Juízes 15 - Kaxinawá Bíblia (BR)

¹ Shaba itxapa kaya shekiwã tsekaibutiã hawẽ aĩki bai kakĩ hawẽ daewai kanũ ishũ cabra bake bushuã hawẽ hiwe anu hikitã Sansãonẽ hawẽ kuka yuikĩ: —Ẽ ainẽ dĩtu anu hikikaĩ ẽ uĩ kaitsa— aka hakia hawẽ kukã hikimama nemakĩ

² yuikĩ: —Ẽ aĩbu bake iyua mĩ ana betxipaiama dabanẽ ẽ shinaĩmaki. Haskakẽ mĩ haibu betsa ẽ inaĩmaki. Haska biaimakẽ hawẽ betsa mashku ha binua hawẽruahaira hayaki. Ha biwe— aka

³ hakia Sansãonẽ kemakĩ yuikĩ: —Filisteu nawabu ẽ hatu kupiairã, natianã, ena txakabumaki. Habũ dukũ ea txakabuwakĩ taewaimabuki— ikaini

⁴ kashũ benabaũkĩ 300 kamã inu atxikubaũkĩ itxawatã dabe tibiki hawẽ hina txaipa ketashrabeshũ paniwã petxux ha dabe tibiki nea keyushũ

⁵ hune bushũ Filisteu nawabũ shekiwã bai itxapa anu paniwã petxux ha kamã inu tibikia txi dekushũ hatu nitxiã datei kushibaĩkĩ here sharabaũkĩ shekiwã mania inũ tsekariabuma anuri kawãkĩ hanu txiwẽ tima akeakebauna hi iki menubaĩkĩ hatũ uva bai inũ oliva bai dikabi hatu menũ keyuã

⁶ hanua: “Tsuã ashiãmẽ?” iwanã, Filisteu nawabu huni itxapabu yuka ibaũkĩ hatũ ashiã Sansão nĩkatã ha Sansãonã, hawẽ dais Timna mae anuatũ aĩbu bimabiaimashũ mebĩshũ hawẽ haibu inaĩmawẽ taeshũ hawẽ kukaki sinatakĩ ashiãki, ibaini bushũ Filisteu nawabũ unãtã ha aĩbu inũ hawẽ epa atxibaĩ hatu menu keyuabũ

⁷ hatuki Sansão nukutã hatu yuikĩ: —Haska mã ea txakabuwashinawẽ taeshũ ẽ matu kupikĩ keyuriama ẽ huĩrukũtirumaki. Deusũ ea nĩkaya shabakabi hãtxai ẽ yubakaii— hatu watã

⁸ sinatahairakĩ hatu kupibaũkĩ hatu shau teke keyukĩ itxapa tenãtã hanua pashai Etã mishki mati anu kini tãpe merã Sansão hiwei kayukẽ

Sansãonẽ haki sinataibu jumento kui shauwẽ hatu detekĩ keyunikiaki, na hãtxarã

⁹ Jacó bake Judá enabũ maiwã pakea anu Filisteu nawa huni itxapabu bushũ hatũ mae betsa Leí dapi hatũ tari hiwe pũtebaunabu

¹⁰ Judá enabu hatuwẽ datekĩ betsabũ hatu yukakĩ: —Haskakĩ mã nuku detenũ ika bekãshumẽ?— hatu wabu habũ kemakĩ yuikĩ: —Matu detenũ ika nũ huamaki. Sansãonẽ txakabuwakĩ nuku itxakahaira washinawẽ taeshũ ha besti atxitã haska nuku itxakawashina keska wariakĩ kupikatsi nũ atxinũ ika hushuki— hatu wabu

¹¹ hatu haska wabu nĩkabaini Mati Etã anu mishki kini tãpe anu 3.000 Judá enabu bushũ Sansão banabimakĩ yuikĩ: —Filisteu nawabu kushipahairabuki. Nukurã, nũ haskamaki. Haskakĩ mĩ nuku hatu datemai?— akabu Sansãonẽ hatu kemakĩ yuikĩ: —Parãkĩ haska ea itxakawaimabu keska wakĩ eãri habiaskari wakĩ ẽ hatu kupishinaki— hatu wa

¹² hanushũ habũ kemakĩ yuikĩ: —Nuku huirã, atxitã Filisteu nawabu mia inãkatsi iki nũ hushuki— akabu Sansãonẽ hatu kemariakĩ: —Mã matũ ea tenãmamẽ, ha dukũ ea yubakãwẽ, Deusũ matu nĩkayarã— hatu wa

¹³ Sansão yui pewakĩ: —Txanima nukũ nũ mia deteamaki. Filisteu nawabu mia inãkatsi nũ mia atxi bestinũ ika hushuki— atã atxitã dispi bena dabewẽ hawẽ mekẽ dabe petxiuri neakĩ yurayabi nea mestẽwãtã hanu hunea hiwea anua tashnimabirãkĩ iwekĩ

¹⁴ mae Leí anu hawenabũ Sansão Filisteu nawabu hatu iyushunabu betxibirani hatuki nukui hatũ tari hiwe anua kaĩbirani benimahairai sai sai ibiranaibũ Senhor Deusũ Yushinĩ Sansão kushipawaya hawẽ pũyãyabi hawẽ mekẽ dispiwẽ neashũ iweabu dasibi tesekaini dispi menua keskai niri iki keyuaya

¹⁵ hawẽ mekẽ anu hawa tsumamabia jumento kui txapuriama shetaya daka betxitã hawaira bitã hawẽ hatu detebaũkĩ 1.000 Filisteu nawabu tenãtã

¹⁶ haska hatu washukiri yuikĩ: “Jumento kuiwẽ yurabu detekĩ ẽ hatu mãtxĩ dabe inũ besti washuki. Jumento kuiwẽ 1.000 hunibu ẽ tenãshuki”, itã

¹⁷ jumento kui hanu putabaĩ kenakĩ: “Na matirã, Ramate-Leíki”, anikiaki, nukũ hãtxawẽ yuiarã “Jumentõ Kui Matiki”, akinã.

¹⁸ Hanushũ ũpash manuhairakĩ Senhor Deus kenatã yuikĩ: —Mĩ ea merabewa hatu detekĩ ẽ maemakĩ keyubiashukẽ haskakĩ natiã ũpash manui mia ikũwãbuma anua ẽ mawaya mĩ ea heneai?— aka

¹⁹ nĩkatã Leí anushũ Deusũ ũpash tuekĩ bepẽshũkĩ puemaya ha ũpash Sansãonẽ akĩ shetsekekĩ henetã shinã txãkaĩ benimakĩ txatxa ũpash tuea kenakĩ: “Yuka Tuea Txatxaki”, ani na habiatiã nũ uĩriatirubuki.

²⁰ Ha maiwã hirabi Filisteu nawabũ Israelĩ enabu hatu yunukĩ itxakawaibutiã 20 ano kaya Israelĩ enabũ Sansão hatũ unãti wanika kushipa merabenã shanẽ ibui hiweyunikiaki.