteu nawa shanẽ ibubu anu hawẽ hãtxa bumakĩ yuikĩ: —Hawẽ kushipa nemati ma ea yuishuki. Atxiri bekãwẽ— hatu wa nĩkatã ikũwãbirani bestibu tibi peiya beabu hawẽ hiwe anu hatu huneshũ

¹⁹ Dalilã hawẽ kishiki datãshũ Sansão ushãkĩ hawẽ bu pashkashũ 7 washũ kapikũshina hau meshtenũ huni betsa kena hushũ meshtekĩ keyuhairatã kaya Sansãonẽ hawẽ kushipa benua babuaya itxakawakĩ

²⁰ hui kushipawẽ Dalilã ana kenakĩ yuikĩ: —Sansãonẽ, mia atxinũ ika Filisteu nawabu mia anu bekanikiki— aka besteĩ haska imis keskai dabanẽ hatu detenũ ika benibiakauana Senhor Deusũ ana hawẽ kushipa inãma dapashkakĩ henea Sansãonẽ unãma

²¹ ma babukẽ Filisteu nawabũ atxishũ nupewẽ hawẽ beru tsekatã maewã Gaza anu iyukĩ bronze mane dispi txiwetameyawẽ neashũ hanu bitxiti hiwe merãshũ shekiwã denekĩ durumisbu anu dayamakĩ shaba tibi hawẽ deneti mishki ewapa sibĩmakĩ dayamakubainaibũ

²² ana hawẽ bu ewai benei taebiranaya

Sansão mawanikiaki, na hãtxarã

²³ Sansão Filisteu nawabũ atxikĩ maemaimabuwẽ taea benimai haki beyuskĩ hawẽ mekenika yushĩ Dagom kẽwãkĩ yuinaka tesẽshũ menukĩ keyushunũ ika Filisteu nawa shanẽ ibubu dasibi bei ma itxatã kãtakĩ: “Nukuki sinatakĩ Sansãonẽ nuku itxakawabiamiskẽ nukũ mekenika yushibubũ nuku atximaimaki”, iwanã,

²⁴ hawenabũ kẽwaĩ yura itxapabũ uĩ bekĩ hatũ yushibu habũri kẽwaĩ kãtakĩ yuikĩ: “Sansão nukuki sinatakĩ nukũ bai menukĩ yamawashũ nuku itxapa tenãkĩ keyuima nukũ mekenika yushibubũ nuku atximaimaki”, ikaibũ

²⁵ haskatã ana hatu maematiruma shinaĩ ha bebunua benimai haki kashei beyuskatsi hatũ bitxiti hiwe anua hau Sansão iwenũbũ hatu yunuabu bushũ Sansão iweshũ mishki txibu dabe hatũ kẽwãti hiwe namakis nitxĩtushitã haki kashei beyusaibũ

²⁶ hanushũ berunã metsũbaina Sansãonẽ yuikĩ: —Ha mishki txibu dabe matũ kẽwãti hiwe namakis ea mepĩrabewe, ẽ haki mestẽtã niairã— aka haska yuka berunã iyushũ mepiã

²⁷ hatũ yushibubu kẽwãti hiwe ewapa anu Filisteu nawa shanẽ ibubu dasibi ma hikiabu hunibu inũ aĩbuaibu mirima matabu hanua manaũri mishki tapa anushũ Sansão itxakawai haki kasheaibu 3.000 yurabũ manaũrishũ hatu uiaĩbũ

²⁸ hui kushipawẽ Sansãonẽ Senhor Deus kenakĩ yukakĩ: “Senhor Deusuũ, ẽ mia ea akĩ yukaii. Ẽ beru ea tsekaimabu keska wakĩ ẽ hatu dasibi kupiriai ea shinãkĩ na habiatiã ea ana besti wakĩ kushipa ea inãyuwe, ẽ ma mawairã”, aka

²⁹ Senhor Deusũ nĩkaya ha mishki txibu dabe namakis anu hawẽ nakishkũki tsauabu anu Sansãonẽ mewerabetã

³⁰ hui kushipawẽ yuikĩ: “Filisteu nawabu hau ebe mawanũbũwẽ!” ikĩ dasibi hawẽ kushipawẽ tu akĩ txibu dabe sẽkea hatũ kẽwãti hiwe purekebaĩ Filisteu nawa shanẽ ibubu dasibi inũ habube beaburiki di ikĩ hatu tenãkĩ keyua Sansão hiweshũ itxapa kupikĩ tenãbiakubiranimashũ ana hatube mawakĩ Sansão ha mestibia itxapa hatu tenãkĩ binunikiaki.

³¹ Hanua nĩkatã txipu hawẽ betsabu inũ hawenabu dasibi beshũ Sansãonẽ yura bishũ bushũ mae dabe Zorá inũ Estaol namakis anu hawẽ epa Manoá maiwanibu anu hawẽ yura hanu maiwarianibukiaki. 20 ano kaya Israelĩ enabũ hawẽ hãtxa nĩkakubainaibũ unãti wanika kushipa Sansão hiwenikiaki.