Juízes 13 - Kaxinawá Bíblia (BR)

Sansão kaĩshanaikiri nai tsuma kushipatũ hawẽ ibu yuinikiaki, na hãtxarã

¹ Senhor Deusũ hatu uĩbia haska shinãma Israelĩ enabũ txakabuwaibuwẽ taeshũ 40 ano kaya Israelĩ enabu hau habũ hatu itxakawakubaĩshanũbũ Filisteu nawabu Senhor Deusũ hatu yunutã ana hatu nemashunamakẽ

² habiatiãri Jacó bake Dã enabũ maiwã pakea anu mae betsa Zorá anu huni betsa hawẽ kena Manoá hiwea, hawẽ ainĩ haskatã bake bitirumahaira hiwekẽ

³ hanua Senhor Deusũ nai tsuma kushipa ha aĩbu anu tashnishũ yuikĩ: “Mĩ bake bitirumabia natiã mĩ bake naneshanaii. Ha bake mĩ biairã, huni bake mĩ kaĩshanaii.

⁴ Eskashũkũkaĩshãwẽ. Vinho inũ hamapai nushuti betsa paepa ana hamamaki ayamakubaĩshãwẽ. Ha inũ, Deusũ matu nemani ha pitima piriayamakubaĩshãwẽ.

⁵ Mĩ bake bitã kaĩshanaii. Mĩ bake kaĩriama meribi Deusuna ishanikiki, Nazireurã. Haskawẽ taeshũ ha mĩ bake kaiã hawẽ bu meshtetimaki. Hanua ewai kushipakĩ Filisteu nawabũ mã Israelĩ enabu matu itxakawakubainaibu hatũ matu merabewakĩ taewashanikiki”, atã kakẽ

⁶ haska wawana aĩbu kashũ hawẽ bene yuikĩ: “Deus anua huni betsa ẽ nia anu tashnitushikĩ ea datea ẽ hushuki. Senhor Deusũ nai tsuma kushipa daki ẽ uĩshuki. Yukakĩ: ‘Mĩ tsuamẽ?’ akĩ ẽ yukama ishuki. Hatũri ea haskari ea yukama iriashuki.

⁷ Hatũ ea yuikinã: ‘Huni bake bitã mĩ kaĩshanaii’, ea washuki. Hawẽ taeshũkiaki ana vinho inũ hamapai nushuti betsa paepa natiã ẽ ana atirumakiaki. Ha inũ, hawara Deusũ nuku nemani ha piti pitima ẽ ana pitirumakiaki. Ha ẽ bake kaĩriama inũ hanu mawashanaitianã, meribi Deusuna Nazireu ipakeshanikiaki. Haska ea yuishuki”, aka

⁸ nĩkatã hanua Manoá Senhor Deusbe hãtxakĩ: “Senhor Deusuũ, ẽ mia yukaii, ha huni iwãshu ana nuku anu yunuwe, ha bake kaĩshanaikiri nuku ana yuikĩ hau nuku meshtãmayununã”, aka

⁹ haska Manoá ea aka nĩkatã Senhor Deusũ ashũkĩ hawẽ nai tsuma kushipa ana yunukĩ nitxĩshuna bai anu ana aĩbu dayai kaki ana haki nukui tashnia uĩtã hawẽ bene Manoá hanumakẽ

¹⁰ hanua aĩbu hawaira kushikaĩ hawẽ bene yuikĩ: —Baa, ea nĩkawe. Uatiã huni eki nukushinarã, ua ma ana huaki. Ebe kashũ uĩ kawe— aka

¹¹ Manoá benitã hawẽ aĩbe kai huni huaki nukutã yukakĩ yuikĩ: —Mĩ miamẽ, uatiã ẽ aĩbe mĩ hãtxashinarã?— aka ha hunĩ kemakĩ yuikĩ: —Haa, ẽ eaki— aka

¹² hanushũ Manoá ana yukakĩ: —Haska mĩ yuishina nukũ bake kaĩshanai haska washũ nũ yume watirumẽ? Nũ haska wakubaĩshanai?— aka

¹³ Senhor Deusũ nai tsuma kushipatũ kemakĩ yuikĩ: —Haska dasibi mĩ aĩ ẽ ma yuishina keska ishũkĩ hau akubainũwẽ.

¹⁴ Uva bimi hene paeriama inũ vinho inũ nushuti buspui paeai hau ataskayamashanũwẽ. Ha dikabi hawara Deusũ matu nemani nami betsa betsapa mĩ bakẽ piriatirumaki. Haska mĩ aĩ ẽ yunushinaki— aka

^15-16 ha huni Senhor Deusũ nai tsuma kushipa unãma Manoã ana yuikĩ: —Mia benimawakĩ cabra bake nami babupa detekĩ tesẽshũ nũ mia bawashuni kai, habianu bashikushũ piyuwe— aka haska wa Senhor Deusũ nai tsuma kushipatũ kemakĩ yuikĩ: —Ẽ bashikutiruki. Hakia mibetã ẽ pitirumaki. Hakia Senhor Deus kẽwãkĩ benimawakĩ cabra bake tesẽshũ mĩ menukĩ keyushũtiruki— aka

¹⁷ hanushũ Manoá ana nai tsuma kushipa yukakĩ yuikĩ: —Haska mĩ nuku yuishina keska nukũ bake ma kaiãyã hawẽ taeshũ nũ mia kẽwãshanũ mĩ kena besti nuku yuiwe— aka

¹⁸ nai tsuma kushipatũ kemakĩ: —Ẽ kena haskakĩ mã unãkatsis ikai? Ẽ kenarã, huneyua pepa hawẽruahairaki. Ẽ matu yuitirumaki— aka

¹⁹ Senhor Deus kẽwanũ ishũ karu bishũ mishki mamaki karu pewakĩ mãtxĩshũ cabra bake tesẽshũ misiyabi mãtxĩtã txi keti washũ nami inũ sheki beru menuabu here hi ikai bebũ Manoá inũ hawẽ ainẽ uiaĩbũ haska tsuã atiruma hawẽ dateti dami Senhor Deusũ hatu uĩma

²⁰ txi here hi ikai anu hawẽ kuĩ inai puebainai anu Senhor Deusũ nai tsuma kushipa ha txi here namakis nai anu inakainai uĩtã datei dãti iki beti itã

^21-23 —Ha hunirã, Senhor Deusũ nai tsuma kushipaki— ishũ atimas unãtã Manoá hawẽ aĩ yuikĩ: —Deus nũ uĩshuwẽ taea hawa teama txanima nũ mawaii— aka hakia hawẽ ainẽ kemakĩ yuikĩ: —Nuku tenãkatsi ikinã, cabra bake nũ menukĩ keyushuna biama ikeãshuki. Txi kuĩ anuri huni inakainai nuku uĩmama ikeãshuki. Huni bake ẽ hayashanai nuku yuiama iriakeãshuki. Haskawẽ taeshũ nuku kupikĩ debu wamaki— aka Manoá inũ hawẽ aĩ uĩmai ha Senhor Deusũ nai tsuma kushipa ana hatu anu tashniama inikiaki.

²⁴ Haska waima hiweatiã Manoá ainẽ bake bi tuyatã huni bake kaiã kenakĩ: “Sansãoki”, akimabu Senhor Deusũ duawakĩ pepa wakubainaya hatũ bake ewai ma yumekẽ

²⁵ shaba betsatiã mae betsa Zorá inũ mae betsa Estaol namakis Jacó bake Dã enabube Sansão hiweyukẽ hanushũ Senhor Deusũ Yushinẽ Sansão atxitã kushipa wakĩ taewaya